Rusiya Müdafiə Nazirliyi Ukraynanın Rusiyaya 400 PUA ilə hücum etdiyini açıqlayıb.
Leninqrad vilayətinin rəhbəri Aleksadr Drozdenko bölgəyə 72 PUA-nın zərbə endirdiyini bildirib. Bölgədəki Kirov neft terminalının vurulduğu da bildirilib.
"DİA-AZ"ın məlumatına görə, yerli “Bumaqa” nəşri yazır ki, Sankt-Peterburqda duman görünür və partlayışlar eşidilir. Sankt-Peterburq şəhərinin rəhbərliyi Kronştad, Petrodvoreç və Kurortnı rayonlarında həyacan elan ediblər.
Bundan öncə Ukrayna Prezidenti Volodimir Zelenski də Rusiyanın Sankt Peterburq bölgəsinə zərbə endirdiklərini açıqlayıb.
Ukraynanın zərbələrindən sonra Novorossiyskdə benzinin azad satışı dayandırılıb. Şəhər rəhbərliyi yaydığı bəyanatda yanacaqdoldurma məntəqələrində benzinin olmadığını, yanacağın yalnız yanacaq kartları ilə doldurulacağını bildirib. Bununla belə qadağa yalnız benzinə aid edilib, dizelin satışı sərbəst olaraq qalıb.
AzadlıqRadiosunun Rusiya xidməti yazır ki, yanacaq kartları yalnız hüquqi şəxslər və fərdi sahibkarlara xidməti avtomobillərini yanacaqla təmin etmək üçün verilir. Onlardan şəxsi avtomobillər üçün istifadə etmək qadağan edilib.
Ölkədəki yanacaq qıtlığı fonunda Rusiya baş nazirinin müavini Aleksandr Novak neft şirkətlərinə regionlara tələbatın ödənməsi daha çox məhsul tədarükü tapşırığı verib. Hökumətin yaydığı bəyanatda isə xüsusi diqqət İrkutsk və Zabaykaliya bölgələrinə ayrılıb. Bununla belə hökumət bəyanatında yaranmış böhranı yanacaq qıtlığı olaraq adlandırmayıb.
