XİDMƏT RƏİSİ FAŞİST KALONİYASI SAXLAYIR?
DİA.AZ: - Azərbaycanın istintaq təcridxanaları və cəza çəkmə müəsissələri Adolf Hitlerin faşist düşərgələrin xatırladır. Ümumiyyətlə son zamanlar, xüsusilə istintaq təcridxanalarında və cəza cəkmə müəsissələrində məhkumlara qarşı edilən işgəncələrlə bağlı ölkə mediasında dəfələrlə yazılıb. Amma nə faydası. Baxmayaraq ki, son zamanlar Ədliyyə Nazirliyinin Pentensiar Xidmətində aparılan islahatlara, sözü gedən qurumun əməkdaşları tərəfindən məhkumlara qarşı vəhşiliklər yenə də davam edir. Həmin vəhşiliklərin qurbanı olan Ramazanov Rasim Cuma oğlu tərəfindən tük ürpədəcək müraciət daxil olub. DİA.AZ bildirir ki, bu barədə "azerinews.org" portalı xəbər yayıb.
14.03.1983-cü il təvəllüdlü, Bakının Binəqədi rayonu, Biləcəri qəsəbəsi, yeni yaşayış massivi, döngə 1, ev 47-də yaşayan, Binəqədi Rayon Məhkəməsinin 25.08.2009-cu il tarixdə barəsində qəti həbs imkan tədbiri seçilmiş sonra Bakı Ağır Cinayətlərə Dair Məhkəməsinin 06.04.2011-ci il hökümunə əsasən 6 il müddətinə azadlıqdan məhrum edilmiş və 11.07.2011-ci il tarixdə Bakı Apelliyasiya Məhkəməsinin qərarı ilə cəzası 5 ilə endirilmiş Ramazanov Rasim Cuma oğlu iddia edir ki, 3 saylı İstintaq Təcridxanasında saxlanıldığı müddət ərzində təcridxananın rəis vəzifəsini müvəqqəti icra edən Əli Süleymanov və onun müavini Ağaməmməd Məmmədov tərəfindən xüsusi amansızlıqla fiziki zorakılığa məruz qalıb. Rasim Ramazanovun təcridxanadan yazdığı dəhşət doğurası şikayət məktubunu oxucuların diqqətinə olduğu kimi çatdırırıq:
"Yazıb sizə bildirirəm ki, fiziki cəhətdən tam sağlam vəziyyətdə məhkum olunmuşam. Ədliyyə Nazirliyinin 3 saylı İstintaq Təcridxanasında saxlanıldığım vaxt mənə qarşı Azərbaycan Respublikasının Cinayət Məsəlləsinin 126.2.1, 126.2.2, 126.4.1, 27.2.1, 127.2.3, 221.3.3 və 315.2 maddələri ilə irəli sürülmüş ittihamlara etiraz olaraq aclıq aksiyasına başlamışam. Hətta buna görə ağzımı da tikmişəm. Bu səbəbdən də təcridxananın rəis vəzifəsini müvəqqəti icra edən Əli Süleymanov və onun müavini Ağaməmməd Məmmədov mənə hədə-qorxular gələrək aksiyanı dayandırmağı tələb edirdilər. Amma mən rəisin və müavinin bu hədələrinə məhəl qoymayaraq etriraz aksiyamı davam etdirirdim. Elə bu səbəbdən də bir neçə gün sonra onların qəzəbinə gəldim. 3 saylı İstintaq Təcridxanasının müvəqqəti rəisi Əli Süleymanovun və onun müavini Ağaməmməd Məmmədovun göstərişi ilə məni İsa peyğəmbər kimi çarmıxa çəkdilər. İki gün ərzində çarmıxda məni saxlayaraq təcridxanada saxlanılan digər məhkumlara məni göstərirdilər ki, sözə qulaq asmayanları bu cür aqibət gözləyəcək. Çarmıxdan çıxarılandan sonra məni bir həftə xlorlu suyun içinə atdılar ki, etiraz aksiyamı dayandırım. Amma yenə də mənə qarşı irəli sürülmüş itihamlara görə etirazımı davam etdirirdim. Bundan sonra rəis əvəzi və müavin daha da azğınlaşaraq mənə qarşı, xüsusi amansızlıqla fiziki zorakılığa başladılar. Onların tapşırığı ilə Pentensiar Xidmətin işçiləri tərəfindən gündəlik döyülürdüm, söyülürdüm, təhqir olunurdum və alçaldılırdım. Sonuncu dəfə, daha dəqiq 23.02.2010-cu il tarixdə qollarıma qandal vuraraq məni rəisin otağına apardılar. Otaqda Əli Süleymanovla onun müavini Ağaməmməd Məmmədov əyləşmişdilər. Onların hər ikisi mənə qarşı inasni dəyərlərdən uzaq zorakılıq göstərmək istədilər. Artıq onların bu vəhşiliklərinə dözə bilməyib özümü rəisin otağındakı pəncərədən yerə tulladım. Hündür yerdən yerə yıxılarkən onurğa sümüyümü sındırdım. Əli Sülüymanovun və Ağaməmməd Məmmədovun vəhşilikləri barədə Daxil İşlər Nazirliyinə, Baş Prokurorluğa və Milli Təhlükəsizlik Nazirliyinə şikayət məktubu ünvanladım. İntihara cəhd hadisəsinə görə, rəis müavini Ağaməmməd Məmmədova Xəzər Rayon Prokurorluğunda cinayət işi qaldırıldı. Lakin Ağaməmməd Məmmədov görünür külli miqdarda pul müqabilində cinayət işini ört-basdır etməyə müvəffəq oldu. O hal hazırda da vəzifəsində çalışır və özünün vəhşiliklərini Əli Süleymanovla bərabər digər məhkumlara qarşı davam etdirir. Bundan sonra məni məhkəməyə bir neçə ay xərəkdə gətirib apardılar. İş aldıqdan sonra məni 13 saylı Cəza Çəkmə Müəsissəsinə göndərdilər. Hal hazırda yataq xəstəsiyəm. Burda tibbi personalın və müalicə üçün şəraitin olmadığına görə günü-gündən səhhətim daha da ağırlaşır. Normal cəmiyyətə qovuşmaq arzusu ilə insan layəqəti alçaldılan zülümlərə dözə-dözə cəzamın 3-də 2-sinidən çoxunu çəkmişəm.
