Milli Məclisin iclasında çıxış edən deputat Məlahət İbrahimqızı bildirib ki, bu günlərdə ictimaiyyət arasında və mediada ən çox müzakirə edilən mövzu Səbail Rayon Məhkəməsinin qəbul etdiyi qərardır.

Musavat.com xəbər verir ki, o qeyd edib:

“Mətbuatda da dərc edildiyi kimi, məhkəmənin qərarına əsasən, CM-in 274-cü maddəsi - dövlətə xəyanət, 278-ci maddə - hakimiyyəti zorla ələ keçirmə və 193-1-ci maddə - cinayət yolu ilə əldə edilmiş vəsaitlərin leqallaşdırılması ağır cinayətləri işləri üzrə Ramiz Mehdiyev barəsində 4 ay müddətinə ev dustaqlığı qətimkan tədbiri seçilib.

Azərbaycan xalqı çox gözəl bilir ki, Ramiz Mehdiyev kimi yüzlərlə cılız və hakimiyyət hərisləri olsa belə, iki yüz illik dünya erməniliyini, erməni lobbisini və işğalçı Ermənistanın arxasında dayanan super gücləri 44 gün ərzində məğlub edən Müzəffər Ali Baş Kamandanımızın dəmir yumruğu qarşısında çox acizdirlər. Azərbaycan xalqı hətta öıkəmizin ən çətin günlərində - 1994 və 1995-ci illərdə dövlət çevrilişlərində belə Ulu öndərimiz Heydər Əliyevin ətrafında sarsılmaz birlik numayiş etdirib. Dövlət çevrilişinə cəhd edən, hakimiyyəti zorla ələ keçirmək istəyən bu cinayətkar qüvvələr öz çirkli əməlləri ilə həm də Dövlətimizin Qurucusu, bütün həyatını Azərbaycan xalqının rifahına və dövlət müstəqilliyimizin sarsılmazlığına xidmət etmiş Heydər Əliyevə, Azərbaycan Xalqını dünyada Qalib Xalq kimi tanıdan və beynəlxalq aləmdə dövlətimizə böyük imic qazandıran İlham Əliyevə və azadlığımız, müstəqilliyimiz, ərazi bütövlüyümüz və suverenliyimiz uğrunda canlarından keçmiş əziz şəhidlərimizin ruhuna qarşı xəyanətdir.

Sözsüz ki, Azərbaycan xalqı və gələcək nəsillər bu xəyanəti heç vaxt bağışlamayacaq.

Şübhəsiz ki, kimliyindən və tutduğu mövqedən asılı olmayaraq, dövlətçiliyimizə, dövlət başçısına xəyanət edən hər kəs, eləcə də Ramiz Mehdiyev və onun silahdaşları qanun qarşısında cavab verəcək.

Azərbaycan xalqı və ictimaiyyəti öz dövlətinə və Prezidentinə inanır, güvənir və hər zaman onun ətrafında sarsılmaz birlik nümayiş etdirir, bu birlik belə də davam edəcək”.

M.İbrahimqızı yekunda 18 Oktyabrla bağlı təbriklərini çatdırıb və Ulu öndər Heydər Əliyevin məşhur ifadəsi ilə xitab edib:

“Mövqeyinizi bildirin!”

Qeyd edək ki, bəzi deputatlar illər boyu Ramiz Mehdiyevi “əqidəsinə sadiq dövlət adamı”, “elmi və siyasi məktəb yaradan şəxsiyyət” kimi təqdim ediblər. Onların sırasına Məlahət İbrahimqızı da daxil olub. Bir vaxtlar Ramiz Mehdiyevi ürəkdən təbrik edən “O, Azərbaycanın ən ali mükafatlarına layiq görülüb. Hələ sovet dövründən onun dövlət idarəçiliyi ilə bağlı çox yüksək təcrübəsi var. Hazırda bu vəzifəni şərəflə daşıyır", - deyən deputat Məlahət İbrahimqızı “Ramiz Mehdiyev kimi xəyanətkar Vətən xainləri həm də Azərbaycan xalqı tərəfindən mühakimə olunmalıdır”, - deyə paylaşımlar edir.