İranın xarici işlər naziri Seyid Abbas Əraqçinin rəhbərlik etdiyi nümayəndə heyəti Bakıda məhsuldar görüşlər keçirdi və iki ölkə arasında əməkdaşlığa dair faydalı müzakirələr aparıldı. Nazirin Prezident İlham Əliyevlə görüşündə də əməkdaşlığın perspektivləri və bir çox sahələri üzrə konkret yol xəritələrinin olduğu bildirildi.

Rəsmi İranla münasibətlərin normal davam etdiyi bir vaxtda ölkənin ali dini liderinin birbaşa tabeliyində olan SEPAH-ın mediasında isə anti-Azərbaycan mövqeli yazılar səngimir. İran mediasına geniş çıxış imkanları olan bu qruplar əsassız ittihamlarla çıxış etməklə yanaşı, böhtan və yalan xəbərlər yaymaqdan da çəkinmirlər.

Bir neçə gün əvvəl “İran 24" TV-yə açıqlama verən SEPAH-ın sabiq komandiri, anti-Azərbaycan mövqeyi ilə tanınan Mənsur Həqiqətpur bildirib ki, guya Azərbaycanda İsrailin hərbi bazalarının olmasına dair əvvəldən məlumatları olub. ”Bizim daha öncədən Azərbaycanda İsrail bazalarının olmasından xəbərimiz var idi. İllər əvvəl İsfahanın hava məkanında və Natanzda “Hermes” dronu İranın hava hücumundan müdafiə sistemləri tərəfindən aşkar edilib. Bu PUA-nın Qarabağda ermənilər tərəfindən zərərsizləşdirildiyi də bildirilib. Xəzər dənizi üzərində “Hermes” dronuna aid olduğu bildirilən dalğalar da müəyyən edilib. Bizim son qənaətimiz odur ki, həmin dron Azərbaycandan buraxılıb".

Əraqçi Bakıya yol alarkən bu dəfə də İLNA agentliyi “İsrail-Azərbaycan hərbi əməkdaşlığı artıb; İrana qarşı yeni cəbhə yaranıbmı?” başlıqlı yazı dərc edib. (Mənbə: Tribuna.az) Yazıda iddia olunur ki, İsrail və Azərbaycan arasında münasibətlər Xəzər dənizində İrana qarşı yeni cəbhə yarada və regionda İran və Rusiya donanmalarına qarşı güc balansını dəyişə biləcək bir mərhələyə çatıb. Bu azmış kimi, İLNA bir qədər də “irəli” gedərək bu münasibətləri “Azərbaycan Cəbhəsi” adlandırıb. “Bu cəbhə lazım gələrsə, İrana qarşı hərbi əməliyyatlara hazırdır və İsraillə Bakı arasında strateji müttəfiqlik yeni səviyyəyə qaldırılıb”.

Agentliyin iddiasına görə, hadisələr İsrail Müdafiə Araşdırmaları və İnkişafı Agentliyinin rəhbəri, istefada olan polkovnik Daniel Quldun rəhbərlik etdiyi yüksək səviyyəli İsrail təhlükəsizlik nümayəndə heyətinin Azərbaycana nadir və gizli səfərindən sonra baş qaldırıb.

Rəsmi İranla münasibətlərin normal davam etdiyi bir vaxtda ölkənin ali dini liderinin birbaşa tabeliyində olan SEPAH-ın mediasında Azərbaycanı hədəfə alınmasının səbəbi necə izah edilməlidir? Belə nəticə hasil olur ki, İranda ikihakimiyyətlilikdir - prezidentin komandası Azərbaycanla qonşuluq münasibətlərində, dini liderə tabe olanlar isə əksini həyata keçirirlər.

