Xəbər verildiyi kimi, “Aqrolizinq” Açıq Səhmdar Cəmiyyətinin (ASC) bir qrup məsul işçisinə Baş prokuror yanında Korrupsiyaya qarşı Mübarizə Baş İdarəsi tərəfindən cinayət işi açılmışdır və dünən Baş Prokurorluğun Mətbuat Xidmətindən "Təzadlar"a verilən rəsmi məlumatda deyilirdi ki, artıq istintaq yekunlaşıb və iş məhkəməyə göndərilib.
Lakin ASC-nin keçmiş sədri Əli Bayramov bu gün "Təzadlar"ın bu məzmunlu yazısı ilə bağlı Publika.az-a açıqlamasında maraqlı açıqlama verərək, hətta "Təzadlar"a qarşı ona yaraşmayan ifadələr işlədib: “Bu adamlar məndən əl çəkmək istəmir. Axı mən bunlara nə etmişəm? Yəqin ki, bu cür yazıları xüsusi adamlar yazdırır. İnanın ki, mən ömrüm boyu heç kəsə pislik etməmişəm. İndiyədək heç kimi sancmamışam. Mənə də çox təəccüblüdür ki, mənim haqqımda bu yazılara nə üçün yazırlar. Tez-tez yazırlar ki, amanın gündür, qoymayın, Əli Bayramov yeyib taladı, ölkədən qaçıb getdi və sairə. Axı dövlətin malını kim yeyə bilər? Yeyənin yeri hamıya məlumdur ki, haradır. Axı əllərində heç bir əsas olmadan, nə üçün mənim haqqımda şər-böhtan yazırlar? İndi gərək ki, bunları məhkəməyə verim? Axı mən heç kəsə, heç bir nazirliyə qarşı da ədavətdə olmamışam. Mənim başqa dövlət qurumları ilə heç bir problemim də olmayıb. Mənim ancaq Kənd Təsərrüfatı Nazirliyi ilə əlaqəm olub. Yəni, mənə qarşı bu şər kampaniyaları oradan gəlir? Axı mənim bu nazirlikdə çalışan adamlarla da heç bir problemim olmayıb. Nazir Heydər Əsədovun özü ilə, nazir müavini İlham Quliyevlə işdən gedəndən bəri neçə dəfə görüşüb söhbət etmişəm. Hətta, aqrolizinqlə bağlı ortaya suallar çıxanda, məsləhət lazım olanda, mənimlə danışırlar. Yəni, aramızda heç bir soyuq münasibət yoxdur. Hər şey yüksək səviyyədədir. Bundan əlavə, mən işdən çıxandan sonra nazirliyə və “Aqrolizinq” ASC-yə dəfələrlə gedib-gəlmişəm. Əvvəldən necə xoş münasibətim olubsa, bu münasibətlər indi də yerindədir. Ona görə də mən Kənd Təsərrüfatı Nazirliyindən şübhələnmirəm. Çünki bizim aramızda heç bir ədavət və ya prinsipial məsələ olmayıb. Prokurorluqla da münasibətlərim çox normaldır. Hətta, mən vaxtilə şübhəli adamların adlarını prokurorluğa təqdim etmişdim, onlar da onun barəsində araşdırma aparıb ölçü götürmüşdü. Prokurorluqdan da mənə heç bir müraciət göndərilməyib. Əgər mənim hər hansı cinayət əməlim olsaydı, o zaman indi mən Kənd Təsərrüfatı Nazirliyinə və digər qurumlara gedib-gələ bilərdimmi? Heç özləri mənə yaxın dayanmazdı. Çünki cinayət əməli olan adamdan hamı çalışır ki, kənar qalsın. Ona görə də bütün bu yazıların hamısı cəfəngiyatdır. Axı bir gün yazıb-yazıb yorulacaqlar. O, “Təzadlar” qəzeti mən işləyən dövrdən bəri ağılına gələni yazır. Mən isə fikir vermirəm. Yəqin ki, bununla məndən nə isə umurlar. Düşünürlər ki, bəlkə mənə “xox” gəlməklə nə isə əldə edərlər. Vaxtilə elələri çox olub, haqqımda yazı yazıb, sonra da mənə zəng vururlar. Bu adamların vicdanları yoxdur. Düşünmürlər ki, qarşı tərəf götürüb məni məhkəməyə verər, qalaram çətin vəziyyətdə. Axı bu qədər də olmaz? Bir daha deyirəm, bu cür yazılar tamamilə yalan və böhtandır”.
