Milli Məclisin deputatı Hikmət Babaoğlu müxalif qüvvələrin ABŞ-nin vitse-prezidenti Ceyms Devid Vensdən Azərbaycanda siyasi fəaliyyətinə görə həbs edildiyi iddia olunan şəxslərin azadlığa buraxılma məsələsinin qaldırmasını istəmələrinə münasibət bildirib.

Deputat Pravda.az-a açıqlamasında deyib ki, Azərbaycanda müxalifətin mövqeyi yenə milli maraqların əleyhinədir.

Onun sözlərinə görə, bu gün elə bir dərin miqyasda, strateji kontekstdə hadisələr baş verir ki, milli mövqe burda həmrəylik ifadə edərək ortaya çıxmalıdır: “Söhbət dövlətin və millətin maraqlarından gedir. Dövlətin və millətin maraqları olan yerdə isə artıq müxalif mövqe olmamalıdır. Belə bir vaxtda bəzi müxalifətçilərin müxtəlif fikirlər səsləndirmələri, guya Azərbaycanda müxalif siyasətçilərin həbsdə olması məsələsini qaldırmaq cəhdləri diqqəti ümummilli maraqlardan yayındırmaqla Azərbaycana zərbə vurmaq məqsədi daşıyır. Bu gün dövlətimiz gələcək yüz illik perspektivini və inkişafını müəyyənləşdirəcək strateji addımlar atır. Bu, təkcə Cənubi Qafqaz regionundan ibarət strateji addımlar deyil. Bütövlükdə, son iki yüz illik tariximizdə baş vermiş hadisələrlə birbaşa bağlıdır. Nəticə etibarilə, dövlətimizin və xalqımızın taleyi baxımından mühüm əhəmiyyət kəsb edən xeyli sayda strateji məsələlərin müzakirə olunacağı bir vaxtda Azərbaycan dövlətinin imicinə zərbə vuracaq "siyasi məhbus" məsələsini gündəmə gətirmək cəhdləri müxalifətin yenə sülhə və dövlət maraqlarımıza ziyan vurmaq cəhdləri kimi qiymətləndirilməlidir”.