Xalq artisti Naibə Allahverdiyeva "Bir gün" verilişində qardaşı Arifin vəfatından danışıb.

Axşam.az xəbər verir ki, aktrisa bildirib ki, qardaşının xanımı bu barədə onlara məlumat verməyib:

"Çox ağırdır. Üstəlik bilmədiyim bir anda bunu mənə xəbər verdilər. Heç bir qohumumun bundan məlumatı yox idi. O, rus xanımla evlənmişdi. 20 yaşı olandan Rusiyada yaşayırdı. Əlaqələrimiz var idi, zəngləşirdik. O xanım bizə qarşı bir az qısqanc idi. Həmişə düşünürdü ki, biz qardaşımı Azərbaycana qaytara bilərik, burada bir xanılmla evləndirərik. Hətta qardaşım bizi qucaqlayıb öpəndə xanımı gedib otaqda ağlayırdı ki, onları məndən daha çox istəyirsən. Həyatdır, ağır zərbə oldu. Yasında iştirak edə bilmədim, çünki xəbərim yox idi. Televiziyada olanda qardaşımın Rusiyada yaşayan dostu məlumat göndərdi. Sözün düzü inanmadım. Mənim başqa qardaşım da Rusiyada yaşayır. O da xəstədir. Allah ona can sağlığı versin. Şoka düşdüm. Maşında yarım saat oturub qışqırdım. Qəbul edə bilmirdim. Fikirləşirdim ki, o xəstə olanda yoldaşı mənə niyə deməyib. Elə xəbərsiz dəfn edib. Son iki-üç gündür mənə zəng vurur, telefonlarını açmıram. Gözləyirəm ki, özüm Rusiyaya gedim. Dostu dedi ki, qardaşımı müsəlman qaydalarına uyğun dəfn ediblər. Qəbir üstünə getməliyəm. Xanımı bizə xəbər verməmişdi ki, onu orada dəfn etsin. Düşünüb ki, gətirib burada dəfn edəcəklər. Dostu bizə zəng vurmalı olduğunu deyəndə, söyləyib ki, "lazım deyil, heç kimə deməyin". Həmin dostu məni canlı yayımda görüb düşünüb ki, demək lazımdır. Mən zəng vuranda xanımı deyirdi, ya Arif xəstədir, ya yoxdur, ya da işdədir. Hər şeyi başa düşürəm.

Üç gün telefonu söndürdüm, ancaq ağladım. Heç kimlə danışmaq istəmirdim. Şoka düşəndə sönüb qalıram. Elə dəhşətli ağlamaq idi ki... Çox ağır dərdir. Bunu heç kimə yaşatmaq olmaz. Nə qədər ürəyi daş olasan ki, sənin qardaşın ölə, bunu gizlədəsən, qoymayasan ki, zəng edib xəbər verələr. Qardaşımın biri Tbilisdə, bacım Türkiyədədir. Onlar da, qohumlarımız da televizyadan bunu öyrəndik ki, qardaşım rəhmətə gedib. Xanımı heç kimə bunu bildirməmişdi".

Qeyd edək ki, N.Allahverdiyeva qardaşının vəfat etdiyini “Elgizlə izlə” verilişində olarkən eşidib.