Bakıda çəkilmiş avtobus zolaqları əvvəllər ictimai nəqliyyatda tıxacda qalan vətəndaşların işini xeyli asanlaşdırıb. İşə, evə və başqa yerlərə gedən sərnişinlər indi mənzil başına daha tez çata bilirlər.

Hərçənd, Bakıda ictimai nəqliyyat əhalinin sayına adekvat deyil. Bu səbəbdən xüsusən səhər və axşam pik saatlarda sıxlıq olur, insanlar nəqliyyatla bağlı çətinlik çəkir. Bundan başqa, nisbətən gec saatlarda işdən qayıdanlar avtobus tapmaqla bağlı problem yaşayır.

Avtobus zolaqlarının müsbət tərəfi olsa da, paytaxtdakı tıxacı daha da ağırlaşdırıb. Üstəlik, taksi sürücüləri də bu zolaqlarla əlaqədar problemlərlə üzləşdiklərini deyirlər.

Bakı sakini Təbriz Məmmədov Bizimyol.info xəbər portalına açıqlamasında gileylənir ki, müvafiq dövlət strukturları qərar verəndə əhalinin bütün qruplarını nəzərə almır. Onun sözlərinə görə, avtobus və velosiped zolaqları çəkilərkən birtərəfli qərar verilir:

“Zolaqları çəkəndə nəzərə almırlar ki, taksi sürücüləri sərnişinləri necə götürüb-düşürəcək? Sərnişini götürmək üçün zolağa girirsən, 100 manat cərimələnirsən. Zolağın yanındakı ikinci cərgədə bir dəqiqəlik saxlayırsan, yenə cərimələnirsən. Bəs bu taksi sürücüsü yazıq neyləsin? Yasamalda Şərifzadə küçəsində yol boyu obyektlər, iş yerləridir. Hər yerdə də avtobus zolağı, mən necə eləyim? Yaxud da “Beşmərtəbə”nin altından “28 May”a gedən yolda – Qış parkına paralel velosiped zolağı çəkilib. Orada böyük bir otel var, əcnəbi sərnişini gətirib düşürmək istədim, bilmədim ki, harada saxlayım. Velosiped yolunda saxlasam, cərimələnəcəm, saxlamasam da, adamı necə düşürüm? Bakıya gələn turistə necə deyim ki, burada saxlaya bilmərəm, cərimələyəcəklər?”

Sürücü qeyd edib ki, avtobus zolaqlarının çəkilməsi ictimai nəqliyyatdan istifadə edənlər üçün müsbət hal olsa da, taksi sürücüləri üçün cərimə mənbəyidir: “Onsuz da maddi vəziyyətimiz pisdir, ailəmizə gündəlik çörəkpulunu zorla aparırıq. Bu qədər cərimələrlə vətəndaşı yükləmək nəyə lazımdır?”

Bəzi ekspertlər təklif edir ki, lisenziyası olan taksilərə də avtobus zolaqlarından istifadə etməyə şərait yaradılsın. Yaxud da ən azı, sərnişinləri götürüb-düşürməyə imkan verilsin. Çünki taksinin özü də mahiyyət etibarilə ictimai nəqliyyatdır:

“Bakıda onminlərlə taksi sürücüsü var, onları bu cür problemlərlə üz-üzə qoymaq doğru deyil”.

Azərbaycan Yerüstü Nəqliyyat Agentliyindən (AYNA) isə bildirilib ki, taksilərin avtobus zolaqlarından qısamüddətli istifadəsi belə, müzakirə mövzusu deyil. Taksi sürücülərinə isə tövsiyə ediblər ki, sərnişinləri parklanma yerlərində götürüb-düşürsünlər. Avtobus zolaqlarının çəkildiyi küçələrdə yolboyu obyektlər və s. qurumlara gedib-gələnlərin taksidən istifadəsinə gəlincə, AYNA-dan belə deyilib: “Küçə boyu yerləşən obyektlərə arxa küçələrdən yan almaq mümkündür”.