Son günlər sosial şəbəkələrdə həkimlərin peşə titulunun necə ifadə olunması ilə bağlı “uzman”, yoxsa “mütəxəssis” müzakirəsi geniş müzakirə olunur.

Xüsusilə Türkiyədə ixtisas təhsili almış həkimlərin özlərini “uzman həkim” kimi təqdim etməsi ətrafında fərqli fikirlər səsləndirilir. Bəzi şəxslər “uzman” sözünün türk mənşəli olduğunu və uzun müddətdir geniş istifadə edildiyini əsas gətirərək bu ifadənin Azərbaycan dilində də işlədilməsini normal sayır.

Digər yanaşmaya görə isə Azərbaycan dilində bunun qarşılığı “həkim-mütəxəssis”dir və rəsmi terminologiyada da bu ifadədən istifadə olunur. Bəs Azərbaycan dilində həkimin peşə titulunun hansı formada işlədilməsi daha doğrudur?

Mövzu ilə bağlı “Cebheinfo.az”-a açıqlamasında həkim, tibb üzrə eksperti Aydın Əliyev bildirib ki, “uzman” sözünün dilimizdə işlədilməsi ilə bağlı fikirlər müxtəlifdir, o isə hər iki ifadənin istifadəsində problem görmür:

“Hesab edirəm ki, “uzman” sözünün leksikonumuza daxil edilməsi pis olmaz. Hər iki ifadə öz qaydasında işlədilə bilər. “Uzman həkim” və “həkim-mütəxəssis” ifadələri mahiyyət etibarilə eyni məna daşıyır. Sadəcə, Türkiyədə rezidentura təhsili “uzmanlıq” adlanır və bu təhsil pilləsini başa vuran şəxs “uzman həkim” kimi təqdim olunur.

Azərbaycan dilində isə buna uyğun olaraq “həkim-mütəxəssis” ifadəsindən istifadə edilir. Türkiyədə təhsil alıb, rezidentura keçən və həmin ölkədə “uzman həkim” adı ilə tanınan şəxsin özünü bu şəkildə təqdim etməsində də problem görmürəm. İnsanlar orada qəbul olunmaq üçün müəyyən mərhələlərdən keçib, 4-5 il təhsil alıb və bu titul onlara tanışdırsa, “uzman həkim” ifadəsindən istifadə edə bilərlər”.

Həkim qeyd edib ki, amma həkimin adının qarşısında “uzman həkim” və ya “həkim-mütəxəssis” yazılmasının onun avtomatik olaraq eyni bilik və peşəkarlıq səviyyəsinə malik olması demək deyil:

“Həkimlər arasında da təcrübəsinə, bilik və bacarığına görə fərqlər var. Bu baxımdan, pasiyentlərin həkim haqqında ətraflı məlumat əldə etməsi vacibdir. Pasiyentin qəbuluna getmək istədiyi həkimin harada və necə təhsil aldığı, hansı təhsil pillələrindən keçdiyi barədə məlumat almaq hüququ var.

Termin məsələsində isə düşünürəm ki, hər iki ifadənin işlədilməsində problem yoxdur. Əsas məsələ həkimin öz işini yaxşı görməsi, təcrübəsini və biliyini daim artırması, peşəsinə vicdanla yanaşması və pasiyentlərin etimadını doğrultmasıdır.

Təbii ki, istifadə olunan sözün və titulun həqiqəti əks etdirməsi də mühüm şərtdir. Ümumilikdə, “uzman” və “mütəxəssis” ifadələrinin hər ikisinin işlədilməsi mümkündür, əsas məsələ isə bu adların hansı təhsil, peşəkarlıq göstəricilərinə əsaslandığının aydın olması və pasiyentin düzgün məlumatlandırılmasıdır”.