Rusiya Təhlükəsizlik Şurası sədrinin müavini Dmitri Medvedevin son açıqlaması diqqət çəkib. O, ABŞ-ın İrana gecə zərbələrindən (22 iyun – red.) sonra bəzi ölkələrin nüvə silahlarını Tehrana təhvil verməyə hazır olduğunu bildirib. ABŞ Prezidenti Donald Tramp isə onun bu açıqlamasına cavab olaraq deyib ki, belə bəyanata ciddi yanaşmaq lazım.
ABŞ Medvedevin bu bəyanatına nə kimi qarşılıq verəcək? Həqiqətən də İrana nüvə başlıqları verilə bilərmi?
Globalinfo.az-a danışan politoloq Natiq Miri bildirib ki, ABŞ Prezidentinin narahatlığı Medvedevin fikirlərinin şəxsi xarakter daşımamasından qaynaqlanır:
“Əks halda, məsələ prezident səviyyəsində gündəmə gətirilməzdi. Medvedev bütün dünyada qeyri-ciddi “siyasi fiqur” kimi qiymətləndirilir. Onların fikrincə, bu açıqlamanın arxasında Rusiya Prezidenti Vladimir Putinin mövqeyi dayanır. Kəşfiyyat əməliyyatları nəticəsində İrana nüvə başlıqları vermək istəyən ölkələrin olub-olmaması araşdırılacaq. Çünki bu, çox məsuliyyətsiz bir addım olar və onun nəticələri təkcə həmin ölkəyə deyil, bütün dünyaya təsir edə bilər.
Rusiya-ABŞ danışıqlarında bu məsələnin müzakirəyə çıxarılması gözləniləndir. Medvedev hansı ölkənin İrana nüvə başlığı verəcəyini hardan bilir? Heç bir ölkə belə məxfi məlumatı onunla bölüşməz. Bu fikirlər, ehtimal ki, Rusiya kəşfiyyat xidmətlərinin məlumatlarına əsaslanır.
Kreml başqa ölkələrin adlarını çəkərək əslində özünü nəzərdə tutur və dünyanı hədələyirsə, bu, ABŞ-Rusiya münasibətlərinə zərbə vurmaqla yanaşı, perspektivdə oxşar təhdidləri Ukraynaya da yönəldə bilər. Avropa İttifaqının üzvü olan və digər bir neçə ölkədə nüvə silahları mövcuddur. Nüvə başlıqları Ukraynaya da asanlıqla ötürülə bilər. Zaman-zaman Rusiya Ukraynanı taktiki nüvə silahı ilə hədələyib.
Gələcəkdə nüvə müharibəsi ehtimalını nəzərə alaraq, ABŞ prezidenti məsələyə həssas yanaşır. Bu fikirlərin səsləndirilməsinin səbəbləri aydınlaşdırılacaq”.
Politoloqun sözlərinə görə, İrana nüvə başlıqlarının verilməsi məsuliyyətsiz addım olardı:
“Rusiyaya məxsus ballistik raketlərin rəsmi şəkildə Tehrana verilməsi belə gözlənilmir. İranda sözügedən raketlər mövcuddur. Hazırda heç bir ölkə, xüsusilə Rusiya və Çin, ABŞ-ı qarşısına almaq istəməz. İran üçün kimsə özünü fəda etməz. İran xarici işlər naziri Abbas Araqçinin Rusiyaya son səfəri də göstərdi ki, Rusiya yalnız quru bəyanatlar verməklə kifayətlənir.
Şimali Koreya məsuliyyətsiz davranaraq İrana nüvə başlıqları verə bilər, amma bunun doğuracağı nəticələri də əvvəlcədən hesablamalıdır. Əgər İsraildə nüvə silahı partlayarsa, bu gələcəkdə həm Rusiya, həm də Şimali Koreyanın oxşar vəziyyətlə üzləşəcəyinin göstəricisi olacaq. Nüvə başlıqları qeyri-nüvə ölkələrinə rahatlıqla ötürülürsə və kütləvi qırğın üçün şərait yaradılırsa, digər qlobal güclər də eyni addımı ata bilərlər”.
