Baş nazir Nikol Paşinyan yeni çağırış parlamentin formalaşması ilə əlaqədar Nazirlər Kabinetinin yaxın günlərdə səlahiyyətlərini təhvil verərək istefaya gedəcəyini açıqlayıb.

“Milli Assambleyanın formalaşması ilə əlaqədar bazar günü hökumət istefa verəcək. Bundan sonra Ermənistan prezidenti parlament çoxluğunun irəli sürdüyü namizədi baş nazir təyin edəcək. Beləliklə, biz hazırkı tərkibdə sonuncu dəfə toplaşırıq”, – deyə Paşinyan vurğulayıb.

Yeni Nazirlər Kabineti Azərbaycan-Ermənistan sülh prosesi və regiondakı geosiyasi vəziyyətə necə təsir göstərəcək?

Siyasi təhlilçi Sona Əliyeva Musavat.com-a bildirib ki, Ermənistanda baş verən proseslərə hüquqi və institusional baxımdan yanaşmaq daha doğru olar: “Paşinyan hökumətinin istefası parlament seçkilərindən sonra konstitusiyanın tələb etdiyi prosedurun tərkib hissəsidir. Yəni burada söhbət yeni parlamentin formalaşması ilə hökumətin səlahiyyətlərinin yenilənməsindən gedir. Ermənistandakı mövcud siyasi mənzərə isə göstərir ki, Paşinyan parlament çoxluğunun dəstəyi ilə yenidən baş nazir olacaq. Həmçinin, Nazirlər Kabinetində də radikal kadr islahatlarının olacağını düşünmürəm. Son aylarda baş verənlər fonunda görünən odur ki, Paşinyan əsas güc mərkəzlərini qorumağa çalışacaq. Müdafiə, xarici siyasət və təhlükəsizlik blokunda davamlılığın saxlanılması həm daxili sabitlik, həm də beynəlxalq tərəfdaşlara proqnozlaşdırıla bilən idarəetmə mesajı vermək baxımından vacibdir”.

Onun fikrincə, daha çox dəyişikliklərin hökumət aparatında və icra hakimiyyətinin orta idarəetmə səviyyəsində baş verməsi ehtimalı yüksəkdir: “Əsas məsələ Ermənistanın daxili siyasi transformasiyasıdır. Buraya konstitusiya islahatları, dövlət institutlarının yenidən təşkili, iqtisadi dayanıqlığın artırılması və cəmiyyət daxilində mövcud siyasi qütbləşmənin idarə olunması daxildir”.

Siyasi təhlilçi Ermənistanın xarici siyasətində də kəskin dönüş gözləmir: “Ermənistan son illərdə Qərblə münasibətləri genişləndirməyə çalışsa da, eyni zamanda, Rusiya ilə təhlükəsizlik və iqtisadi əlaqələri tam şəkildə qoparmaq imkanına malik deyil. Buna görə də yeni hökumət əvvəlki kimi çoxvektorlu və balanslaşdırılmış xarici siyasət kursunu davam etdirməyə çalışacaq.

Bu balansı qorumaq isə regionda artan geosiyasi rəqabət fonunda getdikcə daha mürəkkəb vəzifəyə çevrilir. Azərbaycan-Ermənistan münasibətləri baxımından hökumətin yenilənməsi prosesin mahiyyətini dəyişmir. Sülh danışıqlarının taleyini siyasi iradə və üzərinə götürülmüş öhdəliklərin yerinə yetirilməsi müəyyən edəcək. Əgər Ermənistan rəhbərliyi sülh sazişinin imzalanmasına mane olan hüquqi və siyasi məsələlərin həlli istiqamətində real addımlar atarsa, danışıqların sürətlənməsi mümkündür”.

Musavat.com