Prezident İlham Əliyev “Kazinform” İnformasiya Agentliyinə verdiyi müsahibədə Azərbaycan-Qazaxıstan münasibətlərinin dərin mahiyyətini, strateji ruhunu və çoxşaxəli əməkdaşlıq potensialını ətraflı şərh etdi. Bu gün ölkələrimiz arasında fəal siyasi dialoq bütün sahələrdə əlaqələrin inkişafına yol açır. İqtisadi əlaqələr dinamik şəkildə genişlənir, o cümlədən nəqliyyat-logistika və enerji sahələrində ortaq təşəbbüslər əsasında mühüm layihələr icra olunur.
Azərbaycan ilə Qazaxıstanın təkcə regional tərəfdaşlar deyil, həm də ortaq tarixi, mənəvi və strateji dəyərlərə əsaslanan iki qardaş dövlətdir. Müstəqillik illərində ölkələrimiz arasında münasibətlər dinamik inkişaf edərək strateji tərəfdaşlıq səviyyəsinə yüksəlib. Dövlət başçılarının qarşılıqlı hörmət və etimada əsaslanan münasibətləri iki ölkə arasında bütün sahələrdə tərəfdaşlığın inkişafına mühüm töhfə verir, ciddi nailiyyətlərin əldə olunmasını şərtləndirir. Prezident İlham Əliyev və Prezident Kasım-Jomart Tokayev tərəfindən qəbul olunan qərarlar, verilən tapşırıqların uğurlu icrası ölkələrimiz və xalqlarımız arasında dostluq və qardaşlıq münasibətlərinin dərinləşməsinə xidmət edir.
Dövlətimizin başçısının müsahibəsində qeyd etdiyi kimi, ötən illər ərzində iki ölkə arasında yaradılan möhkəm hüquq-müqavilə bazası əsasında siyasi, iqtisadi-ticari, investisiya, mədəni-humanitar və digər sahələrdə səmərəli əməkdaşlıq mexanizmləri yaradılıb. Bu xüsusda iqtisadi əməkdaşlığın genişləndirilməsi istiqamətində atılam mühüm addımları qeyd etmək lazımdır. İkitərəfli ticarət dövriyyəsinin artması, qarşılıqlı investisiya layihələrinin reallaşdırılması və xüsusilə enerji təhlükəsizliyi sahəsində birgə təşəbbüslər bu münasibətlərin strateji mahiyyətini daha da gücləndirir. 2024-cü ildə iki ölkə arasında əmtəə dövriyyəsinin həcmi 470 milyon dollar təşkil edib. 2025-ci ilin yanvar-avqust aylarında isə ötən ilin müvafiq dövrü ilə müqayisədə üç dəfə çox olmaqla, 547 milyon dollara çatıb. Bu rəqəmlər son illər ərzində görülən məqsədyönülü işlərin məntiqi nəticəsidir.
İki ölkə arasında formalaşmış etimad mühiti, qarşılıqlı dəstək və strateji əməkdaşlıq modeli təkcə ikitərəfli münasibətləri deyil, həm də bütövlükdə Türk dünyasının siyasi və iqtisadi gücünü artıran amillər sırasındadır. Bu xüsusda, Orta Dəhlizin inkişafı üzrə görülən işlər, ölkələrimizin ərazisində infrastrukturun davamlı inkişaf etdirilməsi və digər addımlar bu gün nəqliyyat-logistika sahəsində uğurların əldə olunmasına yol açıb. Belə ki, 2024-cü ildə Azərbaycan ilə Qazaxıstan arasında tranzit daşımaları əvvəlki dövrlə müqayisədə 20 faiz artaraq 3,5 milyon tondan çox olub. Eyni zamanda, ölkələrimiz enerji sektorunda da uzun illərdir səmərəli əməkdaşlıq edirlər.
Prezident İlham Əliyevin Qazaxıstana dövlət səfəri ərəfəsində verdiyi müsahibə də göstərir ki, ölkələrimiz arasında ikitərəfli gündəlik zəngindir. Ölkə liderlərinin qarşılıqlı səfərləri əməkdaşlığın dərinləşdirilməsi və yeni mərhələyə keçidi üçün imkanlar açır.
Ağarəhim Baxışov – Dövlət İdarəçilik Akademiyası
"DİA-AZ"