Hərbi ekspert Ramil Məmmədlinin bildirdiyinə görə, bu ilin oktyabrında “AZIREX-2025" birgə axtarış-xilasetmə təlimi çərçivəsində İran gəmiləri Azərbaycana gəlmişdi: "Birgə təlimin əsas məqsədi Xəzər dənizində təhlükəsizliyin təmin olunması, axtarış-xilasetmə əməliyyatlarında qarşılıqlı əlaqə və koordinasiyanın gücləndirilməsi idi. Bu ilin mayında isə ölkəmizdə “Araz-2025" birgə təlimləri keçirilib. Azərbaycan və İran hərbçilərinin birgə təlimləri ölkələrin, onun Silahlı Qüvvələri arasında qarşılıqlı etimadın artırılmasına xidmət edir. Demək istəyirəm ki, Xəzərdə və quruda təkcə bu il birgə təlimlər keçirən iki qonşu ölkə arasında münasibətlərdə hər hansı problem görünməsə də, bəzi qüvvələr "qaşınmayan yerdən qan çıxarır". İrandakı rejimin əsas qanadının İsrail isterikası tükənmək bilmir. 12 günlük müharibədə baş verənlərdən nəticə çıxarmalı olan cənub qonşumuz hələ də Azərbaycanda “İsrail izi” axtarır. Müharibə sübut etdi ki, İsrail kəşfiyyatı güclü işləyib və İranın dərinliklərinə sızıb. Hətta müharibə günlərində şəhərin ortasında PUA daşıyan nəqliyyat vasitəsi aşkarlanmışdı. Bu da ondan xəbər verir ki, İran qonşusu Azərbaycanla sərhəddə “sionizm izi” axtarmaq əvəzinə öz içini təmizləməlidir. Ölkədə yəhudilərə işləyən kifayət qədər casus var və onların fəaliyyəti nəticəsində 12 gün İrana zərbələr endirildi. Yəni SEPAH-a bağlı mətbuat orqanları nəyi qoyub, nədən danışırlar..."

Hərbi ekspert Azərbaycanın İsraillə strateji tərəfdaşlıq münasibətlərində İran üçün gizli qalan məqamlar olduğunu düşünmür: “İsrail rəhbərliyinin bəyanatları, dövlət rəsmiləri səviyyəsində səfərlər, qarşılıqlı şəkildə siyasi-hərbi sahədə əməkdaşlıq, silah-sursat alınması İran üçün konfidensial məsələlər deyil. Azərbaycan İsraillə inkişafda olan münasibətlərini gizlətmir. Ölkəmizdə İsrailin hərbi bazalarının olduğunu söyləmək gülməlidir. Bundan əvvəl də Türkiyənin hərbi bazalarının olduğunu deyənlər var idi. Əvvəla, buna ehtiyacımız yoxdur. Azərbaycan heç bir dövlətin, eləcə də İsrailin və Türkiyənin hərbi bazalarının ərazimizdə yerləşməsinə icazə verməz. Bu, ölkənin yürütdüyü siyasətə, milli təhlükəsizliklə bağlı strategiyasına uyğun deyil. Eyni zamanda Şuşa Bəyannaməsi hərbi bazaların mövcudluğundan qat-qat dəyərli sənəddir. Belə olan halda, İsrailin hərbi bazaları Azərbaycanda niyə yerləşdirilməlidir? Bu, İrandakı müxtəlif anti-Azərbaycan dairələrin çeynənmiş absurd ittihamları təkrarlamasıdır. Hələ də bu xəstəlikdən qurtula bilmirlər və Azərbaycana böhtan yağdırırlar”.

R.Məmmədli Azərbaycandan İrana PUA buraxıldığına dair heç bir sübut olmadığını, bu haqda ölkənin ali liderinin müşaviri Şamxani və rəsmi şəxslərin də danışdığını xatırlatdı: “İrana hansı istiqamətdən raketlər, dronlar yağdığını özləri yaxşı bilirlər. İran rəsmiləri açıq şəkildə bəyan ediblər ki, Azərbaycan ərazisindən PUA buraxıldığına dair hər hansı fakt yoxdur. Ona görə də bizi ittiham etmək yersizdir. Üstəlik, bunu niyə məhz indi edirlər? Halbuki ikitərəfli əlaqələr rəsmi səviyyədə normaldır. Görünür, mühafizəkar qanad münasibətlərin yaxşılaşmasını istəmir. Azərbaycandan guya dron göndərildiyini iddia edən Həqiqətpur kimilər həqiqəti görmək istəyirsə, 12 günlük savaşda generallarını yatdığı yerdə necə vurdular, bax, bunu araşdırsınlar, öz hərbi-siyasi səhvlərini təftiş etsinlər”.

“Yeni Müsavat”