Ermənistan Xarici İşlər Nazirliyinin sözçüsü Ani Badalyan Rusiya hərbçilərinin ölkəni tərk edib-etməyəcəyi ilə bağlı ölkədə aparılan müzakirələrdən danışıb. Nazirlik rəsmisi "rus əsgərləri İranla sərhəddə patrul həyata keçirir. Sülh müqaviləsi bu əsgərlərin gedəcəyi anlamına gəlirmi?" sualına belə cavab verib: "Bu, Rusiya ilə ikitərəfli müqavilə ilə tənzimlənir, ona görə də bu, bizim parafladığımız sülh sazişinə aid deyil".
Xatırladaq ki, Rusiyanın Ermənistandakı səfiri Sergey Kopırkin son günlərdə müzakirə edilən 102-ci hərbi baza məsələsinə aydınlıq gətirmişdi. Səfir bildirmişdi ki, Rusiyanın 102-ci hərbi bazasının çıxarılması məsələsi Ermənistan və Rusiya arasında ikitərəfli münasibətlərin gündəmində deyil. Onun sözlərinə görə, Rusiyanın hərbi iştirakı Ermənistanın təhlükəsizlik sisteminin ən mühüm dayağı və regional sabitliyin mühüm amili olaraq qalır: "Hərbçilərimiz regionda heç kimə heç bir təhlükə yaratmır". Bu arada Ermənistanın Baş naziri Nikol Paşinyan da bildirib ki, Kollektiv Təhlükəsizlik Müqaviləsi Təşkilatına (KTMT) üzv ölkələrin Ermənistan qarşısında öhdəliklərini yerinə yetirməməsi ölkənin bu birlikdən çıxmasını şərtləndirib. Baş nazirin sözlərinə görə, KTMT-nin təhlükəsizlik sistemi köpükdür.
Hərbi ekspert, ehtiyatda olan polkovnik Üzeyir Cəfərov Sherg.az-a açıqlamasında deyib ki, 102-ci hərbi baza və "rus sərhədçilərinin orada qalıb-qalmayacağı" məsələsi Ermənistandan daha çox Rusiya mediasında müzakirə olunur. Ekspert vurğulayıb ki, erməni tərəfindən bu mövzu əsasən sosial şəbəkələr üzərində müzakirə predmetidir:
"Ani Badalyanın açıqlaması ümumi xarakterlidir. Yəni Ermənistan rəsmisi deyir ki, avqustun 8-də imzalanmış sənədlərdə "rus əsgərləri" ilə bağlı hansısa müddəa yoxdur. Amma unutmayaq ki, ötən günlərdə Ermənistan Baş naziri Nikol Paşinyan maraqlı fikir səsləndirdi. Bəyan etdi ki, Ermənistan artıq Kollektiv Təhlükəsizlik Müqaviləsi Təşkilatında təmsil olunmur. Böyük ehtimalla, Azərbaycan-Ermənistan arasında sülh razılaşması imzalanandan sonra avtomatik olaraq 102-ci hərbi bazanın və rus əsgərlərinin çıxarılması gündəmə gətiriləcək. Regionda baş verən proseslər də onu deməyə əsas verir ki, yaxın illərdə bu mövzu aktuallaşacaq. Yadınızdadırsa, 2024-cü ilin avqust ayında Rusiya hərbçiləri Zvartnots hava limanından çıxarılarkən də fərqli informasiyalar yayılırdı. Ancaq İrəvan hökuməti bu məsələdə israrını davam etdirdi və nəticə oldu. Hazırda Türkiyə ilə 345 km.lik məsafədə Rusiya sərhədçilərinin zaman-zaman ixtisara salınacağı, ermənilərlə əvəzlənəcəyi deyilir. 102-ci hərbi baza da sadəcə zaman məsələsidir".
Polkovnikin sözlərinə görə, belə mühüm məsələlər səfir səviyyəsində müzakirə, yaxud həll olunmur:
"Siyasətdə adətən olacaqları təkzib edirlər, ancaq bir müddət sonra bəhs edilən məsələ reallaşır. Zəngəzur dəhlizinə ABŞ şirkətinin nəzarət edəcəyi ilə bağlı Ermənistan XİN-dən təkzib açıqlaması gəlmişdi. Ümumiyyətlə, belə bir məsələnin müzakirə olunmadığını iddia edirdilər. Sonrası məlumdur. İndi də 102-ci hərbi baza məsələsinin Rusiyanı qıcıqlandıracaq tərzdə, açıq müstəvidə müzakirəsi məqsədəuyğun sayılmır. Ötənlərdə Paşinyan Moskvada idi və Rusiya rəhbəri V.Putinlə görüşdü. Regionda və dünyada xeyli ciddi hadisələr baş verməkdədir. Azərbaycan və Ermənistan yekun sülh sazişinə imza atmağın astanasındadır və yəqin ki, gələn il sülh imzalanacaq. Bütün bunların fonunda 120-ci hərbi bazanın Ermənistanda qalmasına nə ehtiyac var? Rusiyanın hərbi bazası Ermənistana o məqsədlə yerləşdirilmişdi ki, o zaman Ermənistan-Türkiyə münasibətlərində gərginlik var idi, Qarabağda müharibə gedirdi. İndi vəziyyət dəyişib və Baş nazir N.Paşinyan da hər fürsətdə erməni cəmiyyətinə bunu izah etməyə çalışır. Ermənistan daxilində bəzi qüvvələr 102-ci hərbi bazanın ölkəyə problemlər yaratdığını deyirlər. Düzdür, hərbi bazanın 2044-cü ilədək orada qalması ilə bağlı müqavilə var. Amma hər şey rəsmi sənədlərdəki kimi həllini tapmır və bunun örnəkləri var. Təkcə Paşinyan hökuməti yox, Ermənistan ictimaiyyəti də Rusiyaya, KTMT kimi təşkilatlara etimadını itirib. Rusiya da narahatdır ki, Paşinyan hökuməti 2044-cü ili gözləmədən hərbi bazanın ölkənin tərk etməsini tələb edə bilər. İrəvan hökuməti daha praqmatik, uzaqgörən siyasət həyata keçirir".
