“Hörmətli Zakir Həsənov!

Hörmətli Anar Əliyev!

Mən, Tağıyev Ağalar Həsən oğlu, yazaraq sizdən xahiş edirəm ki, şikayətimi cavabsız oymayasınız.

Bildirim ki, oğlum Tağıyev Həsən Ağalar oğlu 2023-cü ildə Cəmşid Naxçıvanski adına Hərbi Akademiyaya qəbul olmaq üçün sənədlərini hazırladı. Oradan uşağı “Papanin” Hospitalına göndərdilər. Xəstəxanada oğluma baxdıqdan sonra dedilər ki, bu uşaq heç hərbi xidmətə də gedə bilməz, hərbiyə yararsızdır.

Təəssüflə evimizə qayıtdıq.

2025-ci ilin may ayında oğlumu Samux Rayon Hərbi Komisarlığına çağırdılar. Mən də sənədləri aparıb verdim ki, uşaq hərbiyə gedə bilməz, yararsızdır. Komissarlıq yoxlanış üçün bizi Bakı şəhərinə - Əlillərin Bərpa Mərkəzinə göndərdi.

Biz Mərkəzə getdik və burada məndən rüşvət istədilər. Dedilər ki, “pul ver, istədiyini yazım”. Doğrusu, mən uşağın əsgərlikdən qalmasını, hərbiyə yararsız olmasını istəmirəm. Uşaq Akademiyaya hazırlaşırdı. Amma heç nə vermədim. Orda da bildirdim ki, yoxlamada nə yazmısınız, onu bildirin.

Başa düşə bilmirəm, bu həkimlər eyni kitabı oxumayıb, eyni təlimi keçməyib? Niyə uşağın həyatı ilə oynayırlar?

Utanmaz-utanmaz mənə deyirlər ki, “biz nə yazsaq, odur, pul ver uşağını xəstə yazaq”.

Uşağın ayağındakı problem artıq üzə verib. Ayağının biri digərindən gödəkdir. Ayağının altı isə düzdür. Belə adamı necə əsgər apara bilərlər? Əgər aparırlarsa, bəs onda niyə Akedemiyaya girişinə icazə vermədilər.

Cənab Zakir Həsənov!

Cənab Anar Əliyev!

Xahiş edirəm, səlahiyyətli qurumlara göstəriş verin, bu haqsızlıqlara son qoyulsun. Savadsız həkimləri uzaqlaşdırın. Bir həkimin yazdığı ilə o biri üst-üstə düşmür.

Mən xəstə uşağı hərbi xidmətə göndərim, sonra daha ağır vəziyyətdə üstümə qayıtmağını gözləyim?!