Son illər sağlam qidalanmaya marağın artması ilə birlikdə market rəflərində “şəkərsiz”, “fit”, “proteinli”, “light”, “0% şəkər”, “diet” kimi ifadələrlə satışa çıxarılan məhsulların sayı da sürətlə çoxalıb.

Bir çox istehlakçı bu məhsulların adi alternativlərdən daha sağlam olduğunu düşünərək onları seçim edir.Lakin qidalanma üzrə mütəxəssislər bildirirlər ki, qablaşdırmanın üzərində yazılan marketinq ifadələri hər zaman məhsulun həqiqətən sağlam olduğu anlamına gəlmir.

“Cebheinfo.az”-ın araşdırmasına görə, istehsalçılar qanunvericiliyin icazə verdiyi çərçivədə məhsulların üzərində diqqət cəlb edən ifadələrdən istifadə edirlər.

Məsələn, “şəkərsiz” ifadəsi əlavə şəkər istifadə olunmadığını göstərə bilər. Lakin məhsulun tərkibində təbii şəkərlər, müxtəlif şirinləşdiricilər və ya yüksək kalorili digər komponentlər ola bilər.

Buna görə də mütəxəssislər istehlakçılara yalnız qablaşdırmanın ön hissəsinə deyil, məhsulun tərkib siyahısına və qida dəyəri cədvəlinə diqqət yetirməyi tövsiyə edirlər.

“Fit” adı ilə satılan məhsullar da bəzən yanlış təsəvvür yaradır. Belə məhsulların bəzilərində yağ miqdarı azaldılsa da, dadın qorunması üçün şəkər, nişasta və ya digər əlavələrin miqdarı artırıla bilər. Nəticədə məhsul “fit” adlandırılsa da, onun kalori dəyəri adi məhsuldan ciddi şəkildə fərqlənməyə bilər.

Son dövrlərdə protein tərkibli məhsullara da maraq artıb. Protein insan orqanizmi üçün vacib qida maddəsi olsa da, mütəxəssislər bildirirlər ki, hər bir insanın əlavə proteinlə zəngin məhsullara ehtiyacı yoxdur.

Fiziki aktivliyi aşağı olan və normal qidalanan insanların gündəlik protein ehtiyacını adi qidalarla ödəməsi mümkündür. Belə halda proteinli batonlar, peçenyelər və desertlər əlavə faydadan çox, artıq kalori qəbuluna səbəb ola bilər.

Şəkər əvəzinə istifadə olunan şirinləşdiricilər də müzakirə mövzularından biridir. Aspartam, sukraloza, asesulfam-K, steviya və digər şirinləşdiricilər müəyyən normativlər çərçivəsində istifadəyə icazə verilən maddələrdir.

Lakin mütəxəssislər bildirirlər ki, bu cür məhsulların həddindən artıq istehlakı sağlam qidalanmanın əsas prinsipi hesab olunmur və balanslı rasion hər zaman üstün tutulmalıdır.

Qidalanma üzrə ekspertlər bildirirlər ki, istehlakçılar məhsul alarkən ilk növbədə tərkib siyahısını oxumalıdırlar.

Tərkibdə ilk sıralarda şəkər, qlükoza siropu, fruktoza siropu, palma yağı və ya çoxsaylı əlavələrin olması məhsulun emal səviyyəsinin yüksək olduğunu göstərə bilər. Bundan başqa, 100 qram məhsul üzrə kalori, şəkər, yağ, doymuş yağ və duz miqdarına diqqət yetirmək daha düzgün seçim etməyə kömək edir.

Mütəxəssislər vurğulayırlar ki, sağlam qidalanma yalnız üzərində “fit” və ya “proteinli” yazılan məhsullardan ibarət deyil. Təzə meyvə və tərəvəzlər, tam taxıllar, paxlalılar, yumurta, balıq, süd məhsulları və digər təbii qidalar əksər hallarda emal olunmuş “sağlam” məhsullardan daha faydalıdır.

Ekspertlərin fikrincə, istehlakçılar reklam şüarlarından çox məhsulun real tərkibini qiymətləndirməyi öyrənməlidirlər.

Çünki qablaşdırmanın ön hissəsində yer alan cəlbedici ifadələr marketinq aləti ola bilər, məhsulun sağlamlıq baxımından üstün olduğunu isə yalnız tərkibi və qida dəyəri müəyyən edir.