Ermənistanın Konstitusiya Məhkəməsi yeddi siyasi qüvvənin şikayətlərini birləşdirib.

İyunun 26-da müxalifətin məhkəmə qərəzliliyi ilə bağlı iddialarına əsasən 2026-cı il parlament seçkilərinin nəticələrinə etiraz işi üzrə şifahi dinləmələrə başlanılacaq.

Ali Məhkəmə instansiyası iyunun 21-də keçirilən iclasında “Güclü Ermənistan”, “Ermənistan” bloklarının, eləcə də “Çiçəklənən Ermənistan”, “Birlik Qanadları”, “Demokratiya, Hüquq, İntizam”, “Respublika Uğrunda Demokratiya Müdafiəçiləri Alyansı” və “Yeni Qüvvə” partiyalarının iddialarını icraata qəbul edib. Müxalifət qüvvələri iyunun 7-də keçirilmiş parlament seçkilərinin Mərkəzi Seçki Komissiyası tərəfindən iyunun 14-də elan edilmiş yekun nəticələrinə etiraz edirlər.

Adları çəkilən 7 siyasi blok və partiya səsvermənin yenidən sayılmış nəticələrini qəbul etmir.

Ona görə də müxalifət ya səsvermənin ikinci turunun keçirilməsini, ya da ümumiyyətlə, parlament seçkilərinin nəticələrinin ləğvini tələb edir. Lakin Baş nazir Nikol Paşinyan nə ikinci tur, nə də yeni seçkilərin olacağını deyib. Müxalifət isə iddiaların təmin olunmayacağı təqdirdə eyni tələblərlə kütləvi etiraz aksiyalarına başlamağı müzakirə edir. Bununla bağlı ilkin təşəbbəüs “Güclü Ermənistan” blokunun lideri Samvel Karapetyandan gəlib.

O, müxalifəti seçkilərin nəticələrinin dəyişdirilməsi və hakimiyyətə qarşı mübarizə məqsədilə konsolidasiyaya çağırıb. Yəni müxalifət həm məhkəmə instansiyasında, həm də küçələrdə Paşinyan hökumətinə qarşı paralel təzyiq taktikasına nail olmağa çalışır. Ancaq müxalifətin öz məqsədinə çatması birlik nümayiş etdirə bilməsindən daha çox asılıdır.

“Ermənistan” blokunun lideri, eks-prezident Robert Köçəryan Samvel Karapetyanın birləşmək təklifinə müsbət cavab versə də, müxalifət düşərgəsində real müzakirələr müşahidə olunmur.

Samvel Karapetyanın çağırışı hələlik təklif olaraq qalır. “Çiçəklənən Ermənistan” Partiyası isə məhkəmənin qərarı ilə parlamentə düşəcəyinə ümid bəslədiyindən aksiyalara qoşulmağa tələsmir.

Səslərin təkrar sayılması zamanı “Çiçəklənən Ermənistan” 154 əlavə səs qazansa da, 222 səs itirib.

Robert Köçəryanın Samvel Karapetyana dəstək verəcəyi də inandırıcı görünmür. Seçkilərdən əvvəl müxalifət düşərgəsində mövcud olan siyasi qütbləşmə hələ davam edir. Sadəcə olaraq, parlamentə düşmək imkanı qazanmış Köçəryan bu mandatı özü üçün qələbə “kart”ına çevirmək istəyir. Çünki Robert Köçəryan Samvel Karapetyanın xarici ölkə vətəndaşlığı və barəsində məhkəmənin qərarı ilə həbs qərarı olduğuna görə deputat ola bilməyəcəyini yaxşı anlayır.

Belə olan halda Köçəryan Karapetyanın konsolidasiya təklifinə “hə” deməklə birləşmiş müxalifətin parlamentdə baş nazir postuna vahid namizədi olmaq niyyəti güdür. Eyni zamanda, Köçəryan bu taktikanı etiraz aksiyalarına da transfer edə bilər.

Çünki Samvel Karapetyan ev dustağı olduğuna görə mitinq və yürüşlərdə Köçəryan təşəbbüsü ələ almaq imkanı qazanmış olar. Bütün bunlar isə Rusiyanın maraqlarına cavab verir.

Bu kontekstdə Köçəryan Moskvanın dəstəklədiyi əsas fiqura çevriləcəyinə ümid edir. Nikol Paşinyan hökumətinin Köçəryanın toxunulmazlığının ləğvi və onu həbs etdirmək cəhdləri də əslində bununla bağlıdır. Karapetyan isə Köçəryanın planlarını pozmaq üçün konsolidasdiya adı altında siyasi cəhətdən buxovlamaq istəyir.

Yəni Ermənistan müxalifətində son günlər səslənən birlik çağırışları siyasi rəngarəngliyi daha da artırıb. Ona görə də Karapetyanın təşəbbüsünün ciddi nəticə verəcəyi inandırıcı görünmür.