ABŞ Prezidenti Donald Tramp Meksikanı su müqaviləsini pozmaqda ittiham edərək, ölkəyə qarşı yeni iqtisadi təzyiq tədbirləri tətbiq edəcəyini bəyan edib. Prezident bildirib ki, Meksika ABŞ fermerlərinə çatmalı olan suyu geri saxlayır və bu, Texasda kənd təsərrüfatına ciddi ziyan vurur.

Teleqraf xəbər verir ki, Tramp "Truth Social"da yazıb ki, Meksika Rio Qrande hövzəsi üzrə 1944-cü il su müqaviləsini yerinə yetirmir və suyun dərhal buraxılmaması halında 5 faizlik əlavə tarif tətbiq etmək barədə sənədləşdirməyə göstəriş verib.

ABŞ rəsmiləri uzun illərdir Meksikanın öhdəliklərini tam yerinə yetirmədiyini bildirirlər. Beynəlxalq Sərhəd və Su Komissiyasının hesablamalarına görə, Meksika son beş ildə ABŞ-YƏ çatmalı olan suyun 73 min akr-futunu verməyib. Tərəflərin müqavilədəki “fövqəladə quraqlıq” şərtini necə şərh etməsi isə məsələni mürəkkəbləşdirir.

Texasda davam edən quraqlıq fermerlərin məhsul və heyvandarlıq üçün su təminatını çətinləşdirib. Yerli siyasətçilər mexanizmin işləmədiyini, bunun nəticəsində ştatın 1 milyard dollarlıq zərər gördüyünü bildirirlər.

Xatırladaq ki, Tramp bu mövzuda ilk dəfə deyil ki, Meksikanı hədələyir. Apreldə də analoji tarif və sanksiya xəbərdarlığı etmişdi.

Meksika ABŞ-nin ən böyük ticarət tərəfdaşıdır. Yeni tarif tətbiq olunarsa, Meksikadan idxal olunan mallara vergi 30%-ə yüksələcək. Lakin hazırkı ABŞ–Meksika–Kanada Ticarət Sazişinə (USMCA) uyğun olan əksər məhsullar tarifdən azaddır.

Tramp administrasiyası iyulda keçiriləcək USMCA icmalında sazişin müddətinin uzadılmayacağı siqnalını da verib ki, bu da gələcək ticarət münasibətlərini daha da qeyri-müəyyən edir.