"Bu, mənim «Koroğlu» metro stansiyasından Nardarandakı bağ evimə qəzalı vəziyyətdə olan özəl mikroavtobusla yüksək sürətlə getdiyim andır. Əslində, çox rahatdır: adambaşına 2 manat ödəyirsən və yeni Böyükşor yolu ilə cəmi 15–20 dəqiqəyə, heç bir sonsuz dolanbac olmadan səni təyinat yerinə çatdırırlar..."DİA-AZ" xəbər verir ki, bunu özünün sosial şəbəkə hesabında yazan tanınmış memar Elçin T.Əliyev aşağıdakı fotoları təqdim edərək fikrini belə davam etdirir:
"Dövlətin təklif etdiyi alternativ isə ən qızmar istidə Abşeronun qəsəbələri ilə dolana-dolana hərəkət edən və yola azı bir saat yarım sərf edən avtobusdur.
Ancaq hazırda maşındakı hamını düşündürən əsas sual budur: görəsən, salamat çatacağıqmı?.. Allah eləməsin, bir qəza baş versə, hamımız yanarıq. Avtomobilin yük maşınından sərnişin mikroavtobusuna çevrildiyi açıq-aydın görünür. Köhnəlmiş «Buxanka»nın sürücüsünün düşündüyü isə yalnız bir şeydir: sərnişinləri mümkün qədər tez düşürüb növbəti reys üçün geri qayıtmaq.
Bunu niyə yazıram? AYNA, görünür, nəqliyyat problemlərini həll etməkdən daha çox özünü reklam etmək məqsədi daşıyan və marşrutu cəmi 500 metr olan, heç kimin ehtiyac duymadığı Parapetdəki pulsuz avtobusları işə salmaq əvəzinə, kaş ki, bağ evlərinə gedən on minlərlə vətəndaşı düşünsə və sürətli, müasir mikroavtobuslarla rəsmi marşrutlar təşkil edərdi.
Xüsusilə də artıq gölün üzərindən keçən, yolu xeyli qısaldan yeni və rahat yol istifadəyə verilib. Amma bu yolla hələ də heç bir rəsmi marşrut işləmir.
Burada lisenziyalı ekspress mikroavtobusların, aydın hərəkət cədvəlinin, nəqliyyat vasitələrinin texniki vəziyyətinə ciddi nəzarətin və təhlükəsizlik tələblərinin tətbiqi qat-qat faydalı olardı.
Hələlik isə dövlət qurumu səssizcə müşahidə edir ki, «Köroğlu» metro stansiyasının qarşısındakı meydança qeyri-rəsmi avtovağzala çevrilib. Saysız-hesabsız qanunsuz sərnişindaşıyanlar, sərnişin cəlb etmək üçün bir-birini üstələyən sürücülər... Metrodan çıxan kimi çörək pullarını təmin etməyə çalışan insanların sırasının arasından keçməli olursan. Antisanitariya hökm sürür, bir dənə də olsun istiqamət göstəricisi, marşrut sxemi və ya son dayanacaqları göstərən məlumat lövhəsi yoxdur. Elə təəssürat yaranır ki, bu xaosu sadəcə qəsdən görməzliyə vururlar.
Amma əgər hər gün minlərlə insan bu özəl marşrutlardan istifadə edirsə, deməli, problem həqiqətən mövcuddur. AYNA-nın buna göz yummaq deyil, təhlükəsiz, mədəni və qanuni həll yolu təklif etməkdir. Hələlik isə belə görünür ki, mövcud vəziyyət kimlərisə tamamilə qane edir..."
