“Ramiz Mehdiyev işi” üzrə mediada yer alan məlumatlarda sabiq Administrasiya rəhbərinin 50 nəfərlik komandaya malik olduğu, hakimiyyəti məhz bu şəxslərin dəstəyi və iştirakı ilə devirəcəyi, həmin şəxslərə hökumətdə mühüm postlar verəcəyi ilə bağlı məlumatlar yer alıb.
Hələlik media və sosial mediada 50 nəfərlik komandanın 2 təmsilçisinin – AXCP sədri Əli Kərimli və Milli Şura üzvü Gültəkin Hacıbəylinin adı çəkilsə də, digər 48 nəfərin kimliyi ilə bağlı heç bir informasiya yoxdur. Hansı ki, bu 48 nəfərin kimliyi yuxarıda adı çəkilən iki şəxsdən daha çox önəm kəsb edir. Çünki hər iki müxalifət təmsilçisi nə maliyyə, nə də nüfuz baxımından ciddi bir gücə malik deyil və onların hakimiyyət çevrilişi zamanı hansısa kütləni arxasınca aparmaq potensialı yoxdur. Halbuki dövlət çevrilişi, hakimiyyətin zorla ələ keçiriməsi həm maddi, sosial baza baxımından ciddi resurs tələb edir. Bu isə o deməkdir ki, Ramiz Mehdiyevin həyata keçirməyə çalışdığı hakimiyyət çevrilişinin “maliyyə və nüfuz yükü” komandanın digər 48 üzvlərindən kimlərinsə üzərinə düşməli imiş. Görünür Ramiz Mehdiyev müxalifət təmsilçilərinin adını siyahıya xaricdəki bəzi anti-Azərbayan dairələrin rəğbətini qazanmaq, “yeni hökumətdə” iqtdiarlı-müxalifətli bütün qütblərin nümayəndələrinin təmsil olunduğu görüntüsünü yaratmaq üçün daxil edib.
Bəs Ramiz Mehdiyevin müəllifi olduğu “Dövlət Şurası”nda təmsil olunan və bu missiyanı yerinə yetirmək üçün nəzərdə tutulan şəxslər kimlərdir?
Bu suala aydınlıq gətirmək üçün bəzi faktlara diqqət yetirməkdə fayda var.
Sabiq və mövcud məmurların sintezindən formalaşan anti-milli komanda...
“Dövlət Şurası”nda kimlərin yer aldığı rəsmən elan edilməsə də, Ramiz Mehdiyevin formalaşdırdığı bu anti-milli komandada sabiq və hazırkı məmurlardan bəzilərinin yer alması ehtimalı böyükdür. Çünki məhz bu şəxslər Ramiz Mehdiyevin gözləntilərini doğrulda, öz iddialarını, vəzifə hərisliklərini sabiq Administrasiya rəhbərinin planı fonunda reallaşdırmağa ümid edə bilərdi. O da məlumdur ki, hakimiyyət çevrilişi üçün gərəkli olan resurslar – maddi təminat, məhdud da olsa bəlli bir çevrə və müəyyən nüfuz məhz bu şəxslərdə mövcuddur. Bu isə o deməkdir ki, Ramiz Mehdiyev və onun komandası üçün qurulacaq “məhşər günü”nün 48 “qəhrəmanı”nı sabiq və hazırkı məmurlar arasında axtarmaq daha məntiqlidir.
Vətənin çörəyini yeyib Rusiyaya pərəstiş edənlər...
“Dövlət Şurası”nda təmsil olunanların dairəsini bir qədər də daraltmaq üçün daha bir fakta diqqət çəkməkdə fayda var. Bu da Ramiz Mehdyev komandasında yer alacaq şəxslərin Rusiyaya, Rusiyann isə bu şəxslərə münasibətinin kifayət qədər loyal olması gerçəyidir.
Aydındır ki, öz məkirli məqsədini həyata keçirmək üçün Rusiyadan dəstək almağa çalışan Ramiz Mehdiyev, Kremlə təqdim etdiyi siyahıya Rusiyada narazılıq doğuracağı hər hansı bir şəxsin adını daxil edə bilməzdi. Bu, onun gerçəkləşdirmək istədiyi planın bəribaşdan iflası demək olardı. Buna görə də Ramiz Mehdiyevin tərtib etdiyi siyahıda Rusiyaya açıq və ya gizli şəkildə pərəstiş edən, ən azından rəsmi Moskvaya hər hansı tənqidi münasibət bəsləməyən şəxslərin adının yer aldığı birmənalıdır.
Şübhəsiz, DTX-da aparılan istintaq işinin gedişatında “Dövlət Şurası” adlı oyuncaq qurumda təmsil olunanlrın kimliyi son nəfərinə qədər müəyyənləşdiriləcək, həmin şəxslərin məsuliyyətə cəlb edilməsi təmin olunacaq. Bu şəxslər hüquqi müstəvidə layiq olduqları cəzanı almaqla yanaşı, xalqımızın yaddaşında, milli tariximizdə şəxsi ambisiyalarını milli mənafedən üstün tutan xəyanətkarlar kimi qalacaq, onlardan hər zaman ikrah və nifrət hissi ilə bəhs olunacaq.
Moderator.az
