Azərbaycanda “Temu” onlayn alış-veriş platformasında satışa çıxarılan bəzi məhsullar ictimai narazılığa səbəb olub.

Azərbaycan xalqı üçün xüsusi mənəvi və tarixi əhəmiyyət daşıyan 8 Noyabr - Zəfər Günü və Zəfər abidəsinə aid simvolların hamam aksesuarları, corablar və unitaz üçün ayaqaltılar üzərində təsvir edilməsi cəmiyyətdə milli dəyərlərə hörmətsizlik kimi qiymətləndirilir.

Sosial şəbəkələrdə geniş müzakirələrə yol açan məsələ ilə bağlı aidiyyəti qurumların mövqeyi tələb olunur.

Maraqlıdır, buna qarşı hansı hüquqi addımlar atıla bilər?

Məsələ ilə bağlı “Vətəndaşların Əmək Hüquqlarını Müdafiə Liqası”nın İcraiyyə Komitəsinin sədri Sahib Məmmədov "Cebheinfo.az"-a açıqlamasında bildirib ki, sözügedən platformanın Azərbaycanda rəsmi nümayəndəliyi olmadığı təqdirdə hər hansı hüquqi tədbir görmək olduqca çətin olacaq.

Onun sözlərinə görə, şirkətin yerləşdiyi ölkəyə müraciət edilməsinin real nəticə verməsi ehtimalı azdır:

"Onların burada nümayəndəliyi yoxdursa, tədbir görmək çətin olacaq. Onların yerləşdiyi ölkəyə bunu yazmağın faydası olmayacaq. Bu halda yeganə effektiv yol platformanın ölkə ərazisində bloklanması ola bilər.

Belə ki, bloklama tətbiq edildiyi təqdirdə, şirkət nə öz məhsullarını Azərbaycanda sata, nə də reklam fəaliyyəti göstərə bilər. Yeganə yolu bunu görürəm".

Sahib Məmmədov əlavə edib ki, əgər platformanın ölkəmizdə rəsmi nümayəndəliyi olsaydı, onlara qarşı hüquqi tələblər irəli sürmək mümkün olardı:

"Lakin bu da ciddi nəticə verməyə bilər. Çünki o platforma qlobal şəbəkədir və reklam siyasəti bütün ölkələr üçün eyni prinsiplə həyata keçirilir. Mövcud vəziyyətdə ən real və təsirli addım məhz bloklama mexanizmidir".