Ermənistanda seçkilər ərəfəsində siyasi mühit növbəti qalmaqalla sarsılıb. Sosial şəbəkələrdə yayılan videoda maskalı və silahlı bir qrup şəxsin ölkənin baş naziri Nikol Paşinyan ünvanına açıq təhdidlər səsləndirməsi ciddi rezonans doğurub.
Hadisədən dərhal sonra hakimiyyət strukturları hərəkətə keçib. İstintaq Komitəsi qətl hazırlığı, kompüter sabotajı və qanunsuz silah dövriyyəsi maddələri ilə cinayət işi açıb, təhlükəsizlik orqanları isə bir neçə ünvanda axtarışlar aparıb. Paşinyan özü də seçki mitinqlərindən birində sərt və emosional çıxışı ilə diqqət çəkib.
Musavat.com “Qolos Armeniya”ya istinadən xəbər verir ki, sui-qəsd iddialarına cəmiyyətdə yanaşma birmənalı deyil. Müxalif dairələr və bəzi analitiklər yayılan videonun real təhlükədən çox, siyasi məqsədlərlə hazırlanmış bir səhnələşdirmə olduğunu iddia edirlər. Onların fikrincə, videonun ilk olaraq hakimiyyətə yaxın media resursunda yayılması və dərhal ardınca genişmiqyaslı hüquq-mühafizə tədbirlərinin görülməsi suallar doğurur.
Videonun üslubu da mübahisə mövzusudur. Maskalı şəxslərin statik duruşu, kağızdan oxunan aqressiv mətn və simvolik fon bəzi müşahidəçilərə görə radikal qrupların təbliğat videolarını xatırladır. Bu isə hadisənin təbii deyil, qurama ola biləcəyi ehtimalını gücləndirir.
Müxalifət hesab edir ki, belə bir video seçki kampaniyası fonunda iki məqsədə xidmət edə bilər:
birincisi, hakimiyyətin rəqiblərinə qarşı sərt tədbirləri legitimləşdirmək və Qarabağdan köçmüş erməniləri ictimai rəydə mənfi obrazda təqdim etmək.
Bu kontekstdə “Qolos Armeniya”ya Paşinyanın ritorikası da ayrıca müzakirə predmetinə çevrilib. Onun çıxışında istifadə etdiyi sərt və təhqiramiz ifadələr cəmiyyətdə gərginliyi daha da artırmaq riski daşıyır. Tənqidçilər bildirirlər ki, belə ritorika seçkiqabağı mühitdə parçalanmanı dərinləşdirir və müəyyən sosial qruplara qarşı nifrət yarada bilər.
Qarabağ ermənilərinin ictimai qurumları da məsələyə reaksiya verərək videonu “təxribat” adlandırıb və bunun onların adına siyasi manipulyasiya olduğunu bəyan ediblər. Bəzi keçmiş rəsmilər isə hadisəni birbaşa hakimiyyətin təşkil etdiyi siyasi texnologiya kimi qiymətləndiriblər.
Bütün bunların fonunda maraqlı və ironik bir çağırış səslənir: “Sən bizə sağ lazımsan, Paşinyan”. Bu ifadə isə əslində siyasi ittihamdır. Müxalifət bildirir ki, Paşinyan təkcə indiki hakimiyyətin rəhbəri kimi deyil, həm də gələcəkdə verdiyi qərarlara görə cavab verməli olan siyasi fiqur kimi lazımdır.
