Əbu-Dabidə Azərbaycan Prezidenti İlham Əliyevlə Ermənistanın Baş naziri Nikol Paşinyan arasında keçirilən görüşü sülh müqaviləsinə doğru gedən yolda ən önəmli və tarixi görüş kimi şərh etmək olar.

Bunu "Report"a politoloq Ülviyyə Zülfiqar deyib.

O qeyd edib ki, artıq məlum olduğu kimi görüşdə Azərbaycan-Ermənistan dövlətlərarası normallaşma gündəliyinin müxtəlif aspektləri müzakirə edilib.

"Görüş sülh müqaviləsi ilə bağlı prosesin vacib həlqələrindəndir. Sərhədin delimitasiyası prosesi ilə bağlı əldə olunmuş nailiyyətləri dəyərləndirən liderlər bu istiqamətdə əməli işlərin davam etdirilməsi üçün müvafiq dövlət komissiyalarına tapşırıqlar veriblər. Bu qərarların region üçün strateji əhəmiyyəti olduğu kimi sülhün və sabitliyin qorunmasında da əvəzsiz rolunun olacağı açıq-aşkardır".

Onun sözlərinə görə, görüş yerinin Azərbaycan tərəfindən məhz Əbu-Dabi olaraq seçilməsi BƏƏ-nin iki ölkə arasında baş verənlərlə bağlı neytral mövqedə olması ilə bağlıdır:

"BƏƏ sadəcə görüş üçün şəraiti təmin edib. Hər iki ölkə arasında danışıqların keçirilməsi üçün vasitəçiyə ehtiyac yoxdur. Rəsmi açıqlamada da bildirildi ki, ikitərəfli danışıqlar normallaşma prosesi ilə bağlı bütün məsələlərin həlli üçün ən səmərəli formatdır.

Ermənistan Azərbaycanın irəli sürdüyü sülh konsepsiyasını qəbul edir və etməlidir də. Nikol Paşinyanın regionda sülhə maraqlı olmayan xarici qüvvələrin kim olduğunu anlamaqdan başqa yolu yoxdur. Tərəflər, həmçinin iki ölkə arasında ikitərəfli danışıqları və etimad quruculuğu tədbirlərini davam etdirmək barədə razılığa gəliblər. Düşünürəm ki, Ermənistan tərəfi bu görüşü və yaranan imkanı çox diqqətlə dəyərləndirməli, yaranmış tarixi şansı əldən verməməlidir".