Bakı Hərbi Məhkəməsində hakim Fikrət Əliyevin sədrliyi ilə əsgər Fariz Sadiq oğlu İsazadənin ölümüylə bağlı növbəti məhkəmə iclası emosional anlarla və qalmaqallı çıxışlarla yadda qalıb. Məhkəmə zalında iştirak edən mərhum əsgərin valideynləri övladlarının ölümündə yol verilən laqeydliyə etiraz edərək narazılıqlarını kəskin şəkildə ifadə ediblər.

Musavat.com xəbər verir ki, hazırkı prosesdə hakim qarşısına hərbi hissənin tibb məntəqəsinin rəisi, tibb leytenantı Vaqif Məmməd oğlu Məmmədov çıxarılıb.

O, Azərbaycan Respublikası Cinayət Məcəlləsinin 342.1-1-ci maddəsi ilə – qulluğa laqeyd yanaşma nəticəsində ehtiyatsızlıqdan insan ölümünə səbəb olmaqda ittiham edilir.

Məhkəmə zalında söz alan valideynlər bildiriblər ki, cəmi bir ay əvvəl həqiqi hərbi xidmətə yollanan oğullarının həyatını xilas etmək mümkün olduğu halda, ona vaxtında tibbi yardım göstərilməyib.

“Biz övladımızı Vətənə xidmət etmək üçün dövlətə əmanət etmişdik. Bir ay sonra onu tabutda geri aldıq. Ən ağrılısı isə budur ki, xəstəliyin qarşısını almaq mümkün olduğu halda buna laqeyd yanaşılıb”, - deyə mərhumun atası Sadiq İsayev məhkəmə zalında emosional şəkildə bildirib.

Cinayət işinin materiallarına görə, Fariz İsazadə 2025-ci ilin may ayının əvvəlində yüksək hərarət, güclü öskürək, halsızlıq və digər ağır respirator infeksiya əlamətləri göstərməsinə baxmayaraq, lazımi səviyyədə müayinə olunmayıb. İstintaqın qənaətinə görə, xəstəliyin ilkin mərhələsində düzgün tibbi müdaxilə edilmədiyindən vəziyyət sürətlə ağırlaşıb və sonradan infeksion-toksiki şok, ağır pnevmoniya, miokardit, damardaxili yayılmış laxtalanma sindromu və poliorqan çatışmazlığına gətirib çıxarıb.

Məhkəmədə diqqət çəkən məqamlardan biri də ağır vəziyyətdə olan əsgərin müraciət etdiyi tibb məntəqəsində növbətçiliyə həkim yox, yalnız sanitariya-gigiyena profilli sanitarın təyin edilməsi olub. İttihama görə, klinik təcrübəsi və müvafiq tibbi hazırlığı olmayan şəxsin belə kritik vəziyyətdə qərar verməsi faciənin dərinləşməsinə səbəb olub.

Araşdırma zamanı məlum olub ki, hərbi hissə ilə ixtisaslaşmış hərbi hospital arasında cəmi 10 dəqiqəlik məsafə olub. Buna baxmayaraq, pnevmoniya şübhəsi olan əsgər hospitala göndərilməyib.

İttihama görə, Vaqif Məmmədov xəstəni hərtərəfli müayinə etmədən, arterial təzyiqini, nəbzini və tənəffüs göstəricilərini müəyyənləşdirmədən cəmi bir neçə dəqiqə ərzində baxış keçirərək yenidən xidmət yerinə qaytarıb.

İş materiallarında göstərilir ki, Fariz İsazadə 6 və 9 may tarixlərində də tibb məntəqəsinə müraciət edib, lakin hər iki halda geri göndərilib. Yalnız 10 may tarixində başqa hərbi hissəyə göndərilən zaman vəziyyəti kritik həddə çatıb. Daha sonra Quba Rayon Mərkəzi Xəstəxanasına yerləşdirilsə də, həkimlərin bütün səylərinə baxmayaraq, onun həyatını xilas etmək mümkün olmayıb.

Ekspertiza rəylərində qeyd edilir ki, əsgər vaxtında hospitala təxliyə olunsaydı və düzgün diaqnostika aparılsaydı, ölümün qarşısını almaq mümkün idi.

Məhkəmədə ifadə verən təqsirləndirilən şəxs Vaqif Məmmədov isə özünü təqsirli bilmədiyini bildirib. O, xidmət etdiyi dövrdə əsgərlərin sağlamlıq vəziyyətini mütəmadi yoxladığını, Fariz İsazadənin ona heç vaxt şikayət etmədiyini və əsgəri digər hərbi hissəyə sağlam vəziyyətdə təhvil verdiyini iddia edib. Lakin mərhumun valideynləri bu mövqeyə kəskin etiraz ediblər. Onlar məhkəmə zalında oğullarının ölümündə məsuliyyəti olan bütün şəxslərin müəyyən edilərək cəzalandırılmasını tələb ediblər. Valideynlərin sözlərinə görə, övladlarının cəmi bir aylıq xidmət müddətində həyatını itirməsi və ona vaxtında tibbi yardım göstərilməməsi ilə bağlı çoxsaylı suallar hələ də cavabsız qalır.

Xatırladaq ki, Fariz İsazadənin ölümü ilə bağlı daha əvvəl Bakı Hərbi Məhkəməsində başqa bir cinayət işi də araşdırılıb. Həmin iş üzrə Sadıq Zeynalov və İlqar Abdullayev mühakimə olunublar. Mərhumun atası Sadiq İsayev eyni ittihamlarla mühakimə olunan şəxslər barədə fərqli məhkəmə qərarlarının çıxarılmasının ailədə ciddi narazılıq yaratdığını bildirib.

Əsgər atası ölkə rəhbərliyinə müraciətində oğlunun ölümü ilə bağlı bütün həqiqətlərin üzə çıxarılmasını, hadisədə iştirak edən bütün şəxslərin məsuliyyətə cəlb olunmasını və məhkəmə araşdırmasının tam obyektiv aparılmasını tələb edib.

Məhkəmə prosesi iyunun 11-də davam etdiriləcək.