Dövlətə xəyanət ittihamı ilə həbsdə olan Ramiz Mehdiyevə donoslar yazan, "ağsaqqalım" deyən Elmira Axundovanın yaxın adamı Elnur İbrahimovun ölkədən çıxışına STOP qoyulub.
Xüsusilə külli miqdarda dələduzluq etmiş Elnur İbrahimov barəsində Nəsimi rayon Məhkəməsi icra məmurunun təqdimatı əsasında STOP qoyub. Elnur İbrahimov bu qərardan narazı qalıb, ölkədən getmək istəyi ilə Bakı Apellyasiya Məhkəməsinə üz tutub. Hakim Cəmilə Musayevanın sədrliyi ilə Elnur İbrahimovun apellyasiya şikayətinə baxılıb. Məhkəmə şikayəti təmin etməyib.
140116033 saylı cinayət Ramiz Mehdiyevin qılıncının hər tərəfinin kəsdiyi bir dönəmdə Daxili İşlər Nazirliyi Bakı Şəhər Baş Polis İdarəsində istintaq olunub. Cinayət işinin materiallarında keçmiş səfir Elmira Axundovanın evində başlanan, onun yaxın adamı Elnur İbrahimovun istintaqdan illərlə yayındırılması ilə davam etdirilən çoxmilyonluq dələduzluq sxemindən bəhs olunur.
Zamanında Ramiz Mehdiyev faktoru bu cinayətin tam və hərtərəfli araşdırılmasının qarşısını alıb. İndi isə Mehdiyev öz hayındadır və onun adına bağlı olan cinayətlərin araşdırılması, hüquqları pozulan, əmlakları dələduzluqla, hədə-qorxu ilə əllərindən Azərbaycan vətəndaşlarının mal-mülklərinin özlərinə qaytarılması zamanıdır.
Nə baş vermişdi?
Sonradan böyük bir dələduzluğa yol açan məclis 2013-cü ildə, o zaman deputat olan Elmira Axundovanın Bakıdakı evində baş tutur. O zaman Elmira Axundova məclis iştirakçılarına müraciətlə oğlu Həbib Axundov onun xeyir-duası və birbaşa iştirakı ilə iş qurduğunu açıqlayıb. Deyib ki, Həbib Axundov Dubaydan Azərbaycana dəftərxana malları gətirib müxtəlif dövlət qurumlarına satacaq. Əldə edilən gəlirdən biznes ortaqlarına şirkətə qoyduqları pullara görə dividend veriləcək.
Deputata inanan qonaqları beləcə onun oğlu Həbib Axundova müxtəlif məbləğlərdə biznesə yatırmaq üçün pul veriblər. O zaman Elnur İbrahimov Həbib Axundovun göstərişlərinin icraçısı rolunda olub. Beləcə Axundovanın evində qurulan, sözdə var olan, faktiki isə olmayan "biznes"ə 8 milyon manatdan artıq vəsait toplanıb. Pulları Axundovanın çağırışı ilə onun oğlu Həbib Axundova və Elnur İbrahimova verənlərə 2-3 ay dividend verilib. Sonradan isə dividend verilişi dayandırılıb və Elmira Axundova "biznes ruxnul" deməklə yaxasını kənara çəkməyə başlayıb.
Məlum olub ki, Elmira Axundovanın dediyi biznes ümumiyyətlə olmayıb, onun oğlu və Elnur İbrahimov Dubaydan Azərbaycana hər hansı bir dəftərxana malları da gətirməyiblər. Bu, sadəcə çoxlu pul toplamaq üçün uydurulmuş bir əfsanə olub, faktiki olaraq biznes olmayıb. Şirkətdən dividend olaraq verilən pullar da elə bu adla vətəndaşlardan toplanılan vəsaitlərdən verilib. Yəni dost-tanışdan külli miqdarda pul yığılıb, həmin pullardan qəpik-quruşu biznesdən gəlir adı ilə onlara qaytarıb biznesin olduğuna inandırıblar. Dividend verilməsi dayandırılandan sonra adamlar aldadıldıqlarını anlayıblar. Məsələ böyüyüb, zərərçəkənlər pullarını tələb etməyə başlayıblar. Elmira Axundovanın Şüvəlandakı bağ evinə toplaşıblar. Müzakirələrdən sonra Yasamal Polis İdarəsinə gedib orada məsələni araşdırmaq qərarına gəliblər. Orada Elnur İbrahimov zərərçəkmişlərin yanında Həbib Axundovun üzünə deyib ki, adamlardan toplanan pulları ona verib. Bundan əsəbiləşən Həbib Axundov Elnur İbrahimovun üstünə cumub, onun sifət nahiyəsinə zərbə endirib, sonuncunun burnu zədələnib. Bu zaman məsələyə deputat Elmira Axundova qarışıb.
2013-cü ilin avqustunda Elnur İbrahimov Həbib Axundovun müşayiəti ilə Qəbələyə Elmira Axundovanın yanına aparılıb. Həmin gün orada yerləşən "Qafqaz Resort" hoteldə düzənlənən tədbirə hazırlaşan Elmira Axundova Elnur İbrahimovla görüşüb. Bundan sonra deputat aldadılan şəxslərə vəd edib ki, hər kəsin pulları geri qaytarılacaq, sadəcə bəzi dəqiqləşdirilmələr aparılmalıdır. Bu vəddən sonra isə Elnur İbrahimov ölkədən qaçırılıb. Gürcüstana, oradan isə Rusiyaya keçib. Bu qaçışdan sonra zərərçəkənlər hüquq-mühafizə orqanına üz tutmaqla Həbib Axundovun ailəvi dostu Elnur İbrahimovun saxlanılaraq istintaqa cəlb edilməsi üçün hərəkətə keçiblər. Lakin 3 ildən bir qədər artıq müddətdə Elnur İbrahimovun yerini müəyyən etmək mümkün olmayıb.
