İtaliyanın Augusta limanında CIF bazisi üzrə Azərbaycanın “Azeri Light” markalı neftinin qiyməti əvvəlki göstərici ilə müqayisədə 4,72 ABŞ dolları və ya 5,08 faiz artaraq bir barel üçün 97,61 ABŞ dollarına çatıb.
Bu barədə neft bazarı iştirakçılarının məlumatında bildirilib.
Qeyd olunub ki, Türkiyənin Ceyhan limanında FOB bazisi üzrə “Azeri Light” markalı neftin bir barelinin qiyməti 5,02 ABŞ dolları və ya 5,59 faiz artaraq 94,74 ABŞ dolları təşkil edib.
“Urals” markalı xam neftin qiyməti əvvəlki göstərici ilə müqayisədə 5,05 ABŞ dolları və ya 7,66 faiz artaraq bir barel üçün 70,98 ABŞ dollarına çatıb.
Şimal dənizində hasil edilən “Dated Brent” markalı neftin qiyməti isə əvvəlki göstərici ilə müqayisədə 4,32 ABŞ dolları və ya 4,82 faiz artaraq bir barel üçün 93,96 ABŞ dolları olub.
Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.
"Trading Economics"in məlumatına görə, çərşənbə günü xam neftin qiyməti bir barel üçün 91 dollara yaxınlaşıb. Neft ardıcıl üçüncü sessiyada bahalaşaraq son təxminən altı həftənin ən yüksək səviyyəsinə çatıb. Bildirilib ki, buna ABŞ və İran arasında gərginliyin artması və Yaxın Şərqdən enerji axınlarının daha da pozula biləcəyi ilə bağlı narahatlıqlar səbəb olub.
"ABŞ hərbçiləri Hörmüz boğazı ətrafında İranın mövqelərinə yeni zərbələr endirib. Prezident Donald Tramp bildirib ki, zərbələr İranın su yoluna mina yerləşdirmək cəhdlərinə və daha əvvəl ABŞ hərbi bazasına həyata keçirdiyi hücuma cavab olaraq endirilib. Tramp həmçinin İranın cavab tədbiri görəcəyi təqdirdə daha genişmiqyaslı cavab veriləcəyi ilə bağlı xəbərdarlıq edib.
İran isə artıq bölgədəki ABŞ bazalarını hədəf aldığını və İordaniyaya doğru raketlər atdığını açıqlayıb.
Bu arada, ABŞ-ın maliyyə naziri Skott Bessent İranın müflisləşməsinin “sürətlənmə mərhələsində” olduğunu bildirib. Bununla yanaşı, o qeyd edib ki, bazar ertəsi günü Hörmüz boğazından 17 milyon barel xam neft keçib. Bu isə İranın strateji su yoluna tam nəzarət etmədiyini göstərir", - məlumatda qeyd edilib.
TREND
