Dövlət Tarix-Memarlıq Qoruğu İdarəsinin hüquq və sənədlərlə iş şöbəsinin böyük məsləhətçisi Leyla Məmmədova işdən çıxmaq barədə ərizə yazmağa məcbur edildiyini bildirir.

Bizimyol.info xəbər verir ki, Leyla Məmmədova bununla əlaqədar məhkəməyə müraciət edib. O, Dövlət Tarix-Memarlıq Qoruğu İdarəsinə qarşı iddia ərizəsində özünün əmək müqaviləsinə xitam verilməsi və intizam məsuliyyətinə cəlb edilməsi barədə əmrlərin ləğv olunmasını, işə bərpa edilməsini, həmçinin məcburi işburaxma müddəti üçün əməkhaqqının ödənilməsini tələb edib.

Leyla Məmmədova 2023-cü ildə bu idarəyə işə qəbul edilib. 2024-cü ildə hüquq və sənədlərlə iş şöbəsinin baş məsləhətçi vəzifəsinə keçirilib. Onun sözlərinə görə, 2025-ci ilin fevralında Dövlət Tarix-Memarlıq Qoruğu İdarəsinə Rüfət Mahmud yeni sədr təyin olunandan sonra ona bildirilib ki, ya öz istəyi ilə işdən çıxmalıdır, ya da onu Əmək Məcəlləsinin 70-ci maddəsinin “ç” bəndi əsasında işdən çıxarılacaq.

Leyla Məmmədova bildirib ki, əmək müqaviləsinin müddəti bitmədiyinə görə öz istəyi ilə işdən çıxmaq barədə ərizə yazmağa etiraz edib: “Bundan sonra 2025-ci ilin avqust ayında heç bir əsas olmadan mənə töhmət elan edilməsi barədə əmr tərtib etdilər. Bildirdilər ki, əgər ərizə yazmasam, mənə növbəti töhməti verib, işdən çıxaracaqlar. Gördüm ki, fikirlərində ciddidilər, məni ləkələmək istəyirlər. Qorxdum, məcbur qalıb təklif etdim ki, töhməti ləğv eləsinlər, mən də işdən çıxmaq barədə ərizə yazım. Bundan sonra onlar töhməti ləğv etdilər. Mən də məcbur qalıb 12 avqustda işdən çıxmaq barədə ərizə yazdım”.

Leyla Məmmədova eyni zamanda, ona təzyiqlər edilməsi və işdən çıxmağa məcbur edilməsi barədə müxtəlif orqanlara şikayətlər göndərib: “Aldığım cavablardan məlum oldu ki, Dövlət Tarix-Memarlıq Qoruğu İdarəsi məni aldadıb, töhməti ləğv eləməyiblər. Həmin əmri saxtalaşdıraraq, töhmət əmri xəbərdarlıqla əvəz olunub. Mənə hədə-qorxu gəlirdilər ki, şikayət etsəm, başqa heç bir idarədə işləməyimə imkan verməyəcəklər”.

Dövlət Tarix-Memarlıq Qoruğu İdarəsi Leyla Məmmədovanın dediklərini təkzib edir. Bu qurumdan bildirilib ki, ona təzyiq göstərilərək, ərizə yazmağa məcbur edilməsi haqda iddialar doğru deyil.

İdarə məhkəməyə etiraz ərizəsində vurğulayıb ki, Leyla Məmmədovanın işdən çıxarılma ilə əlaqədar məhkəməyə şikayət üçün qanunda nəzərdə tutulmuş 1 aylıq iddia müddəti ötürülüb: “O, ərizə təqdim edərək, öz xahişi ilə müddət gözləmədən işdən azad olmaq istədiyini bildirib. Ərizəsi onun öz iradəsini sərbəst ifadə etdiyini göstərir. O, xəbərdarlıq müddəti ərzində ərizəsini geri götürmək barədə İdarəyə müraciət etməyib. Beləliklə, ərizənin qüvvədə qalmasına razılığını faktiki təsdiqləyib. Əmək müqaviləsi ləğv edildikdən və işdən azad olunmasından uzun müddət keçdikdən sonra məhkəməyə müraciət etməsi, yəni qanunvericilikdə nəzərdə tutulmuş müddəti ötürdükdən sonra qaldırdığı iddiasının hüquqi qüvvəsi yoxdur”.

Məhkəmə Leyla Məmmədovanın əmrin ləğvi, işə bərpa və əməkhaqqı ödənişi barədə iddiasını təmin etməyib.