2023-cü ildə keçirilən antiterror əməliyyatı ilə süqut etmiş “artsax” adlı qondarma qurum Ermənistanda fəaliyyətini davam etdirir. Separatçıların oyuncaq “dövlət naziri” Njde İskəndəryan vətəndaşları sentyabrın 2-də keçiriləcək mitinqə dəvət edib.

“2 sentyabr xalqımızın müasir tarixinin ən mühüm səhifələrindən biridir: bu, ”artsax" xalqının güclü iradə və sarsılmaz ruhla öz müstəqilliyini - azad və ləyaqətlə yaşamaq üçün ayrılmaz hüququnu elan etdiyi gündür".

O deyib: “Bu gün bir çoxumuz müxtəlif şəhərlərə və ölkələrə səpələnmiş olduğumuz zaman, biz həmişəkindən daha çox xatırlamalıyıq ki, ”artsax" sadəcə bir ərazi deyil, bizim şəxsiyyətimiz, tariximiz və əvəzolunmaz dəyərimizdir. Sentyabrın 2-də gəlin bir araya gələk, səsimizi ucaldaq, tariximizi unutmadığımızı, haqqımızdan əl çəkmədiyimizi, gələcək üçün mübarizə apardığımızı göstərək", - deyə mitinqə çağırış edib.

Həmçinin Daşnaksütyun partiyasının lideri İşxan Saqatelyan da sentyabrın 2-də İrəvanın Azadlıq meydanında keçiriləcək mitinqə hamını dəvət edib. “Artsaxın müstəqillik gününə həsr olunmuş mitinq keçiriləcək. Bu gün illərdir ki, erməni xalqının mübarizə və qələbə simvolu kimi qeyd olunur. ”Artsax" məsələsi həll olunmayıb. Azadlıq meydanında onlar “artsax” sakinlərinin öz vətənlərinə qayıtmaq hüququndan, məhbusların qaytarılmasından, ümumiyyətlə, hazırkı hakimiyyətin güc təhdidi altında xalqın adından xəyanətkarcasına sənədlər imzalamağa haqqı olmadığından danışacaqlar. Xalqın kollektiv hüquqları var ki, onlar qorunmalıdır", - o deyib.

Saqatelyanın sözlərinə görə, hakimiyyətin “artsax məsələsi”ni qapanmış kimi təqdim etmək cəhdləri özünü aldatmadır: “Xalqımız bununla razılaşmır, çünki 2023-cü ildə Azərbaycan tərəfindən həyata keçirilən soyqırımı və etnik təmizləmə nəticəsində insanlar öz vətənlərinin bir hissəsindən məhrum ediliblər və bundan sonra məsələnin bağlandığını söyləmək yolverilməzdir”.

Saqatelyan mitinqin əsas mövzularından birinin “hərbi əsirlərin problemi” olacağını vurğulayıb. “Hakimiyyətin qondarma sülh bəyanatlarına baxmayaraq, soydaşlarımız Bakı həbsxanalarında qalmaqda davam edir, Azərbaycan qoşunları isə suveren Ermənistan ərazisindədir. Mitinq zamanı bu tələblər və mövqelər aydın şəkildə ifadə olunacaq”.

Göründüyü kimi, sülhə qarşı pozuculuq fəaliyyəti göstərənlər hələ də cəfəng fikirlər səsləndirir, mitinqə çağırırlar. Bakı və İrəvan 8 avqustda sülh mətnini paraflayıb. Faktiki, saziş imzalanıb. Paşinyan Qarabağın Azərbaycana aid olduğunu təsdiq edib və bu günlərdə brifinqdə deyib ki, “Qarabağ hərəkatı”na imkan verməyəcək.

O zaman separatçıların və revanşist-radikal qüvvələrin 2 sentyabr hərəkətinə - mitinqə şərait yaradacaqmı?

Azad Vətən Partiyasının sədri Akif Nağı “Yeni Müsavat”a bildirdi ki, ermənilər bu cür təxribatları bundan sonra fasiləsiz olaraq edəcəklər. Çünki bu cür təxribatlar ermənilərin bədbəxt mübarizə formasıdır: “Bunlar illər boyu qətliamlar, cinayətlər törədirlər və nəhayət, onun cəzasını alandan sonra bütün dünyada başlayırlar özlərini yazıq, əzilən toplum kimi göstərməyə. Necə ki, 100 ildən artıqdır dünyaya şivən salıb Türkiyəni ermənilərə qarşı guya soyqırım törətməkdə şərləuirlər, bundan sonrakı yüz ildə də yəqin ki Azərbaycanı guya onlara qarşı ”soyqırım", “etnik təmizləmə”də ittiham edib dünyanı aldatmağa çalışacaqlar. Ermənilər Qarabağdan könüllü köçüb getdilər və bu hadisə dünyanın gözü qarşısında baş verdi. Bu köç zamanı bir nəfər də olsun erməni ölmədi, yaralanmadı. Bu da bütün dünyaya bəllidir. Belə olduğu halda ənənəvi erməni xisləti ilə “bizə qarşı soyqırım həyata keçirilib” vay-şivəni gülüncdür. Ermənilərin bir xeylisi yüz il öncə necə yanlış yoldaydılarsa, indi də eyni yanlış yola davam edirlər. İçərilərində az sayda normal düşüncəli adamlar var. Nikol Paşinyan və bu cür düşünənlər açıq deyirlər ki, yüz ildən artıqdır “soyqırım” hay-küyü ermənilərə, Ermənistana heç nə verməyib və bundan sonra da verməyəcək".

Partiya sədri vurğuladı ki, köhnə ənənəvi xəstə erməni xəttinə indi də Qarabağ ermənilərinin guya “soyıqırım” edildiyi uydurmalarını əlavə edirlər: “Ermənistanda bu xətti Daşnaksütyun, Robert Köçəryan, Serj Sərkisyan və onların əlaltıları kimi Qarabağdan köçmüş tör-töküntülər aparırlar və aparacaqlar. Digər xətt isə Nikol Paşinyanın apardığı xətdir. Paşinyanın apardığı xəttin güclənmə ehtimalı çoxdur. Çünki artıq ermənilərin də içərisində başa düşənlər var ki, ənənəvi zərərli xətt onlara xeyir gətirəsi deyil. Ona görə də Paşinyanın göstərdiyi yolla, xəttlə getsələr, bəlkə, onda Ermənistanın gələcəyi ola bilər. Mitinqə icazə verilib-verilməyəcəyinə gəlincə, ola bilər ki, Paşinyan demokrat olduğunu nümayiş etdirmək üçün 2 sentyabrda mitinqə imkan verəcək. Mitinqə icazə verilsə belə, onun heç bir nəticəsi olası deyil. Bir qrup başıpozuq erməni yığışıb çığır-bağır salıb dağılışacaq. Onların tərəfdarları getdikcə azalır. Mitinq olsa, bu bir daha görünəcək. Mənasız, perspektivsiz fəaliyyətə ciddi bir xalq dəstəyinin olacağı gözlənilmir. 2 sentyabrda nəzərdə tuutlan mitinq baş tutsa da, bu, sülh prosesinə təsir eləməyəcək. Çünki kiçik qruplardır və sosial bazaları yoxdur”.

A.Nağı dedi ki, Rusiya həmin ağılsız revanşist qüvvələrdən istifadə etməyə, oların aksiyalarını körükləməyə çalışacaq. Amma yenə də ciddi nəticə olmayacaq: “2 sentyabrda keçiriləcək mitinqin geniş və davamlı vüsət alan aksiyalara çevrilməsi mümkün deyil”.

“Yeni Müsavat”