Gəncə şəhər, Atatürk prospekti 197, bina 1, mənzil 127 ünvanında yaşayan Bayram Cəfərov göndərdiyi şikayətində bildirib ki, azyaşlı övladına əlilik pensiyası ala bilmir.
“Qızım Aysel Cəfərova ağır dərəcəli kəllə – beyin travması alıb, psixi xəstə vəziyyətinə gəlib. Müayinə və müalicəsini vaxtı – vaxtında etməyə imkanım yoxdur.”
DİA.AZ xəbər verir ki, Bayram Cəfərov qızına əlillik pensiyası təyin edilməsi üçün lazimi sənədləri və xəstəlik epikrizini Gəncə şəhər Ruhi Əsəb Dispanserinə təqdim edib. Ancaq dispanserdən Sevil həkim sənədləri elektron qaydada göndərməkdən imtina edib və bunun yalnız mart ayında mümkün olacağını bildirib.
Bayram Cəfərov deyir, səbəbini soruşduqda isə dispanserin həkimi başqa əlavə məlumat verməyib.
Şikayətçi məsələ ilə bağlı prezidentə də müraciət ünvanlayıb.
Qeyd edək ki, Bayram Cəfərov özü də əlildir, ailəsini aldığı pensiya ilə dolandırır.
Qarşı tərəfin mövqeyini dərc etmək üçün Gəncə şəhər Ruhi Əsəb Dispanseri ilə əlaqə saxlamaq mümkün olmadı.
***
DİA.AZ bildirir ki, Əmək və Əhalinin Sosial Müdafiəsi Nazirliyindən müraciətlə bağlı vətəndaşın probleminə reaksiya verilib. Nazirliyin cavabını olduğu kimi təqdim edirik:
"Cəfərov Bayramın övladı Cəfərova Aysel Bayram qızına sağlamlıq imkanları məhdudluq təyin edilməməsi ilə bağlı müraciəti Əmək və Əhalinin Sosial Müdafiəsi Nazirliyi tərəfindən araşdırılmışdır. Müəyyən olunmuşdur ki, Cəfərova Aysel Bayram qızının sağlamlıq imkanları məhdudluq təyinatı ilə bağlı yaşayış yeri üzrə qeydiyyatda olduğu səhiyyə müəssisəsindən Əlillik Altsisteminə heç bir müraciət (forma88) daxil olmamışdır. Nəzərinizə çatdırırıq ki, əlilliyin qiymətləndirilməsi prosesi elektron qaydada vətəndaş-ekspert ünsiyyəti olmadan həyata keçirilir. Vətəndaş əlillik təyinatı üçün yaşayış yeri üzrə qeydiyyatda olduğu səhiyyə müəssisəsinə (poliklinika və ya xəstəxana) müraciət etməlidir, burada şəxsin( laborator, diaqnostik, instrumental müayinələrinin nəticələri, satsionar və ambulator müalicə məlumatları, ixtisaslaşmış həkim müayinəsi və s) haqqında göndəriş (forma 88) tərtib olunub, rəsmiləşdirilərək Əlillik Altsisteminə ötürülür. Forma 88 əlillik Altsisteminə daxil edilmədiyi halda şəxsin əlilliyi ilə bağlı qərar vermək də təbii ki, mümkün deyil. İlk mərhələdə səhiyyə müəssisəsinin vəzifəsi vətəndaşın forma 88-ni elektron qaydada ( göndəriş) altsistemə göndərməkdir, göndəriş altsistemə daxil edildikdən sonra həmin göndərişi verən səhiyyə müəssisəsinin, bu göndərişi təsdiq edən şəxsin və əlilliyi qiymətləndiriləcək şəxslərin kimliyini birbaşa və ya dolayısı ilə müəyyən etməyə imkan verən bütün məlumatlar şifrələnərək adsızlaşdırılır. TSEK tərəfindən vətəndaşın iştirakı olmadan məhz forma 88-də qeyd edilən məlumatlara əsasən əlilliyin qiymətləndirilməsi barədə qərar verilir".
