Bərdə şəhəri, Gəncə küçəsi, ev 24-də yaşayan İsmayılova Fəridə Ələsgər qızı tərəfindən Hurriyyet.az saytının redaksiyasına şikayət məktubu daxil olub. Şikayətçi Əmək və Əhalinin Sosial Müdafiəsi Nazirliyindən narazıdır:

“Mən, İsmayılova Fəridə Ələsgər qızı, 02.10.1967-ci ildən Bərdə şəhəri, Gəncə küçəsi, ev 24-də yaşayıram. 1983-cü ilə kimi sümük iflici xəstəliyi səbəbindən hər iki ayağımdan 8 dəfə əməliyyat keçirmişəm. Səhhətimdəki ağır vəziyyətlə bağlı orta məktəbə belə, gedə bilməmişəm.

1983-cü ildə həkimlərin mənə qoyduğu ağır diaqnozlar səbəbindən ömürlük 1-ci qrup əlillik təyin edilib. Dəfələrlə Bakı şəhərində yerləşən "Azərbaycan Elmi Tədqiqat Travmatologiya və Ortapediya İnstitu" publik hüquqi şəxs adlı yerdə müayinə və müalicələr almışam, hər dəfə həkimlər mənim xəstəliyimin sağalmaz olduğunu bildiriblər.

2017-ci ildə yenidən müayinə olundum, ancaq yenə səhhətimdə heç bir irəlləyiş olmadığı bildirildi. Yenidən 1-ci qrup əlilliyim öz təsdiqini tapdı.

Onu da deyim ki, ayaqlarımda güclü ağrılar səbəbindən ildə bir dəfə cənab Prezident tərəfindən bizə yardımlar ayrılırdı. Sonradan heç bir yoxlanışa dəvət etmədən, mənim əlilliyimi 2-ci qrupla dəyişdirdilər.

Qardaşım mənim etibarnaməm əsasında Bərdədə fəaliyyət göstərən DOST Mərkəzinə yaxınlaşdı və problemi qeyd etdi. Lakin DOST Mərkəzindən bildirdilər ki, sizin əlilliyiniz sistemdə 2-ci qrup qeyd olunub, heç bir köməklik göstərə bilmərik. Qardaşım Etiraz edərək bildirib ki, bu, necə ola bilər axı, biz hər ay dövlətimiz tərəfindən bacıma verilən prezident təqaüdü də daxil olmaqla, 1-ci qrup əlil kimi hər ay 470 manat pul alır. Digər bacım İsmayılova Kəmalə Ələsgər qızı da dövlət tərəfindən ona baxması üçün 100 manat alır.

DOST Mərkəzindən bildiriblər ki, bu, bizlik deyil, Əmək və Əhalinin Sosial Müdafiəsi Nazirliyinə müraciət edin. Bundan sonra biz aidiyyəti üzrə Əmək və Əhalinin Sosial Müdafiəsi Nazirliyinə müraciət etdik. Bir neçə müddətdən sonra bizə məktub göndərdilər ki, bu dəfə 3-cü qrup təyin edilib.

Biz yenidən etiraz edərək, nazirliyə müraciət etdik. Bizi Mingəçevir Şəhərində yerləşən Qarabağ Regional Tibbi Sosial Ekspert Komissiyasına yönləndirdilər. Burada da 9 nəfər komissiya üzvünün əyani müayinəsi keçirildi. Yeni sənədlərdə qeyd etdilər ki, İsmayılova Fəridə Ələsgər qızının ayaqlarındakı problem həqiqətən ciddidir və bu adama baxan lazımdır. Bizə bildirdilər ki, bütün sənədləri Bakıya - Əmək və Əhalinin Sosial Müdafiəsi Nazirliyinə göndərəcəyik.

Bir beçə ay keçdi, heç bir şey dəyişmədi, 3-cü qrup olaraq qaldı. Biz məcbur qalıb cənab Prezidentə, Mehriban xanıma, Baş nazirə, Milli Məclisin sədrinə və Ombudsmana onlarla şikayət məktubları göndərdik. Lakin bizimlə heç kim maraqlanmadı. Sadəcə, məktublar gəldi ki, baxılması üçün Əmək və Əhalinin Sosial Müdafiəsi Nazirliyinə göndərilib. Hələ neçə aylardır bu nazirlikdən xəbər yoxdur.

Prezident Adminstrasiyasının 1111 qaynar xəttinə də məlumat vermişik. Bildirdilər ki, sizin cənab Prezidentə ünvanladığınız teleqram nazirliyə yönləndirilib. Biz yenə etiraz etdik ki, axı, bu nazirlik maraqlanmır, niyə yönləndirirsiniz?! Bildirdilər ki, bizim səlahiyyətimiz yoxdur, nazirliyə yenidən müraciət edin.

Artıq bir neçə aydır ayaqlarımda güclü ağrılar başlayıb. Bakıda həkimlə danışdıq, təcili müalicə olunmalıyam. İmkanımız da yoxdur. Ayrı heç bir yerdən gəlirimiz yoxdur. Gözümüzü tikdiyimiz 1-ci qrup əlillik pulu idi, onu da kəsib 3-cu qrup etdilər. Qalmışıq çıxılmaz vəziyyətdə. Heç kim bizim şikayətimizə baxmır.

Sizdən artıq dərəcədə xahiş edirik ki, bizim səsimizi cənab Prezidentə və aidiyyəti dövlət qurumlarına çatdırasınız. Bilmək istəyirik ki, 40 ildən çox 1-ci qrup əlillik pensiyası aldığım halda, nəyə əsasən heç bir səbəb və müayinə etmədən kəsiblər?!"

Məsələ ilə bağlı Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyi ilə əlaqə saxladıq. Agentlikdən bildirdilər ki, Bərdə şəhər sakini, 1967-ci il təvəllüdlü İsmayılova Fəridə Ələsgər qızı 04.12.2024-cü il tarixdə Dövlət Tibbi-Sosial Ekspertiza və Reabilitasiya Agentliyində əyani müayinə edilib:

"Vətəndaşın müayinə nəticələrinə əsasən, qanunvericiliyə uyğun olaraq onun hazırki sağlamlıq vəziyyətinin üçüncü dərəcə müddətsiz əlillik təyinatına əsas verməsi barədə qərar qəbul edilib.

Növbəti dəfə, 21.06.2025-ci il tarixdə Fəridə İsmayılovanın əlilliyinin qiymətləndirilməsi ilə bağlı tibb müəssisəsi tərəfindən yeni forma-88 sənədi rəsmiləşdirilib. Qiymətləndirilmə nəticəsində vətəndaşın əlilliyi ilə bağlı əvvəlki qərar qüvvədə saxlanılıb".