Söz-söhbətlərə aydınlıq gətirmək üçün adıçəkilən rejissorla əlaqə saxladıq. Moderator.az-a açıqlama verən Faiq Nağıyev bütün bu hadisələrin “Vita min” filminin çəkilişi zamanı baş verdiyini bildirib:

“Artıq bir müddətdir ki, “Vita min” filminin çəkilişlərinə başlamışıq. Filmin layihə rəhbəri və quruluşcu rejissoru mənəm. Ekran işində xalq artistimiz, gözəl aktrisamız Naibə Allahverdiyeva başda olmaqla əməkdar artist İqrar Salamov, aktyorlar Samir Abbasov, Natiq Fərzəliyev, Sevinc Məmmədova, Nərmin Əliyeva və s. sənətçilər çəkilir. Hər biri də peşəkardır. Filmin Bakı səhnələri tamamlanandan sonra İsmayıllıda çəkdik, daha sonra isə Astaraya yollandıq. Nuranə xanım Masazırda, İsmayıllıda çəkildi, Astarada bizimlə oldu. Nuranə xanım aktrisalıqdan çox dedi-qodularla məşğul olan bir xanım imiş. Bunu mən özüm-özümdə artıq aydınlaşdırdım. Biz Astaraya getdik, orada şərait uyğun olmadığı üçün mən daha gözəl, daha müasir bir oteldə yer ayarladım. Otelə yerləşəndən sonra bütün problemlər ortalığa çıxdı. Sənətçilərin hər birini də ayrı-ayrı mərtəbələrdə və ayrı-ayrı otaqlarda yerləşdirmişəm və özüm isə 5-ci mərtəbədə qalmışam. Hamını otaqlarda yerləşdirib razı salandan sonra çəkiliş meydançasına yollanmışıq, heyətin yarısı isə oteldə qalıb. Çəkilişdə olanda mənə sənətçilərdən biri zəng etdi ki, burada ayaqyolu ümumidir.. Dedim ki, gəlim qaydasına qoyaram. Məni də başa düşmək lazımdır ki, gecə saat 3-4 arası çəkilişdən qayıtmışam. Məlum oldu ki, o aktrisanın narazı olmasına səbəb də Nuranə xanımdır. Səhər açıldı, gördüm ki, Nuranə xanım yenə də qeybətindən, “dır-dır”-ından geri qalmır. Öz qulağımla eşidirəm ki, deyir “Naibə xanım, siz xalq artistisiniz, rejissor özü vip otaqda qalır, sizə görün haranı verir”. Əlbəttə ki, sevimli aktrisamız Naibə xanım bu lazımsız, yersiz söz-söhbətlərə fikir vermirdi. Nuranə xanım dəfələrlə Naibə xanım və ətrafındakı sənətçilərə lori dildə desək “tırka” vermək istəsə də heç kim ona uymur. Bu boyda kollektivdən necə olur ki, təkcə Nuranə xanım narazı qalır? Bütün bu söz-söhbətlər mənim çəkdiyim filmə kölgə salmaq məqsədi daşıyırdı. Mən bilmədim ki, Nuranə xanım ora çəkilməyə gəlmişdi yoxsa söz-söhbət yaratmağa? O ki, qaldı mənim kobud davranmağıma.. Biz belə danışmışdıq ki, Masallıda çəkilişi edəndən sonra onu Bakıya yola salacam. Bu insan çəkilməmiş durub hazırlaşıb ki, “məni yola salın, gedirəm”. Yalvar-yaxar, xahiş edirəm çəkilin sonra gedin. Bütün bu yalvarışlarıma baxmayaraq əlində çamadan aşağı düşür. Mən yalvardıqca o daha da üstümə gəlir. Axı mən də insanam, mənim də səbrimin bir həddi-hüdudu var. Bu zaman çantanı əlindən almışam və demişəm ki, gəlin oturun maşına, bu yorğun halımla divara-daşa dəyə-dəyə sizi özüm Bakıya aparacam. Məni sadəcə o həddə çatdırdı. Onu heç bir ölümlə hədələməmişəm və söyüş söyməmişəm. İndi mənim suallarıma cavab versin. Nuranə xanım çalışdığı teatrda bəlkə hamamı, ayaqyolusu ayrı olan bir yerdə işləyir? Nuranə xanım öz evində gecə saat 2-də zəng edib pizza sifariş etmişdi? Nə oldu mənim çəkilişim gəldi, o bu həvəsə düşdü? Niyə Nuranə xanım öz bacarıqsız aktrisalığından danışmır? Robot kimi danışıb oynayır. Ona görə səhnəni 8-9 dubla çəkirdim. Lap tutaq ki, mən vip otaqda qalmışam. İstəyərəm vip-də qalaram, istəyərəm villada. Bundan sənə nə? Bəlkə teatr qastrollarına gedəndə o vip otaqda qalır xəbərimiz yoxdur? Ona qalsa əməkdar artist İqrar müəllim, bir başqa aktyor “raskladuşka”-da yatırdı. O dillənsin də! Nəticədə oteldəki səhnələr çəkilmədi və mən əlavə xərcə düşdüm”.