Ermənistanda kritik parlament seçkilərinə iki aydan az qaldı. Ancaq artıq indidən söyləmək olar ki, Baş nazir Nikol Paşinyanın aprelin 1-də Moskvaya etdiyi səfər seçki təbliğat kampaniyasına sonadək öz məxsusi “damğasını” vuracaq.

Kremldə, kifayət qədər gərgin atmosferdə keçən Paşinyan-Putin görüşü, şübhəsiz, həm də erməni cəmiyyətinə bir mesaj və yaxud siqnal idi. İlk növbədə o anlamda ki, qarşıdakı seçkilərdə bu xalq iki seçimdən birini etməlidir: ya Rusiyadan ucuz qaz da daxil, iqtisadi-energetik və vassal asılılığının davam etməsi və Kremlin erməni separatizminə dəstəyini (gələcək müharibəni) seçməlidir ya da o, Moskvanın təzyiqlərini göz önünə alıb qonşu Azərbaycan və Türkiyə ilə barışıq prosesinə, yəni, sülhə və dinc-yanaşı yaşamağa üstünlük verməlidir.

Bu arada ABŞ-nin “kölgə kəşfiyyatı” sayılan “Stratfor” “beyin mərkəzi” İrəvan-Moskva əlaqələrinin mümkün inkişaf vektorlarını analiz edib. Təhlilçilərə görə, Rusiya, ehtimal ki, parlament seçkilərinə qədər Ermənistanla münasibətlərin tam kəsilməsi prosesinə başlamayacaq, lakin 7 iyun səsverməsindən sonra İrəvan Moskva ilə aradakı məsafəni qorumağa davam edərsə, iqtisadi və ticarət xərclərini artırmağa hazırlaşmalıdır.

“Ən ehtimal olunan varianta Ermənistanla ticarətə daha sərt nəzarət, sanitar və fitosanitar tədbirlər (keyfiyyət) kimi “tənzimləyici” maneələr, həmçinin Ermənistanın enerji asılılığından (qazdan – red.) istifadə daxildir ki, bu da erməni ixracatçılarına və Rusiya bazarı ilə bağlı biznesə qeyri-mütənasib təsir göstərəcək”, - mərkəzin proqnozunda qeyd olunur.

“Stratfor” hesab edir ki, əgər Paşinyan təzədən mandat alarsa və Rusiyanın Ermənistandakı iqtisadi və strateji mövcudluğunu azaltmağa davam edərsə, Moskva, münasibətlərin assimmetriyasını nəzərə alaraq, bu rıçaqlardan istifadə edəcək. Başqa sözlə desək, Paşinyanı hakimiyyətdə saxlayan xalq Moskvanı qəzəbləndirməklə onun sürprizlərinə də hazır olmalıdır.

Ermənistanda seçkilər yaxınlaşdıqca həm erməni müxalifəti, həm də Rusiyadakı onlara dəstək verən dairələr seçiciləri "əgər Rusiyaya yaxın qüvvələrə səs verib hakimiyyətə gətirməyəcəksinizsə 7 iyundan sonra Ermənistanı böyük məhrumiyyətlər gözləyir" kimi təbliğatla şantaj edirlər. İyunun 7-də ermənilərin seçimi hansı yöndə olacaq, Moskvanın psixoloji təzyiqləri işə yarayacaqmı?

Azad Vətən Partiyasının sədri Akif Nağı Musavat.com-a bildirib ki, Rusiya Ermənistandakı seçkilərə hazırlıqlarını müxtəlif istiqamətlərdə davam etdirir. Bu istiqamətlərdən biri də Ermənistan əhalisini şantaj edib qorxutmaqdır:

“Seçicilərə açıq-aşkar psixoloji təzyiq edilir. Elə bir rəy formalaşdırmağa çalışırlar ki, erməni seçicilər Paşinyana səs verəcəkləri və hakimiyyətdə saxlayacaqları halda Ermənistan dövləti məhv olacaq. Eyni zamanda, guya nicat yolunun Rusiyaya bağlı siyasi qüvvələrə və namizədlərə dəstək verib onları hakimiyyətə gətirmək olduğu təbliğatı aparılır.

Paşinyan isə seçki yaxınalaşdıqca Rusiya ilə ehtiyatla davranır və öz təbliğatını davam etdirir. Ermənistan cəmiyyətinin hamısı da olmasa əksəriyyəti anti-Rusiya mövqeyində qalır. Şantajla qorxutmaqla bu mövqeyi dəyişmək asan deyil. Bir çox siyasi, iqtisadi amillər var ki, Rusiyanın əvvəlki mövqelərinin geri qayıtmasına imkan vermir. Ona görə də seçiciləri Rusiya ilə qorxutmaq cəhdlərinin nəticə verəcəyi ehtimalı həddən artıq azdır. Uzun illər oynanılmış kartı yenidən ortaya atmaq əvvəlki kimi işə yaramaz”.