Nəhayət bütün bu baş verənlərdən sonra mənim yanıma Elçin Behbudov və müxtəlif şəxslər gələrək ürək-dirək verdilər ki, cəzamın 3-də 2-sındən çoxunu çəkdiyim üçün onlar mənim azadlığa çıxmağıma kömək edəcəklər. Müalicə almaq, əvvəlki sağlamlığımı bərpa edib normal cəmiyyətə qovuşmaq və azadlığa çıxıb cəmiyyətimiz arasında düzgün yola qaytdığımı subut etməyə hazır olduğumu onlara bildirdim. Elə bu səbəbdən də cəza çəkmə müəsissəsinin barəmdə verdiyi yüksək xarakterizə ilə mənim müraciətim əsasında Qaradağ Rayon Məhkəməsi məni Məntəqə Tipli Cəca Çəkmə Müəsissəinə keçirilməyimlə əlaqədar 31.01.2013-cü il tarixdə qarar çıxardı. Qərarın icrası barədə nəzərdə tutulmuş 20 gün müddət ərzində gözlədiyim vaxt həmin məhkəmə prosesində iştirak etmiş dövlət ittihamçısı, prokuror Şöhrət Əhmədov tərəfindən verilmiş 15.02.2013-cü il tarixli apelliyasiya protesti əsasında qərarın icrası dayandırılmışdı. Prokuror buna səbəb məni ictimai xarakterli cinayət törətdiyimi göstərib. Lakin dövlət ittihamçısı artıq mənim yataq xəstəsi və əlil arabasında gəzdiyimi unudub. Əlil arabasında gəzdiyim halda mən başa düşə bilmirəm ki, bundan sonra mən hansı ictimai təhlükə törədə bilərəm.
Bu son günlərdə isə mənə aydın oldu ki, prokurorun apelliyasiya protestinə səbəb Ağaməmməd Məmmədov olub. Məni ömürlük şikəst edən Ağaməmməd Məmmədov çalışır ki, mən burda ölüm və azadlığa çıxa bilməyim. Çünki Əli Süleymanov və Ağaməmməd Məmmədov barəsində müvafiq instansiyalara şikayət etməyimi onlar həzm edə bilmirlər. Elə bu baxımdan da adlarını çəkdiyim hər iki şəxs ciddi cəhdlə mənim azadlığa çıxmağımın qarşısın alırlar. Ağaməmməd Məmmədovun Baş Prokurorluğda çalışan oğlu isə bunların arxasında dayanır. Hətta mənə ismarıcla özlərinin yeni hədə-qorxularını çatdırırlar ki, ağıllı olum. Onların törətdikləri vəhşiliklər barəsində müvafiq instansiyalara şikayət etməyim. Əks halda isə mənim cəza çəkdiyim müəsissədə üzərimdən narkotik vasitələrin tapılaraq cəzamı artıracaqları ilə hədələyirlər. Lakin artıq mənim itirəcək nəsə bir halım qalmayıb. Atam-anam çöxdandır ki, dünyaların dəyişiblər. Özüm ömürlük şikəst olmuşam. Əgər azadlığa çıxaramsa hər hansı ictimai təhlükə törətmək belə iqtidarında deyiləm. Ümidim yalnız Allaha və dövlət başçısı İlham Əliyevədir. Sizi and verirəm Allaha cənab prezident mənim azadlığa çıxmağıma kömək edin. Cənab prezident əgər inanırsınızsa mənə söz verirəm ki, mən hər hansı bir ictimai təhlükə törətmək iqtidarında deyiləm. Sizdən yalnız kömək istəyirəm cənab prezident qoymayın məni yuxarıda adların çəkdiyim şəxslər öldürsünlər".
Qeyd edək ki, özəl mənbələrdən əldə etdiyimiz məlumatlara görə, uzun illər Ədliyyə Nazirliyinin Pentensiar Xidmətində çalışan Ağaməmməd Məmmədov məhkumlara arasında qəddarlığı ilə ad çıxarıb. Deyilənlərə görə, Ağaməmməd Məmmədovun məhkumlara verdiyi işgəncələrdən bir çoxları dünyasını dəyişib. Lakin bunlara baxmayaraq hənsısa səbəblərdən ona gözün üstə qaşın var deyən tapılmır.
Mövzunu davam etdirəcəyik. Qarşı tərəfin də mövqeyini dərc etməyə hazırıq.
