Goranboy sakini olan usta Xocalıdakı evlərdə təmir işi ilə məşğul olarkən oradan odlu silah – 7.62 mm kalibrli “Kalaşnikov” konstruksiyalı avtomat tapdığını bildirir.

Bizimyol.info xəbər verir ki, əslən Kəlbəcərdən olan, lakin Goranboy rayonunun Qaraçinar kəndində yaşayan 1982-ci il təvəllüdlü Gündüz Əliyev qanunsuz silah saxlama ittihamı ilə həbs olunub. İttihama əsasən, Goranboy Rayon Polis Şöbəsinin əməkdaşlarına onun üzərində silah olması barədə əməliyyat məlumatı daxil olub. Polislər onun Xocalıdan gələrkən yolda mindiyi “Ford Transit” markalı avtomobili saxlayıb. Avtomobilin yük yerinə baxış keçirərkən çantanın içindən yorğana bükülmüş silah tapılıb. O, etiraf edib ki, silah ona məxsusdur və rəngsaz işlədiyi Xocalı rayonunun Ballıca kəndindəki evdən tapıb. Onun sözlərinə görə, ailəsini dolandırmaq üçün ustalıqla məşğuldur.

“Bakı Abadlıq” şirkəti Xocalı rayonu ərazisində iş götürüb və orada dağılmış evlərin təmiri ilə məşğuldur. O da, həmin şirkətlə razılaşaraq, Xocalı rayonu Ballıca kəndi ərazisində fərdi yaşayış evlərinin rəngsaz işlərini görüb. Təmir etdiyi evdə tək işlədiyini deyən təqsirləndirilən şəxsin sözlərinə görə, həyətyanı sahədə təxminən 500-mm diametrində, 2 metr uzunluğunda dəmir borunun olduğunu görüb. Həmin dəmir boru diqqətini cəlb etdiyi üçün içinə baxıb və qundağı qatlanmış avtomat olduğunu görüb. Bundan sonra, həmin silahı götürüb ki, Goranboya – yaşadığı evə aparsın: “Evdə olan yorğana bükdüm. Öz geyimlərimi yığdığım iri çantanın içinə qoydum. Axşam saat 6 radələrində yol kənarına çıxdım. Xankəndi-Ağdam yolunda ağ rəngli “Ford Transit” markalı yük avtomobilinin gəldiyini gördüm. Əl edib, saxlamasını istədim. Sürücü saxladı”.

Təqsirləndirilən şəxs əlavə edib ki, sürücü çantanın içində silah olduğunu bilməyib. Yolda onları polislər saxlayıb.

Goranboy Rayon Məhkəməsinin hökmü ilə o, Cinayət Məcəlləsinin 228.1 (qanunsuz silah saxlama) maddəsi ilə təqsirli bilinərək, 2 il azadlıqdan məhrum edilib.

Qeyd edək ki, Daxili İşlər Nazirliyi dəfələrlə ictimaiyyətə müraciət edərək, silahları könüllü şəkildə təhvil verməyə çağırıb. Silahı könüllü şəkildə təhvil verən şəxs cinayət məsuliyyətindən də azad olunur.