Azərbaycanda mobil rabitə xidmətləri ilə bağlı vətəndaş narazılığı son günlərdə daha da artıb.

Xüsusilə ölkənin aparıcı operatorlarından biri olan “Azercell”-in yeni tarif dəyişikliyi ictimaiyyətdə rezonans doğurub.Sosial şəbəkələrdə və medianın müxtəlif platformalarında səsləndirilən əsas narazılıq isə qiymətlərin qalxması, lakin xidmət keyfiyyətində nəzərəçarpacaq irəliləyişin olmamasıdır.

Digər mobil operatorların da təklif etdiyi paketlərin qiymətləri çox zaman istehlakçıların büdcəsinə uyğun gəlmir. Bu vəziyyət ölkədə mobil rabitə bazarındakı rəqabət mühitinin zəifliyini bir daha gündəmə gətirib.

Bəs ölkə mobil rabitə bazarında real rəqabət mühiti formalaşdırmaq və tariflərin daha münasib olmasını təmin etmək üçün Azərbaycanda dördüncü mobil operatorun fəaliyyətə başlaması nə dərəcədə məqsədəuyğundur? Bu, qiymət siyasətinə və xidmət keyfiyyətinə necə təsir göstərə bilər?

İqtisadçı-ekspert Fuad İbrahimov “Cebheinfo.az”-a açıqlamasında bildirib ki, Azərbaycanda mobil rabitə bazarında sağlam rəqabət mühiti formalaşmayıb:

“Bu da özünü çox aydın şəkildə göstərir. Bəzən çıxış yolu kimi dördüncü operatorun bazara daxil olmasını təklif edirlər. Amma gəlin səmimi olaq: əgər o da mövcud operatorlarla eyni oyunu oynayacaqsa, biz sadəcə yeni bir iştirakçının qazanc əldə etməsinə şahid olacağıq. Reallıq budur ki, nə qiymətlərdə, nə xidmət keyfiyyətində, nə də istehlakçı hüquqlarının qorunmasında irəliləyiş yoxdur.

Əgər bu məsələlərə dərindən baxsaq, çox sayda neqativ nümunələrlə qarşılaşarıq: yersiz SMS-lər, vətəndaşın razılığı olmadan qoşulduğu proqramlar, hesabdan əsassız şəkildə çıxarılan vəsaitlər... Bütün bunlar sistematik hal alıb. İnsan 1-2 manat itirir, amma bu məbləğ üçün vaxt itirmək istəmir. Amma nəticə etibarı ilə milyonlarla vəsait bu formada vətəndaşların ciblərindən çıxarılır".

O qeyd edib ki, əgər biz dördüncü operatorun ölkəyə gətirilməsini çıxış yolu hesab ediriksə, bu, sadəlövhlük olar.

"Burada əsas məsələ rəqabət mühitinin formalaşmasıdır. Bunun üçün isə ilk növbədə dövlət tərəfindən ciddi nəzarət və müdaxilə mexanizminə ehtiyac var. Sistemin şəffaflaşdırılması mütləqdir. Bu mexanizm müvəqqəti olsa belə, tətbiq edilməlidir ki, vətəndaşların hüquqları qorunsun, pulları mənimsənilməsin.

Hazırda verilən pul qarşılığında xidmət yoxdur. Sadəcə vəsaitlər müxtəlif yollarla silinir. Hər operator bacardığı qədər istifadəçidən pul çıxarır. Dördüncü, beşinci operator da gəlsə, əgər eyni sistem daxilində fəaliyyət göstərəcəksə, bu, heç nəyi dəyişməyəcək. Artıq bu sahəyə inam qalmayıb”.

Ekspert hesab edir ki, əgər doğrudan da sağlam rəqabət mühiti yaradılacaqsa, bu, nəticədə özünü kütləvi şəkildə istifadəçilərin bir operatoru tərk edib digərinə keçməsi ilə göstərəcək:

"Bu isə digər operatorları da daha yaxşı xidmət təqdim etməyə məcbur edəcək. Bax, bu, sağlam rəqabətdir.Hazırda isə ölkədə üç əsas mobil operator var və hamısı bir-biri ilə anlaşma şəraitində hərəkət edir. Biri SMS-lə soyur, biri internetlə, digəri isə roaming və danışıq tarifləri ilə. Yəni bir tərəfdən güzəşt edirlərsə, digər tərəfdən istifadəçini "soyurlar". Bu açıq-aşkar sövdələşmədir.

Təəssüf ki, nəticədə vətəndaş istədiyi xidməti də ala bilmir, qiymət baxımından da itirir. Məsələn, biri hansısa operatorun xidmətindən narazı qalır, digərinə keçir, amma orada da fərqli problemlərlə qarşılaşır.

Mən şəxsən hər üç operatorun xidmətindən istifadə edirəm və üçündən də narazıyam. Xarici səfərlərim zamanı mütləq həmin ölkənin yerli operatorunun xidmətlərindən istifadə edirəm. Çünki həm keyfiyyət, həm də qiymət baxımından daha əlverişli olur. Bizdə isə vəziyyət elədir ki, bu sahədə regionda ən geridə qalmış ölkəyə çevrilmişik. Bu gün operatorların fəaliyyətini tənzimləyən şəffaf və sərt mexanizmlər tətbiq edilməlidir”.