Son illərdə Ermənistanın siyasi-ictimai çevrələrində qadınların hərbi xidmətə çağırılması ilə bağlı başlayan müzakirələr davam etməkdədir. Sabit emiqrasiya ilə əhalinin azalması tendensiyası işğalçı ölkənin ordusunda qadınların xidmət keçməsini zərurətə çevirib və bunun üçün ordu strukturlarında dəyişikliklərin edilməsinə ehtiyac yaranıb.
Ermənistanda bu məsələ ilə bağlı aparılan “islahatlar”ın mədəni dünyanın tələbi olduğu bildirilsə də, əsas məqsəd Ermənistan ordusunda insan resursu ilə bağlı yaşanan problemi həll, daha dəqiq desək, ört-basdır etməkdir. Ermənistanda davam edən acınacaqlı sosial-iqtisadi vəziyyət kişilərin kütləvi surətdə ölkəni tərk etməsi ilə xarakterizə olunur və işğalçı ölkənin üzləşdiyi demoqrafik fəlakət, ordu strukturunu məhv edir. İndi isə Ermənistan orduda yaşanan kadr böhranını qadınların hesabına həll etməyə çalışır.
Ermənistanın Baş naziri Nikol Paşinyan hökumətin iclasında təkrar bu məsələyə toxunub. Nikol qeyd edib ki, qadınların hərbi xidmətə cəlb edilməsi prosesi son dərəcə ləng gedir. Bu prosesi bir qədər sürətləndirmək və orduda qadınların sayını artırmaq lazımdır: “Çətinliklərin olduğu aydındır. Amma etiraf etməliyik ki, əhalimizin əksəriyyətini qadınlar təşkil edir. Əgər onların potensialından tam istifadə etməsək, ölkəmizin inkişaf yolunu bağlayacağıq” .
Müdafiə naziri Suren Papikyan isə deyib ki, qadınların orduya cəlb olunmasında problemlər var. Hər dəfə hərbi xidmətə çağırış zamanı ən azı iki qadın orduya könüllü gedir və onların əksəriyyəti xidmətini davam etdirir.
Paşinyan da bildirib ki, bizə həndəsi irəliləyiş lazımdır, ən azı 50-100 nəfərlik göstəriciyə çatmalıyıq. Bəli, stereotiplərlə bağlı problemimiz var. Bu istiqamətdə hərəkət etmək üçün bizə sərt addımlar atmaq lazımdır.

Hərbi ekspert Elxan Şıxəliyev də “Sherg.az”a açıqlamasında deyib ki, Ermənistan ordusuna qadınların cəlb olunması yeni təklif deyil, daha əvvəl də bu məsələ gündəmə gətirilib, müxtəlif fikirlər səsləndirilib. Onun sözlərinə görə, müharibədən sonra Paşinyan ordu və hərbi sistemin yenilənəcəyini açıqlamışdı:

“Bu "yeniliklərdən" biri də qadınların orduda iştirakıdır. Söhbət qadınların potensialından maksimum dərəcədə istifadə olunmasından gedir. Ermənistan ordusuna qadınların cəlb olunması ordunun komplektləşdirilməsində şəxsi heyətin çatışmazlığı sindromundan qaynaqlanır. Son 3-4 ildə Ermənistanda bu məsələ ciddi müzakirə mövzularından birinə çevrilib. Məsələ qanunvericilikdə də öz əksini tapıb. Lakin görünən odur ki, qadınlar erməni ordusunda xidmət etməkdə maraqlı deyillər".

Ermənistanda ordunun komplektləşdirilməsi məsələsinin ciddi problemə çevrildiyini vurğulayan ekspert deyib ki,
44 günlük müharibədə və antiterror əməliyyatları zamanı yaşadıqları məğlubiyyət erməni cəmiyyətində ümidsizlik, xəyal qırıqlığı yaradıb:

“Onlarda artıq orduda xidmət prioritet olaraq qiymətləndirilmir. Ermənistan ordusunun acı məğlubiyyəti ermənilər arasında ordudan yayınma hallarına gətirib çıxarıb. Nəinki qadınlar, kişilər də hərbi xidmətə getmək istəmir. Ermənistan ərazisində yaşayan ermənilər müxtəlif yollarla müharibədə iştirakdan yayınır və orduda xidmət etmək istəmirlər.
Müharibədə də çoxsaylı itkilər də verdilər, yaralılar oldu deyə orduda şəxsi heyətin komplektəşdirilməsində ciddi problem var. Ermənistan rəhbərliyi ordu sıralarında yaranan əsgər çatışmazlığını aradan qaldırmaq üçün qadınların xidmətindən istifadə etməyə başlayıb. İşğalçı ordunun qadınların ümidinə qalması Ermənistanın düşdüyü vəziyyəti açıq şəkildə ortaya qoyub.
Halbuki Ermənistan Azərbaycanın tələblərini qəbul edərək sülh sazişini imzalayaraq müharibə ritorikasını minimuma endirməklə ordusunu qadınların ümidinə buraxmamış olar” .