Salyan rayonu, İkinci Varlı kənd sakini Məmiyev Hidayət Arif oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Cəlilabad Rayon Mərkəzi Xəstəxanasının həkimləri onkoloji xəstə olan həyat yoldaşına qarşı haqsızlıq edirlər:

“Mən, Məmiyev Hidayət Arif oğlu, yazaraq xahiş edirəm ki, problemimi işıqlandırasınız.

2024-cü ildə həyat yoldaşım Məmiyeva Gültəkin Qabil qızını güclü qanaxma ilə xəstəxanaya apardım. Şirvan Mərkəzi Xəstəxanasında Kolonoskopiya etdikdən sonra bağırsaqda şiş olduğu aşkarlandı. Bizi Bakı şəhəri M.A.Topcubaşov adına xəstəxanaya göndərdilər. Orada da yernidən Kolonoskopiya etdilər. Daha sonra biopsiya analizi götürdülər və bizi Milli Onkologiya Mərkəzinə göndərdilər. Burada həyat yoldaşım 4 dəfə kimyaterapiya olundu. 26 gün şüa verdilər. 3 aydan sonra isə əməliyyat edib, şişi götürdülər.

2025-ci ildə isə 2-ci dəfə əməliyyat edərək, bağırsaqları yerinə tikdilər. Orada bizə bəzi sənədlər verdilər ki, bunu Salyan Rayon Mərkəzi Xəstəxanasına təqdim edin, xəstəyə əlillik dərəcəsi müəyyən etsinlər.

Xəstəxanaya sənədləri təqdim etdikdən sonra bizi Cəlilabad Rayon Mərkəzi Xəstəxanasına göndərdilər. Bildirdilər ki, sənədləriniz sistemə vurulacaq.

2025-ci ilin fevral ayında vurmalı idilər. Həmin hadisədən 8 ay keçməsinə baxmayaraq, hələ də xəstəxana sənədləri sistemə vurmayıb. Xəstəxanadan deyirlər ki, problemi TƏBİB yaradır, xəstənin məlumatlarını sistemə vurmur.

Bir müddət sonra zəng vurub Cəlilabad Rayon Mərkəzi Xəstəxanasına çağırdılar. Bildirdilər ki, xəstə yenidən müayinə olunmalıdır. Xəstə də ikinci dəfə əməliyyat olunduğu üçün o müayinəni etmək olmaz. 7 ay gecikdirdilər ki, əlillik təyin edilməsin.

Yoldaşım ağır onkoloji xəstədir, müalicələri olduqca bahadır. Özüm şəkər xəstəsiyəm. Belə bir haqsızlıqla qarşılaşmışıq”.