Son həftələrdə Ukraynada hərbi əməliyyatlar fonunda cəbhə xəttində ekspertlərin və hərbi analitiklərin diqqətini cəlb edən nəzərəçarpan dəyişikliklər baş verir.

Bu şərhçilərdən biri olan keçmiş Pentaqon müşaviri Duqlas Makqreqor Ukrayna Silahlı Qüvvələrinin vəziyyəti və münaqişənin perspektivləri ilə bağlı bir sıra səs-küylü bəyanatlar verib.

Makqreqor qeyd edir ki, Rusiya qoşunları Uqledar və Xarkov yaxınlığında uğurlu hücum əməliyyatları həyata keçirərək Ukrayna cəbhəsinə ciddi zərbələr vurub.

Onun fikrincə, hazırkı vəziyyət Rusiyanın əsas strateji mövqelərə, o cümlədən Dnepr çayına və hətta Kiyevə doğru irəliləməsi üçün əlverişlidir. Bu proqnoz Ukraynanın müdafiə xətlərinin zəiflədiyi və resurslarının tükəndiyi fikri ilə əsaslandırılır.

Makqreqorun sözlərinə görə, Qərb tərəfindən tədarük olunan silahların, xüsusilə HIMARS sistemlərinin böyük bir hissəsi artıq itirilib. Bu, Ukrayna Silahlı Qüvvələrinin döyüş qabiliyyətini daha da zəiflədir.

Makqreqor vurğulayır ki, Şərqi Avropanın bir çox ölkələri Rusiya ilə genişmiqyaslı münaqişəyə cəlb olunmaq qorxusundan Ukraynaya dəstəklərini tədricən dayandırırlar. Bu, cəbhədə qüvvələr nisbətinin dəyişməsinə və Ukraynanın beynəlxalq arenadakı mövqeyinin zəifləməsinə kömək edə bilər.

Beləliklə, Makqreqorun təhlilinə əsasən, hazırda Ukrayna bir sıra ciddi problemlərlə üzləşir: hərbi texnikanın çatışmazlığı, insan itkisi və müttəfiqlərin dəstəyinin azalması. Onun fikrincə, bu amillər Rusiyanın cəbhədə qələbəsini demək olar ki, qaçılmaz edir.

Ukraynalı hərbi ekspert, “Strategiya XXI” Qlobalistika Mərkəzinin təhlükəsizlik proqramlarının rəhbəri Pavel Lakiyçuk mövzu ilə bağlı “Cebheinfo.az”-a açıqlama verib.

O bildirib ki, Duqlas Ebott Makqreqorun “proqnozlarına” ciddi yanaşanlar “Fox News” kanalında “Tucker Carlson Tonight” şousunun, Bayden hökumətinin yadplanetlilərin kosmik gəmisini gizlətməsinin, ABŞ-nin Ukraynada bioloji silah istehsal etməsinin və onların “Şimal axını”nı, ukraynalıların isə Kaxovka SES-i partlatması ilə bağlı nəzəriyyələrin tərəfdarlarıdır.

Ekspert Makqreqorun “Tucker Carlson Tonight” - a verdiyi bəzi proqnozlara diqqət çəkib:

"Rusiyanın Ukraynaya müdaxiləsindən sonra Makqreqor fevral və martın əvvəlində “Fox News”-un üç proqramında çıxış etdi və Moskvaya dəstək verdi.

O, müharibə başladıqdan üç gün sonra dedi:“Ukraynanın şərqindəki döyüş demək olar ki, bitib”.

Onun proqnozuna görə, əgər Ukrayna növbəti 24 saat ərzində təslim olmasa, Rusiya onu məhv edəcək.

Makqreqor düşünürdü ki, Rusiyanın Ukraynanın istənilən hissəsini ələ keçirməsinə icazə verilməlidir.

İkinci çıxışında o, proqnozunu yenidən nəzərdən keçirdi: “İlk beş gündə Rusiya qoşunları, səmimi desək, çox yumşaq davrandılar. İndi onlar bunu münasibəti düzəltdilər. Odur ki, daha on günə hər şey tamamilə bitməlidir. Düşünürəm ki, Prezident Zelenskinin indi edə biləcəyi ən birinci qəhrəmanlıq reallıqla barışmaqdır”.

2022-ci ilin mart ayının əvvəlində “Fox News”-da növbəti çıxışlarından birində Makqreqor atəşkəsin yaxın olduğunu bildirdi. Onun iddiasına görə, Ukrayna qoşunları “tamamilə parça-parça olub”. “Bunda heç bir şübhə yoxdur”, – deyə o iddia edirdi.

“The Grayzone” saytına müsahibəsində Makqreqor iddia edirdi ki, Putin mülki əhalini qorumaqda çox diqqətli olub və bu, onun qələbəsini gecikdirib. Onun bu sözləri Buça, Qostomel və İrpendəki hadisələrdən sonraya təsadüf edirdi.

2022-ci ilin iyul ayında “Real America’s Voice” proqramında o bildirdi ki, Xarkov və Odessa istisna olmaqla, müharibə əsasən bitib. Həmin ilin sentyabrında, məhz Ukrayna Silahlı Qüvvələrinin Xarkovdakı əks-hücumu zamanı, Makqreqor yenidən “bu müharibənin tezliklə bitə biləcəyini” proqnozlaşdırdı və həmin ayın sonunda "On minlərlə Ukrayna əsgəri öldürülüb və ya yaralanıb, Ukrayna həqiqətən tənəzzül ərəfəsindədir” dedi.

Polkovnik öz “proqnozlarının” həyata keçməməsindən narahatdırmı? Əsla! 2023-cü ilin sentyabrında amerikalı köşə yazarı Endryu Napolitanoya verdiyi müsahibədə o, səhvlərini Rusiyanın taktikasını dəyişməsi ilə izah etdi. Bu dəfə rusların sadəcə iki şeyə- danışıqlara və Avropada iqtisadiyyatın çökməsinə inanaraq gözləməyə qərar verdiklərini dedi.

Həmin vaxt Makqreqor həmçinin “Ukrayna dairələrində Prezident Vladimir Zelenskidən qurtulmaq üçün çoxlu söhbətlər getdiyini” iddia etmişdi. Bu da açıq-aşkar yalan və Kremlin yaydığı dezinformasiyanın bir hissəsi idi. Polkovnik Makqreqor haqqında əsas fikri isə nüfuzlu respublikaçı senator Liz Çeyni səsləndirib, onu “Respublikaçılar Partiyasının “Putin qanadının” üzvü” kimi xarakterizə edib. Çox dolğun xarakteristikadır”.

Ekspert Uqledarın təslim olmasından bir həftə sonra rusların Boqoyavlenka kəndinə doğru bir-iki kilometr irəlilədiyini və ondan üç kilometr uzaqlıqda ilişib qaldığını, Boqoyavlenkadan Dneprə qədər hələ 170 kilometr olduğunu xatırladıb.

"Rusların “Xarkov hücumu” artıq altı aydır ki, eyni yerdə davam edir- Volçansk Aqreqat Zavodu ətrafında. Ya ruslar ora hücum edirlər, ya da onları geri oturdurlar. Görünür, polkovnik Makqreqorun fikrincə, Volçansk Aqreqat Zavodu rus qoşunlarının Kiyevə çatması üçün sonuncu maneədir. Amma rusların bu uğuru əldə edəcəkləri çox çətin görünür.

Ora döyüşlərlə çatmaq üçün daha neçə kilometr qalıb. Əgər teatra maraq göstərirsənsə, coğrafiyanı öyrənməlisən”,- deyə ekspert fikrini yekunlaşdırıb.