Azərbaycan və Rusiya prezidentlərinin - İlham Əliyevin və Vladimir Putinin Pekində xüsusi görüşü nəzərdə tutulmayıb.

Bunu Rusiya prezidentinin beynəlxalq məsələlər üzrə köməkçisi Yuri Uşakov deyib. Bununla yanaşı o bildirib ki, liderlər eyni masa arxasında olacaqlar, odur ki, "hər şey mümkündür".

Məlum olduğu kimi, "Yaponiya təcavüzünə qarşı müharibədə və dünya antifaşist müharibəsində" qələbənin 80 illiyi münasibətilə Çin Xalq Respublikasının paytaxtı Pekin şəhərində qələbə paradı keçiriləcək. Tədbir sentyabrın 3-də olacaq. Azərbaycan prezidenti İlham Əliyev də həmin təntənəli mərasimdə iştirak edəcək. Rusiya prezidenti də həmçinin. Ancaq bu iki lider arasında ayrıca görüş planlaşdırılmayıb.

Adətən beynəkxalq tədbirlərdə dövlət rəhbərləri bir-biri ilə görüşürlər. Bu, bir yandan dövlətlər arasında münasibətlərin yüksək səviyyəsini vurğulamaq üçün simvolik, dostcasına görüş də ola bilər, konkret dövlətlər arasında yaranmış müəyyən gərginliyin, problemin müzakirəsi məqsədilə işçi kontaktlar da ola bilər.

Azərbaycan və Rusiya prezidentlərinə gəlincə, bu iki rəhbərin Pekində görüşməsini Moskva istisna etməsə də, görüş üçün hazırlıq da yoxdur. Daha doğrusu, Rusiya bu görüşə hazır deyil; Azərbaycanın tələbləri hələ də ən yüksək səviyyədə "eşidilməyib"; AZAL-ın Rusiya üzərində vurulmuş təyyarəsi ilə bağlı Moskva öz üzərinə düşənləri etməyib. Əksinə öz ərazisində Azərbaycanlılara, xüsusilə, Azərbaycanlı iş adamlarına qarşı total repressiya həyata keçirir. Eyni zamanda Kremlin nəzarətində olan media resursları Azərbaycan dövlətinin, şəxsən prezident İlham Əliyevin əleyhinə davamlı qara piar aparır. Xüsusilə, onun son müsahibəsində gətirdiyi obyektiv, tarixi faktlar, Rusiya ilə bağlı söylədiyi əsaslı fikirlər Kremlin propoqandaçılarını daha da coşdurub. Azərbaycan əleyhinə qərəzli və qəzəbli tənqidin dozasını bir az da artırıblar. Xüsusilə son vaxtlar Rusiya Ukrayna ərazisində Azərbaycana məxsus obyektləri - SOCAR-a məxsus müəssisələri vurub. Eləcə də, artıq ikinci dəfədir ki, Azərbaycanın Ukraynadakı səfirliyini hədəfə alır.

Belə bir gərgin fonda Azərbaycan və Rusiya prezidentlərinin görüşü, təbii ki, real görünmür. Ancaq, Yuri Uşakovun da dediyi kimi, onlar eyni məkanda, eyni masa arxasında olduqlarıba görə təmaslar mümkündür. Ancaq bu görüş olsa da, olmasa da, Azərbaycan öz haqlı mövqeyindən geri çəkilməyib. Bunu Azərbaycan prezidentinin son müsahibəsindəki fikirləri və şərhləri də aydın göstərir.

Yuri Uşakovun açıqlamasından və şərhindən görünür ki, Rusiya tərəfi Azərbaycan prezidenti ilə görüşdə maraqlıdır. Ancaq Azərbaycan üçün əsas olan öz milli maraqlarıdır. Bu maraqlar isə prezidentin "Əl-Ərəbiyyə" telekanalına müsahibəsində bir daha və hərtərəfli ifadə və şərh olunub.

Seyid Əhmədli,

Bizimyol.info