Azərbaycan polisinin Rusiyadan olan həmkarlarına Elnur İbrahimovun saxlanılması üçün müraciətləri müəmmalı şəkildə təmin olunmayıb. Elnur İbrahimovun Rusiya ərazisinə keçirilməsi haqda sorğulara cavab olaraq bildirilib ki, Elnur İbrahimov Rusiya ərazisinə keçməyib. Gürcüstan hüquq-mühafizə orqanlarından isə qeydiyyat sənədlərinə əsasən belə cavab verilib ki, Elnur İbrahimov Gürcüstandan Rusiyaya keçib.
Elnur İbrahimovun tapılması, istintaqa cəlb edilməsi üçün iş üzrə zərərçəkənlər yorulmadan hüquq-mühafizə orqanlarına müraciət etdikləri bir vaxtda Elmira Axundova və oğlu Həbib Axundov onlara qarşı məhkəmələrdə iddialar qaldırıb, hüquq-mühafizə orqanlarına müraciətlər ediblər.
Elnur İbrahimovun zərərçəkənlərdən qurtulması kimi dəyərləndirilən bu addıma Binəqədi Rayon Məhkəməsinin 2 hakimi qol qoymayıb. Hakimlər mətbuatda yazılan, lakin zərərçəkmişlərin müəllifləri olmadığı yazılara görə onları cərimələməkdən yayınıblar. Sonradan işə cəlb olunan 3-cü hakim isə Ramiz Mehdiyevin adı qarışan iş üzrə zərərçəkmiş şəxsləri 10-20 min manat cərimə edib. Bu gedişlər Axundovla zərərçəkənləri susdurmağa cəhd ediblər.
Lakin yanılıblar. Şikayətlər bununla da dayanmayıb, zərərçəkmişlər dələduzluqla əllərindən çıxarılan pullarını geri tələb etməkdə davam ediblər. Bundan sonra Həbib Axundov da istintaqa ərizə verib, şikayətçi qismində tanınmasını istəyib. Buna baxmayaraq bu gün də Həbib Axundov, onun anası Elmira Axundovanın Elnur İbrahimovla çox yaxşı münasibətləri qalmaqdadır. Ailənin bütün tədbirlərində Elnur İbrahimov məclisin yuxarı başına keçirilib, Axundova hələ deputat olduğu zamanlarda onun iştirakı ilə rəqs etməyi xüsusi olaraq xoşlayıb. Bunu sübut edən video da var.
Həbib Axundov iş üzrə zərərçəkmiş kimi tanınsa da, Elnur İbrahimovun həbsi üçün hər hansı bir addım atmayıb. Digər zərərçəkmişlərin israrlı tələblərindən sonra, 2016-cı ildə Elnur İbrahimov Moskvada həbs edilib. O zaman Elnur İbrahimov ekstradisiya olunmamaq üçün Azərbaycanda hüquq-mühafizə orqanları tərəfindən təqib olunmasını bildirib. Rəsmi şikayətində Azərbaycanda hüquq-mühafizə orqanında döyüldüyünü, burnunun sındırıldığını deyib. Elnur İbrahimov burnuna yumruqla Həbib Axundovun zərbə endirməsini hüquq-mühafizə orqanlarının adına çıxmaqla labüd cəzadan yaxa qurtarmağa çalışıb. Lakin ona inanmayıblar, Azərbaycana ekstradisiya ediblər. Ölkəyə gətiriləndən sonra üzərində məhkəmə qurulsa da, Elnur İbrahimovun bu cinayəti təkbaşına etməməsinə dəlalət edən faktlara, zərərçəkmişlərin ifadələrinə hüquqi qismət verilməyib. İş materiallarına Elmira Axundovanın Ramiz Mehdiyəvə yazdığı, "oğlumu tuturlar, kömək et" mahiyyətli donos-məktubu əlavə olunub.
Bakı Ağır Cinayətlər Məhkəməsinə Ramiz Mehdiyevin göndərdiyi bu məktubdan sonra cinayət işinin obyektiv araşdırılması əngəllənib. Zərərçəkənlərin israrla "pulları Həbib Axundova vermişik" deməsinə də hakim adekvat reaksiya verməyib. Elnur İbrahimovun ölkədən kimin və niyə qaçırması məsələsi araşdırılmayıb. Cinayət işində eks-səfir Elmira Axundovanın, oğlu Həbib Axundovun səs yazıları, Elnur İbrahimovun Elmira Axundovaya günaşırı 3-5 min manat niyə daşımasının səbəbi aydınlaşdırılmayıb, hüquqi qiymət verilməyib.
Bakı Ağır Cinayətlər Məhkəməsinin hökmünə əsasən, Elnur İbrahimov 9 il müddətinə azadlıqdan məhrum edilib. Məhkəmə hökmünə əsasən, Elnur İbrahimova qarşı 350 min manatlıq mülki iddia da təmin olunub. Elnur İbrahimov mülki iddia üzrə zərərçəkən şəxsə 1 manat da ödəməyib. Elmira Axundovanın oğlu Həbib Axundov Ali Məhkəməyə təqdim etdiyi müraciətində Elnur İbrahimovun ona 55 min manat ziyan ödədiklərini yazıb, onun azad edilməsini istəyib.
Həmçinin Elnur İbrahimov tam qanunsuz olaraq vaxtından əvvəl azadlığa buraxılıb. Gec də olsa, Azərbaycan hüquq-mühafizə orqanları Ramiz Mehdiyevin adına bağlı olan külli miqdarda dələduzluq cinayətinin bütün iştirakçılarını nəhayət ki, məsuliyyətə cəlb etməlidirlər.