Asif Mərzili Əli Bayramovun cavabını verdi
"Təzadlar"ın baş redaktoru Asif Mərzili Əli Bayramovun rəhbərlik etdiyi qəzetə qarşı səsləndirdiyi ittihamlara cavab verdi:
-Məsələ ondadır ki, qəzetin bu günkü sayında vəd etdiyimiz kimi, qəzetin növbəti sayında "Aqrolizinq"lə bağlı geniş ciddi araşdırma yazısı dərc ediləcək...Görünür hörmətli Əli müəllim bundan bərk narahat olaraq qəzeti məhkəmə ilə hədələyib qorxutmaq istəyib. Sonra isə keçib yalnış fikirlər səsləndirməyə. Məsələn, Ə.Bayramov yazır: "..."Təzadlar” qəzeti mən işləyən dövrdən bəri ağılına gələni yazır. Mən isə fikir vermirəm. Yəqin ki, bununla məndən nə isə umurlar. Düşünürlər ki, bəlkə mənə “xox” gəlməklə nə isə əldə edərlər. Vaxtilə elələri çox olub, haqqımda yazı yazıb, sonra da mənə zəng vururlar. Bu adamların vicdanları yoxdur. Düşünmürlər ki, qarşı tərəf götürüb məni məhkəməyə verər, qalaram çətin vəziyyətdə. Axı bu qədər də olmaz? Bir daha deyirəm, bu cür yazılar tamamilə yalan və böhtandır”.
Bildirirəm ki, Əli Bayramov yanlış düşünür, uzun illər o boyda vəzifədə işləmiş şəxs elə bilirmiş ki, jurnalist tənqidi yazı yazırsa, mütləq nəsə umur. Görünur, Əli Bayramov regional idarələrə ayrılan texnikalara dair sənədlərə imza atanda belə olurmuş, nəsə umulurmuş... Amma qısa olaraq onu deyə bilərəm ki, əvvəla, "Təzadlar" əvvəllər heç vaxt Əli Bayramovun əleyhinə yazı yazmayıb. Ona, özü demiş, "XOX" da gələn olmayıb... Və "Təzadlar"ın əməkdaşlarından da kimsə və nə vaxtsa Əli Bayramovdan yazıb ona zəng etməyib. Əksinə, Hesablama Palatası "Aqrolizinq"lə bağlı yoxlamaya yekun vuranda və Əli müəllim müalicə adı altında Türkiyəyə gedərək aradan çıxanda biz onu axtarmışıq ki, neçə aydır Satınalmalar üzrə Dövlət Agentliyindən, digər Qurumlardan əldə etdiyimiz sənədlərdəki dəhşətli rəqəmlərin arxasında nələrin və kimlərin durduğunu soruşaq. Amma onu tapa bilməmişik, iş yerində də ondan narazılıqla "Yoxdu..., nə bilək hardadır" deyiblər. Amma "Təzadlar"ın Araşdırma Qrupu neçə ay əvvəl ortaya konkret sənəd qoydu. Orada on milyonlarla manat pulun internetdə adicə saytı, hüquqi ünvanı belə olmayan MMC-lərə necə verilməsi, 10 milyon manat pulu alan və ölkəyə gübrə, 10 milyonluq inək gətirməli və s. olan çoxsaylı MMC-lərin arxasında kimlərin dayanması... soruşulurdu. Onların bir çoxunun nə yeri var, nə də yurdu. İldə on milyonlarla manat pul ayrıldığı halda, taxılyığan kombaynlar harada idi ki, Naxçıvanda, Ucarda, Xaçmazda... fermerlər AzTV-də kombayn olmaması üzündən taxılın sahədə qaldığından, məhv edilməsindən şikayət edirdilər?
Biz bunların hesabını sormuşuq Əli Bayramovdan. O isə deyir ki, "...Bundan əlavə, mən işdən çıxandan sonra nazirliyə və “Aqrolizinq” ASC-yə dəfələrlə gedib-gəlmişəm. Əvvəldən necə xoş münasibətim olubsa, bu münasibətlər indi də yerindədir. Ona görə də mən Kənd Təsərrüfatı Nazirliyindən şübhələnmirəm. Çünki bizim aramızda heç bir ədavət və ya prinsipial məsələ olmayıb. Prokurorluqla da münasibətlərim çox normaldır. Hətta, mən vaxtilə şübhəli adamların adlarını prokurorluğa təqdim etmişdim, onlar da onun barəsində araşdırma aparıb ölçü götürmüşdü".
Belə çıxır ki, indi məhkəmə qarşısında sorğu-sual ediləcək "Aqrolizinq" əməkdaşlarını Əli Bayramov ələ verib, yəqinki özünü xilas etmək üçün... Rəhbər öz işçisini ələ verirsə, bunun adı nədir??? İşçi korrupsiyaya yol verir, Əli Bayramovun isə məsuliyyəti yoxdur! Bu absurddur. Amma "Təzadlar"a elə bu gün daxil olmuş məlumatda deyilir ki, əksinə, məhkəmədə təqsirləndirilənlər hər şeyi açıb deyəcəklər, bütün qanunsuz işləri Əli Bayramovun göstərişi ilə etdiklərini bildirəcəklər... Daha geniş açıqlama "Təzadlar"ın 25 sentyabr tarixli sayında olacaq. Əli müəllimin oxuması məsləhətdir...
"Təzadlar"ın Araşdırma Qrupu
