Siyəzən rayon sakini H.Aslanov ev 48 də yaşayan Lətifova Lalə Xanbaba qızı Azərbaycan Respublikasının 1-ci Vitse-prezidenti Mehriban xanım Əliyevaya müraciət ünvanlayıb. Bir nüsxəsi də "DİA-AZ"a daxil olan müraciətdə deyilir:
Hörmətli Mehriban xanım! Sizə bu məktubu böyük ümid və son çarə olaraq yazıram. Mən, Siyəzən rayon sakini Lətifova Lalə Xanbaba qızı uzun müddətdir ki, səhhətimdəki ciddi problemimlə mübarizə aparıram. Mərkəzi Nefçilər xəstəxanasının həkiminin müayinsinin rəyinə əsasən bel nahiyəmdə yırtıq (disk yırtığı) aşkar olunub və bu problem gündəlik həyatımı demək olar ki, mümkünsüz hala gətirib. Davamlı ağrılar, hərəkət məhdudiyyəti və əmək qabiliyyətimin azalması mənə həm fiziki, həm də mənəvi cəhətdən ağır zərbə vurub.
Neftçilər Xəstəxanasında həkim əməliyyat olunmağımı zəruri hesab edir. Lakin əməliyyat zamanı implantdan istifadə olunmalıdır və təəssüf ki, bu implant İcbari tibbi sığortaya daxil deyil. Həkimlərin bildirdiyinə görə, əməliyyat üçün ən azı 2000 manat məbləğində vəsait tələb olunur. Maddi vəziyyətim isə bu məbləği ödəməyə qətiyyən imkan vermir. Mən Siyəzənneft NQÇİ -də 30 il fəhlə işləmişəm, hazırda təqaüdçüyəm. 400 manat təqaüd alıram ki, onun 193 manatını Bank krediti ödəyirəm. Qalan vəsaitiin də yarsını demək olar, ağrıkəsici dərmanlara xərcləyirəm. Həyat yoldaşım vəfat edib, övladlarım da yoxdur. Qohumlarımın ümidinə qalmışam.
Hörmətli Mehriban xanım !
Mənim üçün bu əməliyyat sadəcə müalicə deyil normal həyata qayıdış, ağrısız yaşamaq və öz ayaqlarım üzərində bu yaşda dura bilmək ümidi deməkdir. Sizin daim insanlara göstərdiyiniz qayğıya, xüsusilə də ağır vəziyyətdə olan vətəndaşlara verdiyiniz dəstəyə inanaraq bu müraciəti edirəm.Bildirmək istəyirəm ki əyər hüquqi baxımdan imkan varsa əməliyyat üçün lazım olan məbləğ mənə məxsus olan pensiyanın sığorta hissəsindən də tutulula bilər mən şəxsən buna razıyam təki hazırki vəziyyətdən məni həkimlərimiz xilas etsinlər.
Sağlamlığımın ciddi risk altında olduğunu nəzərə alaraq, Sizin vasitənizlə implant xərcinin həlli üçün “İcbari Tibbi Sığortanın” rəhbərliyinin məsələni diqqətə almasını çox xahiş edirəm. Bu qərar mənim əməliyyata vaxtında müdaxilə imkanımı təmin edəcək.
Sonda bir daha Sizdən bir qadın kimi xahiş edirəm vəziyyətimi nəzərə alımb təcili olaraq mənim əməliyyat olunmağım üçün lazımı orqanlara göstəriş verəsiniz..."
