Musavat.com xəbər verir ki, Rusiya dövlət mediasının əsas simalarından olan, Kreml təbliğatının baş icraçılarından biri sayılan televiziya aparıcısı Vladimir Solovyov növbəti dəfə Azərbaycana qarşı hücum dolu açıqlama ilə çıxış edib.

Solovyov iddia edib ki, guya Bakıda “dərin kök salmış casus şəbəkəsi” mövcuddur və həmin “şəbəkə”nin Rusiyadakı “təsir agentləri” vasitəsilə fəaliyyət göstərdiyini iddia edib. O, belə şəxslərin dərhal həbs olunmalı olduğunu və onların Azərbaycan həbsxanalarında saxlanılan rusiyalı jurnalistlərlə dəyişdirilməsini təklif edib.

Əslində, bu aparıcının Bakıya qarşı ritorikası yeni deyil. Solovyov demək olar ki, bütün verilişlərində Azərbaycana qarşı iftiralar, təhqirlər səsləndirir və ictimai rəyə düşmənçilik aşılayır. Onun “casus şəbəkəsi” barədə uydurmaları da eyni xəttin davamıdır.

Ekspertlərin rəyinə görə, bu cür açıqlamalar Rusiya-Azərbaycan münasibətlərinin gərginləşməsinin fonunda Moskvanın yeni hücum dalğasının göstəricisidir. Kreml Azərbaycanla münasibətləri düzəltmək əvəzinə, informasiya hücumlarını genişləndirir, Solovyov kimi təbliğatçıları isə bu planın ön cəbhəsinə çıxarır.

Nəticə etibarilə, Solovyovun növbəti hücumu Kremlin Azərbaycana qarşı açdığı informasiya müharibəsinin bir parçasıdır və bu, Moskvanın qərəzli mövqeyini bir daha təsdiqləyir.