Ermənistan Baş naziri Nikol Paşinyan mediaya açıqlamasında diqqətçəkən fikir səsləndirib. Belə ki, Baş nazir 2020-ci ilin 9 noyabr (10 noyabr) sənədindən danışıb və deyib ki, “noyabrın 9-na qayıtmağa ehtiyac yoxdur”: “9 noyabr 9 noyabrda qaldı”.
Ermənistan tərəfi bundan öncə də Rusiya ilə müəyyən təşkilatlarda fəaliyyətini demək olaraq dondurub. Buna misal kimi Ermənistanın Kollektiv Təhlükəsizlik Müqaviləsi Təşkilatı (KTMT) ilə bağlı dəyişən münasibətini göstərmək olar.
Bu addımlar "Ermənistanın artıq Rusiyadan tamamilə üz döndərir" fikrinə rəvac verir.
Bəs həqiqətənmi bu, belədir?
Modern.az-a açıqlamasında Milli Məclisin Beynəlxalq münasibıtlər və korrupsiya ilə mübarizə komitəsinin üzvü Elçin Mirzəbəyli bildirib ki, əvvəla, Nikol Paşinyanın “9 noyabr 9 noyabrda qaldı” ifadəsi Ermənistan rəhbərliyinin Vaşinqtonda imzalanan sənədlərdən sonra 10 noyabr (9 noyabr) bəyanatını artıq aktual hesab etmədiyini göstərir:
"Bu, bir tərəfdən 2020-ci ildəki məğlubiyyətin siyasi-sosial yaddaşda yaratdığı travmadan uzaqlaşmaq cəhdi, digər tərəfdən isə Ermənistanın bu sənədin əhəmiyyətini itirdiyini diqqətə çatdırmasıdır. Hüquqi müstəvidə Paşinyan faktiki olaraq təsdiq edir ki, 10 noyabr bəyanatı müvəqqəti xarakter daşıyıb və artıq normativ əsas deyil. İkincisi, bu mövqe Ermənistanın xarici siyasətində gedən istiqamət dəyişikliyinə uyğun gəlir. Ermənistan son illər KTMT-də fəaliyyətini minimuma endirib, təşkilat tədbirlərində iştirakdan imtina edib, həmçinin Rusiya ilə hərbi-texniki əməkdaşlığı faktiki dondurub. Paşinyan hökuməti ABŞ-la təhlükəsizlik sahəsində yaxınlaşmanı artırır. Buraya ABŞ-la müdafiə dialoqunun intensivləşməsi də daxildir".
Deputat vurğulayıb ki, bununla belə, Ermənistanın “tamamilə Rusiyadan üz döndərməsi” tezisi hələ bir qədər tezdir:
"Ermənistan iqtisadi, enerji və diaspor kanalları baxımından hələ də ciddi şəkildə Rusiyadan asılıdır. Ölkənin əsas qaz təminatçısı “Qazprom”dur, miqrant pul köçürmələrinin əhəmiyyətli hissəsi Rusiyadan gəlir. Bundan başqa, Rusiyanın Gümrüdəki 102-ci hərbi bazası Ermənistanla imzalanmış müqaviləyə əsasən, hələ də bu ölkənin ərazisində yerləşir.
Bütövlükdə isə Paşinyanın bu bəyanatı Ermənistanın artıq yeni reallıqları qəbul etdiyini və keçmişə qayıtmaq niyyətində olmadığını göstərir".
