Ermənistanda iyunda keçiriləcək parlament seçkiləri yaxınlaşdıqca gərginlik durmadan artır. Ölkənin baş naziri Nikol Paşinyanın kreslosu üçün kritik dönəmdən keçdiyini desək, yanılmarıq. Ona qarşı revanşist qüvvələr vahid cəbhədə birləşməkdədir. Bu da Nikolun seçkilərdə qələbə şanslarını durmadan azaldan əsas faktorlardan biri kimi qələmə verilir.

Seçkilər fonunda bir sıra suallar da yaranmamış deyil. Ermənistan-Azərbaycan arasındakı sülh sazişi seçkilərə qədər imzalanarsa, bu, Paşinyanın siyasi taleyini xilas edən fürsətə çevrilə bilərmi?

Bu sualın ardından yeni bir sual da aktuallaşıb.

Sülh sazişinin tərəflərin razılığı ilə iyundan öncəki aylardan birinə salınması mümkündürmü?

Bu sual da təsadüfi yaranmayıb. Belə ki, ötən il avqustun 8-də Ağ Evdə əldə olunan sülh öncəsi yekun paraflanma sənədinin imzlanmasından sonra belə fikirlər yaranıb ki, sülh sazişi seçkilərdən sonra baş tutacaq.

Qeyd edək ki, ABŞ-nin yüksək səviyyəli nümayəndəsi, vitse-prezident Devid Vensin 9-10 fevralda Ermənistana, 10-11 fevral günlərində Azərbaycana səfəri baş tutacaq.

Vensin Bakı və İrəvana başlayacaq səfəri fonunda yuxarıda qeyd etdiyimiz suallar daha da aktuallaşıb. Bu səfərdə hər iki ölkədə Vensin Nikol üçün “ölüm-dirim” savaşı sayılan seçkiləri və bunun fonunda sülh sazişini müzakirə edəcəyi şübhəsizdir.

Paşinyan da yaxşı anlayır ki, seçkiyə parçalanmış cəmiyyət, zəif legitimlik və bitməyən münaqişə yükü ilə getmək risklidir. Məhz buna görə sülh sazişinin imzalanması, yaxud ən azı imzalanmağa çox yaxın göstərilməsi - seçkilərdən öncəyə çəkilməsi onun üçün siyasi “əl gücləndirən kart” rolunu oynaya bilər.

Siyasi təhlilçi Sona Əliyeva Musavat.com-a yaranan bu suallar ətrafında deyib ki, Azərbaycanın sülh üçün şərtləri son dərəcə aydındır:

“Bakı İrəvandan tələb edir ki, Ermənistan Azərbaycana qarşı ərazi iddialarından əl çəkməlidir. Əgər baş nazir Nikol Paşinyan seçkilərdə qalib gəlmək istəyirsə, o zaman referendumu seçkilərdən əvvələ çəkə bilər. Seçkilər Ermənistanın daxili məsələsidir. Sülh sazişinin imzalanması isə son dərəcə həssas qlobal məsələyə çevrilib. Əgər Ermənistan qısa zamanda sülh sazişinin imzalanmasını istəyirsə, o zaman Azərbaycan və Türkiyəyə qarşı ərazi iddialarından rəsmi şəkildə əl çəkməlidir. Seçkilərdən əvvəl referendum keçirilsə, konstitusiyaya dəyişiklik edilsə, o zaman erməni xalqı Nikol Vovayeviçə daha 5 il müddətinə hökumət rəhbəri kürsüsünü həvalə edə bilər.

Düşünürəm ki, Nikol Paşinyan vəziyyəti doğru təhlil edib referendumun vaxtını bir qədər tezləşdirə bilər”.