Zərdabın Şahhüseynli kənd tam orta məktəbi acınacaqlı durumdadır. Bu vəziyyət həmin məktəbdə övladları təhsil alan valideynləri təngə gətirib.

Bizim.Media-nın Aran bürosuna müraciət edən Zərdabın Şahhüseynli kəndinin sakinləri bildiriblər ki, 1970-ci illərdə tikilən 220 yerlik məktəb binası yararsız vəziyyətə düşüb. Cabir Azayev adına Şahhüseynli kənd tam orta məktəb binasının bərbad vəziyyətdə olması barədə dəfələrlə aidiyyəti qurumlara müraciətlər olunub.

Amma məktəb bu günə kimi bir dəfə də olsun əsaslı təmir olunmayıb. Məktəbin tavanı, döşəməsi, pəncərələri və qapıları sınıb, tökülüb:

“İstilik odunla olsa da yandırmağın heç bir faydası yoxdu, çünki pəncərə şüşələrinin olmaması yanan odunun istiliyini aparır. Nəticədə uşaqlar soyuq siniflərdə dərs keçməli olur və tez-tez xəstələnirlər.

Kənd sakinləri Aqşin Babayev və Məhəddin Məmmədli yerli büromuza bildirib ki, taxtadan tikilmiş məktəbin sanitar qovşağı da uçmuş vəziyyətdədir və şagirdlər üçün təhlükəli hal yaradıb:

“Uşaqlarımız məktəbə gedir, soyuqlayıb gəlirlər, ağırlaşmış formaya düşürlər və 10 gün dərsdən qalmalı olurlar. Nə vaxta qədər belə olacaq? İstəyirik ki, bizim uşaqlarımız da isti sinifdə, müasir məktəbdə təhsil alsın. Digər kəndlərdə yeni müasir tipli məktəblər olduğu halda bizim kənd məktəbi niyə təmir olunmur?

Çəkiliş zamanı məktəbin şagirdləri - Nihad Ağalarov və Yusif Əmişov da məktəbin hazırki vəziyyətindən gileyləniblər:

“Məktəbin döşəməsinin taxtaları qırıqdı. Gəzəndə ehtiyat edirik. Məktəbdə dərs keçmək çətindir.Bir tərəfdən yol bir tərəfdən məktəb gedib gəlməyə çətinlik çəkirik. Peç var odun peçidir o qədərdə isti olmur pəncərələr sınıqdı təzə olmağın istəyirik Əlvənd və Seyidlər kənd məktəbləri kimi bizim də məktəbin yenilənməsini istəyirik. təzə olmağını istəyirik.

Məsələ ilə bağlı Mərkəzi Aran Regional Təhsil İdarəsinə sorğu ünvaladıq. Qurumdan Bizim.Media-ya bildirildi ki, Mərkəzi Aran Regional Təhsil İdarəsinin tabeliyində fəaliyyət göstərən təhsil müəssisələrinin yeni binaların inşası və mövcud binaların əsaslı təmiri əsas prioritetlərdəndir:

“Son iki ildə Mərkəzi Aran Regional Təhsil İdarəsinin tabeliyində olan 4 təhsil müəssisəsi üçün yeni bina inşa edilib, 4 təhsil müəssisəsində əsaslı təmir işləri aparılıb, 1 təhsil müəssisəsində isə əsaslı təmir işləri davam edir, 194 təhsil müəssisəsində cari təmir işləri aparılıb. Zərdab rayonu Cabir Azayev adına Şahhüseynli kənd tam orta ümumtəhsil məktəbinin vəziyyətindən də məlumatlıyıq və binanın əsaslı təmir edilməsi plana salınıb. Qeyd edirik ki, təhsil müəssisələrinin təmiri və tikintisi növbəlilik, prioritetlik prinsipi əsasında həyata keçirilir.