9 yaşlı uşağa qarşı seksual xarakterli zorakılıq hərəkətləri edən 14 yaşlı şəxs cəzadan azad olunub. Onun barəsində məcburi müalicə təyin edilib.

Musavat.com xəbər verir ki, dəhşətli hadisə 2023-cü ilin sonlarında İsmayıllı rayonunun kəndlərindən birində baş verib.

2009-cu il təvəllüdlü oğlan həmkəndlisi 2014-cü il təvəllüdlü uşağa qarşı seksual xarakterli zorakılıq hərəkətləri edib.

İstintaq zamanı müəyyən edilib ki, 2014-cü il təvəllüdlü uşaq siqaret çəkirmiş. Bunu bilən 2009-cu il təvəllüdlü Ülvi (ad şərtidir) uşağı şantaj edib. Uşağa onun istədiklərini etməyəcəyi təqdirdə siqaret çəkməsini atasına deyəcəyini bildirib. Uşaq qorxub qaçmaq istəyəndə isə onu idman fəndi ilə yerə yıxaraq heç kimin olmadığı ərazidə uşağa qarşı seksual xarakterli zorakılıq hərəkətləri edib.

Məhkəmə araşdırması zamanı barəsində tibbi xarakterli məcburi tədbirlərin tətbiq edilməsi barədə iş üzrə icraat aparılan və yetkinlik yaşına çatmayan Ülvi məhkəmənin qərarı ilə cinayət-prosessual fəaliyyəti olmayan hesab edildiyindən məhkəmə istintaqı zamanı dindirilməyib. Onun ibtidai istintaq zamanı müdafiəçinin iştirakı ilə təqsirləndirilən şəxs qismində dindirilərkən verdiyi ifadələri elan olunaraq tədqiq olunub.

Ülvi həmin ifadəsində əməlini etiraf edib. Deyib ki, 2014-cü il təvəllüdlü uşağı aldadaraq dağlıq əraziyə aparıbmış. Ülvi bu hərəkəti etdikdən sonra uşağın ağladığını, özünün isə kəndə qayıdaraq uşaqlarla futbol oynadığını deyib.

Təqsirləndirilən Ülvinin anası qanuni nümayəndə kimi dindirilən zaman bildirib ki, oğlu 8 yaşında hamamda yıxılan zaman başından ağır xəsarət alıb. Bundan sonra onda psixi problemlər yaranmağa başlayıb.

“Bəzən evdən gedirdi. Bir neçə gün sonra gəlirdi. Bizim nəslimizdə irsi olaraq psixi problemləri olan şəxslər olub. Oğlumun bu hərəkəti necə etdiyini bilmirəm. Mən hadisənin axşamı günü bundan xəbər tutdum. Məni polisə çağırdılar. Oğlum Məştağada da müalicə alıb”- deyə Ülvinin anası bildirib.

Məhkəmə araşdırması zamanı zərəçəkmiş şəxs başına gələnləri danışıb. O qeyd edib ki, hadisədən sonra baş verənləri ilk dəfə anasına danışıb. Anası da bu barədə polisə məlumat verib.

Ekspertiza zamanı təqsirləndirilən Ülvidə yüngül dərəcəli kəmağıllıq, qulluq və müalicə tələb edən ciddi davranış pozuntusu aşkar edilib. Onun xroniki psixi patologiyadan əziyyət çəkdiyi müəyyən edilib. Buna görə də onun barəsində ixtisaslaşdırılmış psixiatriya stasionarında məcburi müalicə şəklində tibbi xarakterli məcburi tədbirlərin tətbiq edilməsi məsləhət görülüb.

Şəki Ağır Cinayətlər Məhkəməsinin qərarı ilə Ülvinin cinayət məsuliyyətinə səbəb olan əməli anlaqsız vəziyyətdə törətməsi sübuta yetirilib. O, cinayət məsuliyyətindən və cəzadan azad edilib. Onun barəsində məcburi müalicə təyin edilib. Qərarın icrası 1 nömrəli Respublika Psixiatriya Xəstəxanasına tapşırılıb.