Bir neçə il əvvəl sərt karantin rejimi tətbiq olunduğu vaxtda Prezident Administrasiyasının keçmiş rəhbəri Ramiz Mehdiyevin nəvəsinin toyunda iştirak etdiyinə görə cəzalandırılan Heydər Əliyev adına Liseyin direktoru Sevinc Orucova ətrafında yeni bir qalmaqal baş verib. O, liseydə tibb bacısı kimi fəaliyyət göstərmiş Aidə Nəsibovanın həbs olunmasını istəyir.

Bizimyol.info xəbər verir ki, Sevinc Orucova tibb bacısının Cinayət Məcəlləsinin 147.2 (ağır cinayətdə ittiham etməklə böhtan atma) maddəsi ilə cəzalandırılması üçün məhkəmədə xüsusi ittiham qaydasında iddia qaldırıb. Direktor şikayətində Aidə Nəsibovanın bu maddələrdə nəzərdə tutulmuş ən ağır cəzaya məhkum edilməsini istəyib.

1980-ci il təvəllüdlü Aidə Nəsibova Xətai rayonundakı 2 nömrəli Uşaq Poliklinikasında tibb bacısı işləyib. O, liseyə 2018-ci ildə poliklinika tərəfindən tibb bacısı kimi təhkim olunub. 3 dekabr 2025-ci ildə isə poliklinika rəhbərliyinin müvafiq əmri ilə geri çağırılıb.

Direktorla tibb bacısı arasında qalmaqalın səbəbi Aidə Nəsibovanın liseydən geri çağırılması, daha sonra onun müxtəlif media orqanlarına müsahibələr verərək, Sevinc Orucova barədə səsləndirdiyi fikirlərdir. O, bildirib ki, Sevinc Orucovanın əsassız şikayətlərinə görə liseydən geri çağırılıb. Aidə Nəsibova liseyin direktorunu ondan rüşvət tələb etməkdə günahlandırıb. Onun sözlərinə görə, direktor 2 min manat pul tələb edib.

Himayəsində 3 uşaq və xəstə anası olduğunu qeyd edən tibb bacısı bildirib ki, lisey yaşadığı evin yaxınlığında yerləşdirindən ona uyğun idi. O, lisey direktorunu orada təhsil alan uşaqlara psixoloji təzyiq göstərməkdə də ittiham edib. İddia edib ki, uşaqlara aşağı qiymətlər yazılmaqla, onların valideynlərindən pul alınır və qiymətlər düzəldilir.

Aidə Nəsibova müsahibələrində Sevinc Orucovanın Ramiz Mehdiyevin qohumu olduğunu da əlavə edib.

Direktor isə bildirir ki, Aidə Nəsibovanın şikayətində göstərilənlər böhtandır. O məlumatların yayılması isə ictimaiyyət, qohumlar, şagirdlər və valideynlər arasında onun işgüzar nüfuzuna zərbə vurur. Peşə fəaliyyətinin keyfiyyəti barədə mənfi rəy yaranmasına gətirib çıxarır.

2016-cı ildən liseyin direktoru olduğunu qeyd edən Sevinc Orucova əlavə edib ki, tibb bacısı bir müddət əvvəl məktəbin qarşısında avtomobillə onun yolunu kəsib.

“Liseyin qarşısında idarə etdiyi avtomobillə yolumu kəsərək, mənim və direktor müavinlərinin 15 dəqiqə liseyə girişinə mane oldu. Buna görə Daxili İşlər Nazirliyinin 102 xidmətinə məlumat verəndən sonra biz liseyə daxil ola bildik. Bununla bağlı Xətai rayonu, 37-ci polis bölməsində İnzibati Xətalar Məcəlləsinin 510-cu (xırda xuliqanlıq) maddəsi ilə inzibati icraatın açılması haqqında qərar qəbul edildi. Xətai Rayon Məhkəməsinin 2 fevral 2026-cı il tarixli qərarı ilə o, İnzibati Xətalar Məcəlləsinin 510-cu maddəsi ilə Aidə Nəsibova 75 manat cərimələndi”, - deyə direktor şikayətində qeyd edib.

Aidə Nəsibova böhtan və təhqirə görə cəzalandırılması barədə direktorun şikayətinə məhkəmədə münasibət bildirərkən deyib ki, Sevinc Orucovanın şikayəti əsassızdır. O və vəkili şikayətin icraata götürülməməsini xahiş edib.

Xətai Rayon Məhkəməsində hakim Fuad Axundov tərəfləri dinləyəndən sonra lisey direktorunun xüsusi ittiham qaydasında şikayətinin icraata götürülməsindən imtina edib. Qərarda göstərilib ki, şikayət prosessual qanunvericiliyin tələblərinə uyğun deyil.

Xatırladaq ki, 2020-ci il avqustun 18-də Novxanıda Ramiz Mehdiyevin nəvəsinin toy mərasimində iştirakına görə xüsusi karantin rejimi qaydalarını pozması əsası ilə Sevinc Orucovaya Təhsil nazirinin əmri ilə töhmət verilmişdi.