Rusiya ilə ABŞ arasında birbaşa toqquşma riskləri kifayət qədər yüksəkdir, lakin Prezident Donald Trampın hakimiyyətə gəlməsi ilə onlar bir qədər azalacaq.
Bunu Rusiya Dövlət Dumasının Beynəlxalq Əlaqələr Komitəsinin sədrinin birinci müavini Aleksey Çepa "Lenta.Ru"ya müsahibəsində deyib.
Deputatın sözlərinə görə, bugünkü reallıqlarda belə risklər həmişə mövcuddur və hadisələrin bu cür inkişafına hazır olmaq lazımdır. Çepa xatırladıb ki, Ukrayna ilə bağlı siyasətə görə hazırda ABŞ-la münasibətlər ən aşağı səviyyədədir. Onun fikrincə, ABŞ-da seçkilərdən sonrakı vəziyyət toqquşma riskini azaldıb.
Siyasətçi, Trampın Ukraynadakı münaqişəyə son qoymaq istəyi ilə bağlı ritorikasına işarə edərək, bu cür bəyanatların irəliyə doğru böyük addım olduğunu qeyd edib.
"Yenə də ABŞ-ın öz maraqlarını sərt şəkildə müdafiə etdiyini, hətta NATO-dakı tərəfdaşlarına və qonşularına belə məhəl qitmadığını görürük. Bu səbəbdən də, biz yenə də hazır olmalıyıq, yalnız özümüzə güvənməliyik və bütün bunları nəzərə alaraq ABŞ-la münasibətlər xətti qurmalıyıq", Çepa bildirib.
Bundan əvvəl Pentaqonun keçmiş müşaviri və istefada olan polkovniki Duqlas Makqreqor söyləyib ki, Rusiya münaqişənin həlli üçün danışıqlar masasına oturmaqdan imtina etdiyi halda Ukraynaya yeni hərbi yardım göndərilməsi müharibəyə gətirib çıxaracaq.
Bu yaxınlarda Qərb Rusiyanın Ukraynadakı məqsədlərindən əl çəkməyəcəyini hesab edib.
