Yanvarın 6-da Azərbaycan Respublikasının Prezidenti İlham Əliyev Aktauda qəzaya uğrayan AZAL-a məxsus “Embraer 190” sərnişin təyyarəsinin həlak olan ekipaj heyətinin ailə üzvləri və qəza zamanı sağ qalan təyyarə bələdçiləri ilə görüşüb. Prezidentin görüş zamanı çıxışı bir çox baxımdan diqqət çəkib.
Ölkə başçısı bir daha bildirdi ki, təyyarə qəzasına görə məsuliyyət Rusiya hakimiyyət rəsmilərinin üzərindədir. Moskvanın isə hələ də bu ittihamlara rəsmi və ətraflı şəkildə cavab verməməsi diqqət çəkir. Rusiya Prezidenti Vladimir Putinin timsalında üzrxahlıq edilsə də, günahkarların məsuliyyətə cəlb olunması və kompensasiyanın ödənilməsi ilə bağlı hər hansı məlumat yoxdur.
Bakı təzyiqi artırdıqca, Moskva hansı mövqeyi tutacaq? Təyyarənin “qara qutusun”dakı məlumatlar açıqlandıqdan sonra da Rusiyanın susqunluğu, məsuliyyətdən yayınması mümkün olacaqmı?
Globalinfo.az-a danışan deputat Elçin Mirzəbəyli deyib ki, “qara qutu” ilə bağlı məlumatlar, artıq Qazaxıstanın istintaq orqanlarına təqdim olunub:
“Düşünürəm ki, Azərbaycan təyyarəsinin Rusiyanın hava məkanında vurulması ilə bağlı bütün məqamlar, hadisənin baş verdiyi ilk gündən ən qaranlıq nüanslarına kimi dövlət başçısına bəllidir. “Qara qutu”nun açılması nəticəsində əldə olunan təfərrütlar, sadəcə daha öncə bəlli olan məlumatları təsdiqləyib. Həmçinin insanlıq adına ləkə olacaq başqa məqamları da ortaya çıxara bilər. Şübhəsiz ki, Rusiya tərəfi də elə ilk gündən Azərbaycan təyyarəsinin vurulması ilə bağlı bütün məqamlar barədə məlumatlıdır və şimal qonşumuzun bəzi media resurslarında hələ də qarıldamağa davam edən “fəlakət qarğaları”nın canfəşanlığı, ənənəvi yalanlarını daha mübaliğəli şəkildə təqdim etməyə çalışmaları da bunu sübuta yetirir.
Onu da qeyd edim ki, Rusiyanın, tərəfdaş və müttəfiq münasibətlərdə olduğu ölkələrlə vaxtaşırı yaşadığı problemlərin müəyyən bir qismi səltənətçilik (velikoderjava) ədası ilə əlaqəlidirsə, əhəmiyyətli hissəsi, erməni diasporunun fitnəkar təmsilçilərinin və onların yemlədikləri “fəlakət qarğaları” ilə – boşboğaz propoqandaçılarla bağlıdır.
Deputatın sözlərinə görə, Rusiya tərəfi dolayısıyla istintaq başa çatdıqdan sonra məsələyə yekun münasibət bildirəcəyini açıqlayıb:
“Qara qutu” açıldığı və daha öncə də qeyd etdiyim kimi, hadisənin təfərrüatları bəlli olduğu üçün, zənnimcə, rəsmi Moskva, ilk növbədə “fəlakət qarğaları”nın ağzını yummalıdır. Daha sonra isə həm rəsmi şəkildə üzr istəməli, təzminat ödəməli, həm də təyyarənin vurulmasında, enişinə icazə verilməməsində, cinayətin gizlədilməsinə cəhd göstərilməsində iştirak edənləri məsuliyyətə cəlb etməlidir”.
