Vətəndaşlara qarşı dələduzluq etməkdə təqsirləndirilən "Sahil - S İnşaat" MTK rəhbəri Taley Alaverdiyev və ortağı Pənah Kərimovun cinayət işi üzrə məhkəməsi üç ildir ki, yekunlaşmaq bilmir. Siyaset.info-ya müraciət edən zərər çəkmişlər Bakı Ağır Cinayətlər Məhkəməsinin hakimi Elnur Nuriyevin xüsusən də MTK rəhbəri barəsində hökmü hələ də oxumadığını, prosesi gecikdirdiyini açıqlayıblar. Onların sözlərinə görə, Alaverdiyevin şəriki Pənah Kərimovu ev dustaqlığına buraxan hakim Elnur Nuriyev 3 ildir ki, prosesi başa çatdırmır. Artıq üç ildir ki, iş məhkəmədədir, lakin hökm çıxarılmayıb. Sözügedən şirkətin tikdiyi binadan mənzil alan sakinlər gözləmədədir ki, hökm oxunacaq, T. Alaverdiyev yol verdiyi dələduzluğa, cinayət əməlinə görə layiqli cəzasını alacaq, MTK üzərində səlahiyyətlərinə xitam veriləcək. Amma nədənsə sakinlərin bu çağırışlarına reaksiya verilmir və Ağır Cinayətlər Məhkəməsinin hakimi Elnur Nuriyev son qərarı yubadır. Vətəndaşlar isə tezliklə məhkəmə keçirilməsini və hökm oxumasını istəyirlər. Onlar işin bu qədər uzanmasının əhəmiyyətsiz olduğunu bildirir, T. Alaverdiyevlə P. Kərimovun qanunsuz əməllərinin artıq sübuta yetirildiyini söyləyir, cinayət işi üzrə hər hansı mübahisəli epizod qalmadığını qeyd edirlər. Yəni isbat olunub ki, onlar vətəndaşları aldadıb, bir mənzili bir neçə adama satıb və buna görə də hakim Elnur Nuriyevin hökm oxuması üçün hər hansı problem yoxdur. Vətəndaşlar sual edirlər ki, onların məhkəməsi başlanan tarixdən sonra ayrı-ayrı işlərə də baxılıb, amma çox çəkmədən yekunlaşıb, bəs bu prosesin hökmü hansı səbəbdən gecikir? Hətta qeyd edirlər ki, az qalan Bakıda məhkəməsi gedən erməni hərbi canilərin cinayət işi üzrə nəhəng, çoxepizodlu məhkəmə prosesi də bu gün-sabah yekunlaşacaq, amma iki dələduzun məsələsi uzanmaqdadır. Sakinlər deyirlər ki, hökmün gecikməsi onların işini çətinləşdirir, binanın bir sıra sənədləşmə məsələlərinə əngəl olur, aidiyyatı qurumlardan müvafiq qərarların alınmasına problem yaradır. Onlar Ağır Cinayətlər Məhkəməsinin sədri İsmayıl Xəlilov, Ali Məhkəmənin sədri İnam Kərimov, ədliyyə naziri Fərhad Əhmədov və hakim Elnur Nuriyevdən xahiş edirlər ki, bu işə tezliklə baxılsın, proses sürətləndirilsin, T. Alaverdiyev və P. Kərimov barədə son qərar verilsin, çünki uzatmağın mənası yoxdur: "Burada hər şey aydındır. Zərər çəkənlər dindirilib, ifadələri alınıb, cinayətə yol vermiş şəxslərin əməlləri sübuta yetirilib, hətta biri əsassız yerə ev dustaqlığına buraxılıb, bununla yanaşı, məhkəmə yekunlaşmayıb. Bu prosesdə yüzlərlə cinayət işi materialı, yaxud epizod yoxdur ki, uzansın. Bəlli bir dələduzluq əməlidir, vətəndaşlara zərər vurulub, Bakıda belə MTK sədrlərinin çoxuna hökm oxunub, amma bizim məsələ gecikir. Biz Taley Alaverdiyevə layiqli cəza verilməsini və tezliklə bu hökmün çıxarılmasını, bina üzərində bütün səlahiyyətlərinin əlindən alınmasını istəyirik. Ümid edirik ki, hakim Nuriyev və Ağır Cinayətlər Məhkəməsi səsimizə səs verəcək".
Qeyd edək ki, Baş prokuror yanında Korrupsiyaya qarşı Mübarizə Baş İdarəsində aparılan istintaq-əməliyyat tədbirləri ilə “Sahil-S İnşaat” MTK-nın sədri vəzifəsində işləmiş Alaverdiyev Taley Şamil oğlunun “GG Company” MMC-nin direktoru Kərimov Pənah Sudeib oğlu ilə qabaqcadan əlbir olaraq rəhbərlik etdiyi MTK tərəfindən inşa olunan Bakı şəhəri, Suraxanı rayonu, Yeni Günəşli qəsəbəsi, “A-B” massivində yerləşən yüksək mərtəbəli yaşayış binasında mənzil almaq üçün müraciət edən vətəndaşlara mənzillərin qanuni sahibləri olduğu halda saxta müqavilə və maliyyə arayışları tərtib edib vəzifə saxtakarlığına yol verərək çoxsaylı şəxslərin külli miqdarda pul vəsaitlərini ələ keçirməsinə əsaslı şübhələr müəyyən edilib.
İş üzrə toplanan kifayət qədər sübutlar əsasında Taley Alaverdiyev və Pənah Kərimova Cinayət Məcəlləsinin 178.3.2 (dələduzluq- külli miqdarda ziyan vurmaqla törədildikdə), 308.2 (vəzifə səlahiyyətlərindən sui-istifadə ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham elan edilməklə barələrində məhkəmənin qərarı ilə həbs qətimkan tədbiri seçilib.