Britaniyanın müdafiə naziri Vernon Rodni Kokerin Ermənistana səfəri zamanı Vazgen Sarkisyan adına Hərbi Akademiyaya baş çəkməsi Azərbaycanda ciddi narazılıqla qarşılanıb.

Musavat.com xəbər verir ki, Ermənistanda ən böyük hərbi tədris müəssisələrindən biri olan bu akademiya Xocalı soyqırımının təşkilatçılarından, Azərbaycan xalqına qarşı hərbi cinayətlərdə adı hallanan keçmiş müdafiə naziri Vazgen Sarkisyanın adını daşıyır.

Səfər zamanı britaniyalı nazirə akademiyanın strukturu, tədris sistemi və kursant hazırlığı barədə təqdimat edilib, o, təlim siniflərini gəzib. Lakin ona təqdim olunmayan ən mühüm fakt var idi:

Bu bina Azərbaycanın dinc əhalisinə qarşı törədilmiş ən ağır müharibə cinayətlərindən birinin iştirakçısının adını daşıyır.

Böyük Britaniya kimi nüfuzlu və Azərbaycana dost dövlətin rəsmisinin bu akademiyanı ziyarət etməsi, xüsusilə Xocalıda qadınların, uşaqların və yaşlıların amansızcasına qətlə yetirildiyi faciənin fonunda Azərbaycan cəmiyyəti tərəfindən xoş qarşılanmır.

Əgər Ermənistan doğrudan da sülhə can atdığını iddia edirsə, ilk növbədə soyqırım və işğal cinayətlərində adı olan şəxslərin adlarını küçələrdən, hərbi məktəblərdən və dövlət institutlarından silməlidir.

Təkcə Vazgen Sarkisyan deyil – Ermənistanda hələ də Monte Melkonyanın da adı ilə lisey fəaliyyət göstərir. O isə Kəlbəcər və digər bölgələrdə dinc əhaliyə qarşı qırğınlarda adı çəkilən silahlı dəstələrin rəhbərlərindən olub.

Bu isə real sülh gündəliyi deyil, nifrətin davam etdirilməsi, regionda revanşizmin qidalandırılmasıdır.

Sual yaranır: Ermənistan necə həm sülh istədiyini iddia edir, həm də soyqırım iştirakçılarının adlarını əbədiləşdirir?

Əgər İrəvan sülh sazişinə imza atmağa, Azərbaycanla normallaşmaya həqiqətən hazırdırsa, ilk addım budur:

- Vazgen Sarkisyan adı akademiyadan çıxarılmalıdır,

- Monte Melkonyan adı liseylərdən götürülməlidir.

Cinayətkarların adlarının dövlət binalarında yaşadılması sülhün ruhuna ziddir.

Britaniya müdafiə nazirinin səfəri diqqət yetirilməli mühüm həqiqəti yenidən gündəmə gətirdi:

Sülh prosesi o zaman irəliləyəcək ki, Xocalı qatillərinin adları təhsil ocaqlarından yox olmağa başlasın.