Son aylarda paytaxt sakinləri küçə itlərinin çoxalmasından ciddi narazılıq edirlər. “Bakını it basıb” ifadəsi sosial şəbəkələrdə ən çox işlədilən ifadələrdən birinə çevrilib. Şəhərin demək olar ki, bütün ərazilərində parklarda, yaşayış massivlərində, məktəb yaxınlıqlarında sərbəst gəzən itlər insanların gündəlik həyatına təhlükə yaradır. Sakinlər bildirirlər ki, səhər və axşam saatlarında küçəyə çıxmaq, xüsusilə də uşaqları məktəbə aparmaq çətinləşib.
Son günlər bir neçə fərqli ərazidə insanların küçə itləri tərəfindən dişlənməsi xəbərləri yayılıb. Həkimlər bildirirlər ki, quduzluq riski hələ də qalır və bu, yalnız bir səhiyyə məsələsi deyil, həm də ictimai təhlükəsizlik problemidir.
Sakinlər deyirlər ki, bələdiyyələr və aidiyyəti qurumlar məsələyə laqeyd yanaşır, itlər sadəcə bir yerə yığılır, amma köklü həll yoxdur. Küçə heyvanlarının çoxalması ilə bağlı məsələ illərdir mübahisə mövzusudur. Bir tərəf itlərin məhv edilməsinə qarşı çıxır, digər tərəf isə insan təhlükəsizliyini əsas gətirir.
Ekspertlər hesab edirlər ki, balanslı yanaşma vacibdir. Mələsən, küçə itləri üçün xüsusi sığınacaqlar yaradılmalı, sterilizasiya və peyvənd proqramları genişləndirilməli, itlərin sahibləri məsuliyyətli davranmalı, aband edilmiş heyvanlarla bağlı cərimələr tətbiq olunmalıdır. Əks halda, nə heyvanlar qorunur, nə də insanlar özlərini təhlükəsiz hiss edir.
Avropa ölkələrində oxşar problemlər qeyri-zərərli idarəetmə sistemi ilə həll edilir: küçə itləri tutulur, müayinədən keçirilir, peyvəndlənir və yalnız təhlükəsiz hesab edilərsə geri qaytarılır. Azərbaycanda isə bu sistem tam şəkildə tətbiq olunmur.
Heyvansevərlər bildirirlər ki, çox vaxt sığınacaq adı altında itlərin məhv edilməsi halları baş verir. Bu isə cəmiyyətdə etimadsızlıq yaradır.
“Bakını it basıb” ifadəsi artıq sadəcə şikayət deyil, ciddi sosial siqnaldır. İtlərin çoxalması təkcə küçə mənzərəsini deyil, insanların psixoloji rahatlığını da pozur. Əgər bu problem sistemli şəkildə həll olunmasa, nə vətəndaşın təhlükəsizliyi, nə də heyvanların rifahı təmin ediləcək.
Bizimyol.info
