İranın mühafizəkar dairələrinə yaxın mərkəzlər Azərbaycanın ünvanına daha bir absurd iddia səsləndiriblər. Guya Pakistanın puştu və pəncab mənşəli 50 min döyüşçüsü muzdlu kimi Azərbaycana göndərilir, onların köçürülməsi də Türkiyə və İsrail xüsusi xidmət orqanlarının iştirakı ilə həyata keçirilir.
Musavat.com xəbər verir ki, bu həyasız və absurd iddiaları SEPAH-ın telegram kanalları həyata keçiriblər.
Əslində isə bu məlumatlar heç bir mənbə ilə təsdiqlənmir və tamamilə böhtan xarakteri daşıyır. Siyasi müşahidəçilərin fikrincə, bu cür uydurma iddialar İran daxilindəki mühafizəkar dairələrin sülh prosesinə qarşı sabotaj xəttinin bir hissəsidir. Məqsəd həm Azərbaycan–Pakistan, həm də Azərbaycan–Türkiyə münasibətlərini kölgə altına salmaq, eyni zamanda Pezeşkian hökumətinin həyata keçirdiyi barışıq addımlarını ləkələməkdir.
Xatırladaq ki, bu ilin iyununda İsrailin İrana genişmiqyaslı hücumları zamanı ən qətiyyətli dəstəyi məhz Pakistan və Türkiyə nümayiş etdirmiş, Azərbaycan da İranın bombalanmasını sərt bir dillə pisləmişdi. Azərbaycan rəhbərliyi hətta İsrailə müraciət edərək, İranın Güney Azərbaycan ərazilərinin hədəfə alınmamasını istəmişdi. Yəni bugünkü böhtanların hədəfi əslində bu həmrəyliyi dağıtmaq və Azərbaycan–Pakistan–Türkiyə üçlüyünün yaxınlaşmasını əngəlləməkdir.
Regiondakı yeni geosiyasi reallıq isə göstərir ki, nə SEPAH-ın dezinformasiyası, nə də konservativ dairələrin bu tip kampaniyaları Azərbaycan–Pakistan–Türkiyə əməkdaşlığını dayandıra biləcək. Əksinə, bu üç dövlətin strateji tərəfdaşlığı getdikcə güclənir və İranın böhtan siyasəti yalnız özünü daha da təcrid vəziyyətinə salır.
Azərbaycan, Pakistan və Türkiyə arasında münasibətlər uzun illərdir dərin tarixi, dini və strateji bağlara söykənir. Pakistan 1991-ci ildə Azərbaycanın müstəqilliyini tanıyan ilk ölkələrdən olub. Qarabağ məsələsində də İslamabaddan Bakıya daim prinsipial dəstək göstərilib, hətta Pakistan bu günə qədər Ermənistanı dövlət kimi tanımayıb. Türkiyə isə qardaş ölkə kimi Azərbaycanın ən mühüm strateji müttəfiqi olub və hər iki dövlətlə “bir millət, üç dövlət” anlayışı formalaşıb.
Son illərdə bu əməkdaşlıq yalnız siyasi müstəvidə deyil, hərbi və iqtisadi sahələrdə də güclənib. Birgə hərbi təlimlər, müdafiə sənayesində layihələr və enerji əməkdaşlığı üçlüyün strateji tərəfdaşlığını daha da möhkəmləndirib. Bu birlik regionda balansın dəyişməsinə səbəb olub və İran kimi dövlətlərin narahatlığına yol açıb.
SEPAH isə müxtəlif dövrlərdə Azərbaycana qarşı əsassız kampaniyalar aparıb. Xüsusilə Qarabağ müharibəsindən sonra Azərbaycanın qələbəsini gözdən salmaq üçün yalan məlumatlar tirajlanıb. “Pakistan döyüşçüləri”, “İsrail bazaları” və ya “Türkiyə ordusunun Azərbaycanda yerləşdirilməsi” kimi iddialar dəfələrlə gündəmə gətirilib. Lakin bütün bu dezinformasiyalar həm beynəlxalq ictimaiyyət, həm də region ölkələri tərəfindən təsdiqlənməmiş uydurmalar kimi dəyərləndirilib.
Analitiklər hesab edirlər ki, SEPAH-ın bu siyasəti əslində İran daxilindəki siyasi qrupların daxili maraqlarına xidmət edir. Konservativ dairələr sülh və əməkdaşlıq proseslərini əngəlləmək üçün belə ittihamlarla ictimai rəy formalaşdırmağa çalışır. Lakin regionda yaranmış geosiyasi reallıq göstərir ki, Azərbaycan–Pakistan–Türkiyə ittifaqı hər gün daha da güclənir və xarici təzyiqlərə baxmayaraq strateji tərəfdaşlıq yolundan geri dönməyəcək.
